॥ অন্নপূর্ণাস্তোত্রম্ ॥
নিত্যানন্দকরী বরাভযকরী সৌন্দর্যরত্নাকরী নির্ধূতাখিলঘোরপাবনকরী প্রত্যক্ষমাহেশ্বরী । প্রালেযাচলবংশপাবনকরী কাশীপুরাধীশ্বরী ভিক্ষাং দেহি কৃপাবলম্বনকরী মাতান্নপূর্ণেশ্বরী ॥ ১ ॥
নানারত্নবিচিত্রভূষণকরী হেমাম্বরাডম্বরী মুক্তাহারবিলম্বমানবিলসদ্বক্ষোজকুম্ভান্তরী । কাশ্মীরাগুরূবাসিতা রুচিকরী কাশীপুরাধীশ্বরী ভিক্ষাং দেহি কৃপাবলম্বনকরী মাতান্নপূর্ণেশ্বরী ॥ ২ ॥
যোগানন্দকরী রিপুক্ষযকরী ধর্মাথনিষ্ঠাকরী চন্দ্রার্কানলভাসমানলহরী ত্রৈলোক্যরক্ষাকরী । সর্বৈশ্বর্যসমস্তবাংছনকরী কাশীপুরাধীশ্বরী ভিক্ষাং দেহি কৃপাবলম্বনকরী মাতান্নপূর্ণেশ্বরী ॥ ৩ ॥
কৈলাসাচলকন্দরালযকরী গৌরী উমাশঙ্করী কৌমারী নিগমার্থগোচরকরী ওঁকারবীজাক্ষরী । মোক্ষদ্বারকপাটপাটনকরী কাশীপুরাধীশ্বরী ভিক্ষাং দেহি কৃপাবলম্বনকরী মাতান্নপূর্ণেশ্বরী ॥ ৪ ॥
দৃশ্যাদৃশ্যবিভূতবাহনকরী ব্রহ্মাণ্ডভাণ্ডোদরী লীলানাটকসূত্রভেদনকরী বিজ্ঞানদীপাঙ্কুরী । শ্রীবিশ্বেশমনঃপ্রসাদনকরী কাশীপুরাধীশ্বরী ভিক্ষাং দেহি কৃপাবলম্বনকরী মাতান্নপূর্ণেশ্বরী ॥ ৫ ॥
উর্বী সর্বজনেশ্বরী ভগবতী মাতান্নপূর্ণেশ্বরী বেণীনীলসমানকুন্তলহরী নিত্যান্নদানেশ্বরী । সর্বানন্দকরী সদাশুভকরী কাশীপুরাধীশ্বরী ভিক্ষাং দেহি কৃপাবলম্বনকরী মাতান্নপূর্ণেশ্বরী ॥ ৬ ॥
আদিক্ষান্তিসমস্তবর্ণনকরী শম্ভোস্ত্রিভাবাকরী কাশ্মীরাত্রিপুরেশ্বরী ত্রিনযনী নিত্যাঙ্কুরা শর্বরী । কামাকাঙ্ক্ষকরী জনোদযকরী কাশীপুরাধীশ্বরী ভিক্ষাং দেহি কৃপাবলম্বনকরী মাতান্নপূর্ণেশ্বরী ॥ ৭ ॥
দেবী সর্ববিচিত্ররত্নরচিতা দাক্ষাযণী সুন্দরী বামা স্বাদুপযোগধরপ্রিযকরী সৌভাগ্যমাহেশ্বরী । ভক্তাভীষ্টকরী দশাশুভহরী কাশীপুরাধীশ্বরী ভিক্ষাং দেহি কৃপাবলম্বনকরী মাতান্নপূর্ণেশ্বরী ॥ ৮ ॥
চন্দ্রার্কালযকোটিকোটিসদৃশা চন্দ্রাংশুবিম্বাধরী চন্দ্রার্কাগ্নিসমানকুংডলধরী চন্দ্রার্কবর্ণেশ্বরী । মালাপুস্তকপাশসাংকুশধরী কাশীপুরাধীশ্বরী ভিক্ষাং দেহি কৃপাবলম্বনকরী মাতান্নপূর্ণেশ্বরী ॥ ৯ ॥
ক্ষত্রত্রাণকরী মহাঽভযকরী মাতা কৃপাসাগরী সাক্ষান্মোক্ষকরী সদা শিবকরী বিশ্বেশ্বরী শ্রীধরী । দক্ষাক্রন্দকরী নিরামযকরী কাশীপুরাধীশ্বরী ভিক্ষাং দেহি কৃপাবলম্বনকরী মাতান্নপূর্ণেশ্বরী ॥ ১০ ॥
ভগবতি ভবরোগাত্পীডিতং দুষ্কৃতোত্থাত্ সুতদুহিতৃকলত্রোপদ্রবেণানুযাতম্ । বিলসদমৃতদৃষ্ট্যা বীক্ষ্য বিভ্রান্তচিত্তং সকলভুবনমাতস্ত্রাহি মামোং নমস্তে ॥ ১১ ॥
মাহেশ্বরীমাশ্রিতকল্পবল্লীমহম্ভবোচ্ছেদকরীং ভবানীংম্ । ক্ষুধার্তজাযাতনযাদ্যুপেতস্ত্বামন্নপূর্ণে শরণং প্রপদ্যে ॥ ১২ ॥
দারিদ্র্যদাবানলদহ্যমানং পাহ্যন্নপূর্ণে গিরিরাজকন্যে । কৃপাম্বুধৌ মজ্জয মাং ত্বদীযে ত্বত্পাদপদ্মার্পিতচিত্তবৃত্তিম্ ॥ ১৩ ॥
অন্নপূর্ণে সদা পূর্ণে শঙ্করপ্রাণবল্লভে । জ্ঞানবৈরাগ্যসিদ্ধ্যর্থং ভিক্ষাং দেহি চ পার্বতি ॥ ১৪ ॥
মাতা চ পার্বতী দেবী পিতা দেবো মহেশ্বরঃ । বান্ধবাঃ শিবভক্তাশ্চ স্বেদেশো ভুবনত্রযম্ ॥ ১৫ ॥
ইতি শ্রীমচ্ছংকরাচার্যবিরচিতমন্নপূর্ণাস্তোত্রং সংপূর্ণম্ ।
উৎস: Wikisource · CC BY-SA 4.0