॥ শ্রীকনকধারাস্তোত্রম্ ॥
অঙ্গং হরেঃ পুলকভূষণমাশ্রযন্তী ভৃঙ্গাঙ্গনেব মুকুলাভরণং তমালম্ । অঙ্গীকৃতাখিলবিভূতিরপাঙ্গলীলা মাঙ্গল্যদাঽস্তু মম মঙ্গলদেবতাযাঃ ॥ ১ ॥
মুগ্ধা মুহুর্বিদধতী বদনে মুরারেঃ প্রেমত্রপাপ্রণিহিতানি গতাগতানি । মালা দৃশোর্মধুকরীব মহোত্পলে যা সা মে শ্রিযং দিশতু সাগরসম্ভবাযাঃ ॥ ২ ॥
আমীলিতাক্ষমধিগম্য মুদা মুকুন্দম্– আনন্দকন্দমনিমেষমনঙ্গতন্ত্রম্। আকেকরস্থিতকনীনিকপক্ষ্মনেত্রং ভূত্যৈ ভবেন্মম ভুজঙ্গশযাঙ্গনাযাঃ ॥ ৩ ॥
বাহ্বন্তরে মধুজিতঃ শ্রিতকৌস্তুভে যা হারাবলীব হরিনীলমযী বিভাতি । কামপ্রদা ভগবতোঽপি কটাক্ষমালা কল্যাণমাবহতু মে কমলালযাযাঃ ॥ ৪ ॥
কালাম্বুদালিললিতোরসি কৈটভারের্– ধারাধরে স্ফুরতি যা তডিদঙ্গনেব । মাতুঃ সমস্তজগতাং মহনীযমূর্তির্– ভদ্রাণি মে দিশতু ভার্গবনন্দনাযাঃ ॥ ৫ ॥
প্রাপ্তং পদং প্রথমতঃ খলু যত্প্রভাবান্– মাঙ্গল্যভাজি মধুমাথিনি মন্মথেন । ময্যাপতেত্তদিহ মন্থরমীক্ষণার্ধং মন্দালসং চ মকরালযকন্যকাযাঃ ॥ ৬ ॥
বিশ্বামরেন্দ্রপদবিভ্রমদানদক্ষম্– আনন্দহেতুরধিকং মুরবিদ্বিষোঽপি । ঈষন্নিষীদতু মযি ক্ষণমীক্ষণার্ধম্– ইন্দীবরোদরসহোদরমিন্দিরাযাঃ ॥ ৭ ॥
ইষ্টাবিশিষ্টমতযোঽপি যযা দযার্দ্র– দৃষ্ট্যা ত্রিবিষ্টপপদং সুলভং লভন্তে । দৃষ্টিঃ প্রহৃষ্টকমলোদরদীপ্তিরিষ্টাং পুষ্টিং কৃষীষ্ট মম পুষ্করবিষ্টরাযাঃ ॥ ৮ ॥
দদ্যাদ্দযানুপবনো দ্রবিণাম্বুধারাম্– অস্মিন্নকিঞ্চনবিহঙ্গশিশৌ বিষণ্ণে । দুষ্কর্মধর্মমপনীয চিরায দূরং নারাযণপ্রণযিনীনযনাম্বুবাহঃ ॥ ৯ ॥
গীর্দেবতেতি গরুড়ধ্বজসুন্দরীতি শাকম্ভরীতি শশিশেখরবল্লভেতি । সৃষ্টিস্থিতিপ্রলযকেলিষু সংস্থিতাযৈ তস্যৈ নমস্ত্রিভুবনৈকগুরোস্তরুণ্যৈ ॥ ১০ ॥
শ্রুত্যৈ নমোঽস্তু শুভকর্মফলপ্রসূত্যৈ রত্যৈ নমোঽস্তু রমণীযগুণার্ণবাযৈ । শক্ত্যৈ নমোঽস্তু শতপত্রনিকেতনাযৈ পুষ্ট্যৈ নমোঽস্তু পুরুষোত্তমবল্লভাযৈ ॥ ১১ ॥
