মহিষাসুরমর্দিনীস্তোত্রম্ (অযি গিরিনন্দিনি)
স্তোত্র · 22টি শ্লোক
অযিগিরিনন্দিনি নন্দিতমেদিনি বিশ্ববিনোদিনি নন্দনুতে গিরিবরবিন্ধ্য-শিরোধিনিবাসিনি বিষ্ণুবিলাসিনি জিষ্ণুনুতে। ভগবতি হে শিতিকণ্ঠকুটুম্বিনি ভূরিকুটুম্বিনি ভূরিকৃতে জয জয হে মহিষাসুরমর্দিনি রম্য কপর্দিনি শৈলসুতে॥ ১ ॥
সুরবরবর্ষিণি দুর্ধরধর্ষিণি দুর্মুখমর্ষিণী হর্ষরতে ত্রিভুবনপোষিণি শংকরতোষিণি কিল্বিষমোষিণি ঘোষরতে। দনুজনিরোষিণি দিতিসুতরোষিণি দুর্মদশোষিণি সিন্ধুসুতে জয জয হে মহিষাসুরমর্দিনি রম্য কপর্দিনি শৈলসুতে॥ ২ ॥
অযি জগদম্ব মদম্ব কদম্ববনপ্রিযবাসিনি হাসরতে শিখরিশিরোমণি তুঙ্গহিমালযশৃঙ্গনিজালযমধ্যগতে। মধুমধুরে মধুকৈটভগঞ্জিনি কৈটভভঞ্জিনি রাসরতে জয জয হে মহিষাসুরমর্দিনি রম্য কপর্দিনি শৈলসুতে॥ ৩ ॥
অযি শতখণ্ডবিখণ্ডিতরুণ্ডবিতুণ্ডিতশুণ্ডগজাধিপতে রিপুগজগণ্ডবিদারণচণ্ডপরাক্রমশুণ্ডমৃগাধিপতে। নিজভুজদণ্ডনিপাতিতখণ্ডবিপাতিতমুণ্ডভটাধিপতে জয জয হে মহিষাসুরমর্দিনি রম্য কপর্দিনি শৈলসুতে॥ ৪ ॥
অযি রণদুর্মদশত্রুবধোদ্যতদুর্ধরনির্জরশক্তিভৃতে চতুরবিচারধুরীণমহাশিবদূতকৃতপ্রমথাধিপতে। দুরিতদুরীহদুরাশযদুর্মতিদানবদূতকৃতান্তমতে জয জয হে মহিষাসুরমর্দিনি রম্য কপর্দিনি শৈলসুতে॥ ৫ ॥
অযি শরণাগতবৈরিবধূবরবীরবরাভযদানকরে ত্রিভুবনমস্তকশূলবিরোধিশিরোধিকৃতামলশূলকরে। দুমিদুমিতামরদুন্দুভিনাদমহো মুখরীকৃততিগ্মকরে জয জয হে মহিষাসুরমর্দিনি রম্য কপর্দিনি শৈলসুতে॥ ৬ ॥
অযি নিজহুঙ্কৃতিমাত্রনিরাকৃতধূম্রবিলোচনধূম্রশতে সমরবিশোষিতশোণিতবীজসমুদ্ভবশোণিতবীজলতে। শিবশিবশুম্ভনিশুম্ভমহাহবতর্পিতভূতপিশাচরতে জয জয হে মহিষাসুরমর্দিনি রম্য কপর্দিনি শৈলসুতে॥ ৭ ॥
ধনুরনুসংগরণক্ষণসংগপরিস্ফুরদঙ্গনটত্কটকে কনকপিশঙ্গপৃষত্কনিষঙ্গরসদ্ভটশৃঙ্গহতাবটুকে। কৃতচতুরংগবলক্ষিতিরঙ্গঘটদ্বহুরঙ্গরটদ্বটুকে জয জয হে মহিষাসুরমর্দিনি রম্য কপর্দিনি শৈলসুতে॥ ৮ ॥
সুরললনা-ততথেযি-তথেযি-কৃতাভিনযোদর-নৃত্যরতে কৃতকুকুথঃ কুকুথো গডদাদিক-তাল-কুতূহল-গানরতে। ধুধুকুট ধুক্কুট ধিংধিমিতধ্বনিধীরমৃদঙ্গনিনাদরতে জয জয হে মহিষাসুরমর্দিনি রম্যকপর্দিনি শৈলসুতে॥ ৯ ॥
জয-জয-জপ্য-জযেজযশব্দ-পরস্তুতি-তত্পরবিশ্বনুতে ঝণ-ঝণ-ঝিঞ্ঝিমি ঝিঙ্কৃত নূপুরসিংজিতমোহিত ভূতপতে। নটিতনটার্ধ নটী নট নাযক নাটিতনাট্য সুগানরতে জয জয হে মহিষাসুরমর্দিনি রম্য কপর্দিনি শৈলসুতে॥ ১০ ॥
অযি সুমনঃ সুমনঃ সুমনঃ সুমনঃ সুমনোহরকাংতিযুতে শ্রিতরজনী-রজনীরজনী-রজনীরজনীকর-বক্ত্রবৃতে। সুনযনবিভ্রমর-ভ্রমরভ্রমর-ভ্রমরভ্রমরাধিপতে। জয জয হে মহিষাসুরমর্দিনি রম্য কপর্দিনি শৈলসুতে॥ ১১ ॥
সহিতমহাহব-মল্লমতল্লিক-মল্লিতরল্লক-মল্লরতে বিরচিতবল্লিক-পল্লিকমল্লিক-ভিল্লিকভিল্লিক-বর্গবৃতে। সিত্কৃত্পুল্লসমুল্লসিতারুণ-তল্লজ-পল্লব-সল্ললিতে জয জয হে মহিষাসুরমর্দিনি রম্য কপর্দিনি শৈলসুতে॥ ১২ ॥
অবিরলগণ্ড-গলন্মদমেদুর-মত্তমত্তংগজ-রাজপতে ত্রিভিবনভূষণভূত-কলানিধি-রূপপযোনিধি-রাজসুতে। অযি সুদতীজন-লালসমানস-মোহনমন্মথরাজসুতে জয জয হে মহিষাসুরমর্দিনি রম্য কপর্দিনি শৈলসুতে॥ ১৩ ॥
কমলদলামল-কোমলকান্তি-কলা-কলিতামল-ভাললতে সকলবিলাস-কলানিলযক্রম-কেলিচলত্কল-হংসকুলে। অলিকুলসঙ্কুল-কুবলযমণ্ডল-মৌলিমিলদ্বকুলালিকুলে জয জয হে মহিষাসুরমর্দিনি রম্য কপর্দিনি শৈলসুতে॥ ১৪ ॥
করমুরলীরব-বীজিতকূজিত-লজ্জিতকোকিল-মঞ্জুমতে মিলিতপুলিন্দ-মনোহরগুংজিত-রংজিতশৈল-নিকুঞ্জগতে। নিজগুণভূত-মহাশবরীগণ-সদ্গুণসম্ভৃত-কেলিতলে জয জয হে মহিষাসুরমর্দিনি রম্য কপর্দিনি শৈলসুতে॥ ১৫ ॥
কটিতটপীত-দুকূলবিচিত্র-মযূখতিরস্কৃত-চন্দ্ররুচে প্রণতসুরাসুর-মৌলিমণিস্ফুরদংশুল-সন্নখ-চন্দ্ররুচে। জিতকনকাচল-মৌলিপদোর্জিত-নির্ভরকুংজর-কুম্ভকুচে জয জয হে মহিষাসুরমর্দিনি রম্য কপর্দিনি শৈলসুতে॥ ১৬ ॥
বিজিতসহস্র-করৈক-সহস্র-করৈক-সহস্র-করৈকনুতে কৃতসুরতারক-সঙ্গরতারক-সঙ্গরতারক-সুনূসুতে। সুরথসমাধি-সমানসমাধি-সমাধি-সমাধি-সুজাতরতে জয জয হে মহিষাসুরমর্দিনি রম্য কপর্দিনি শৈলসুতে॥ ১৭ ॥
পদকমলং করুণানিলযে বরিবস্যতি যোনুদিনম্ স শিবে অযি কমলে কমলানিলযে কমলানিলযঃ স কথং ন ভবেত্। তব পদমেব পরম্পদমিত্যনুশীলযতো মম কিং ন শিবে জয জয হে মহিষাসুরমর্দিনি রম্য কপর্দিনি শৈলসুতে॥ ১৮ ॥
কনকলসত্কলসিন্ধু-জলৈরনু-সিঞ্চিনুতে গুণরঙ্গভুবম্ ভজতি স কিং ন শচীকুচকুম্ভতটীপরিরম্ভ-সুখানুভবম্। তবচরণং শরণঙ্করবাণি নতামরবাণিনিবাসিশিবম্ জয জয হে মহিষাসুরমর্দিনি রম্য কপর্দিনি শৈলসুতে॥ ১৯ ॥
তব বিমলেন্দুকুলং বদনেন্দুমলং সকলং ননুকূলযতে কিমু পুরুহূতপুরীন্দু-মুখী-সুমুখীভিরসৌ বিমুখীক্রিযতে। মম তু মতং শিবনামধনে ভবতী কৃপযা কিমুত ক্রিযতে জয জয হে মহিষাসুরমর্দিনি রম্য কপর্দিনি শৈলসুতে॥ ২০ ॥
অযি মযি দীন দযালুতযা কৃপযৈব ত্বযা ভবিতব্যমুমে অযি জগতো জননী কৃপযাসি যথাসি তথানুমিতাসিরতে। যদুচিতমত্র ভবত্যুররী-কুরুতাদুরুতাপমপাকুরুতে জয জয হে মহিষাসুরমর্দিনি রম্য কপর্দিনি শৈলসুতে॥ ২১ ॥
স্তুতিমিমাং স্তিমিতঃ সুসমাধিনা নিযমতো যমতোনুদিনং পঠেত্। পরমযা রমযা স নিষেব্যতে পরিজনোঽরিজনোঽপি চ তং ভজেত্ ॥
উৎস: Wikisource · CC BY-SA 4.0