নমোঽস্তু নালীকনিভাননাযৈ নমোঽস্তু দুগ্ধোদধিজন্মভূত্যৈ । নমোঽস্তু সোমামৃতসোদরাযৈ নমোঽস্তু নারাযণবল্লভাযৈ ॥ ১২ ॥
নমোঽস্তু হেমাম্বুজপীঠিকাযৈ নমোঽস্তু ভূমণ্ডলনাযিকাযৈ । নমোঽস্তু দেবাদিদযাপরাযৈ নমোঽস্তু শার্ঙ্গাযুধবল্লভাযৈ ॥ ১৩ ॥
নমোঽস্তু দেব্যৈ ভৃগুনন্দনাযৈ নমোঽস্তু বিষ্ণোরুরসি স্থিতাযৈ । নমোঽস্তু লক্ষ্ম্যৈ কমলালযাযৈ নমোঽস্তু দামোদরবল্লভাযৈ ॥ ১৪ ॥
নমোঽস্তু কান্ত্যৈ কমলেক্ষণাযৈ নমোঽস্তু ভূত্যৈ ভুবনপ্রসূত্যৈ । নমোঽস্তু দেবাদিভিরর্চিতাযৈ নমোঽস্তু নন্দাত্মজবল্লভাযৈ ॥ ১৫ ॥
সম্পত্করাণি সকলেন্দ্রিযনন্দনানি সাম্রাজ্যদানবিভবানি সরোরুহাক্ষি । ত্বদ্বন্দনানি দুরিতোদ্ধরণোদ্যতানি মামেব মাতরনিশং কলযন্তু মান্যে ॥ ১৬ ॥
যত্কটাক্ষসমুপাসনাবিধিঃ সেবকস্য সকলার্থসম্পদঃ । সন্তনোতি বচনাঙ্গমানসৈস্– ত্বাং মুরারিহৃদযেশ্বরীং ভজে ॥ ১৭ ॥
সরসিজনিলযে সরোজহস্তে ধবলতমাংশুকগন্ধমাল্যশোভে । ভগবতি হরিবল্লভে মনোজ্ঞে ত্রিভুবনভূতিকরি প্রসীদ মহ্যম্ ॥ ১৮ ॥
দিগ্ঘস্তিভিঃ কনককুম্ভমুখাবসৃষ্ট– স্বর্বাহিনীবিমলচারুজলপ্লুতাঙ্গীম্ । প্রাতর্নমামি জগতাং জননীমশেষ– লোকাধিনাথগৃহিণীমমৃতাব্ধিপুত্রীম্ ॥ ১৯ ॥
কমলে কমলাক্ষবল্লভে ত্বং করুণাপূরতরঙ্গিতৈরপাঙ্গৈঃ । অবলোকয মামকিঞ্চনানাং প্রথমং পাত্রমকৃত্রিমং দযাযাঃ ॥ ২০ ॥
দেবি প্রসীদ জগদীশ্বরি লোকমাতঃ কল্যাণগাত্রি কমলেক্ষণজীবনাথে । দারিদ্র্যভীতিহৃদযং শরণাগতং মাম্– আলোকয প্রতিদিনং সদযৈরপাঙ্গৈঃ ॥ ২১ ॥
স্তুবন্তি যে স্তুতিভিরমূভিরন্বহং ত্রযীমযীং ত্রিভুবনমাতরং রমাম্ । গুণাধিকা গুরুতরভাগ্যভাগিনো ভবন্তি তে ভুবি বুধভাবিতাশযাঃ ॥ ২২ ॥
॥ ইতি শ্রীমচ্ছঙ্করাচার্যকৃতং শ্রীকনকধারাস্তোত্রং সম্পূর্ণম্ ॥
উৎস: Wikisource · CC BY-SA 4.0