মন্ত্রপুষ্পম্ (তৈত্তিরীযম্)
মন্ত্র · তৈত্তিরীয় আরণ্যক (কৃষ্ণ যজুর্বেদ) · 28টি শ্লোক
ওঁ ধাতা পুরস্তাদ্যমুদাজহার । শক্রঃ প্রবিদ্বান্প্রদিশশ্চতস্রঃ । তমেবং বিদ্বানমৃত ইহ ভবতি । নান্যঃ পন্থা অযনায বিদ্যতে ॥
ওঁ সহস্রশীর্ষং দেবং বিশ্বাক্ষং বিশ্বশম্ভুবম্ । বিশ্বং নারাযণং দেবমক্ষরং পরমং পদম্ । বিশ্বতঃ পরমান্নিত্যং বিশ্বং নারাযণগ্গ্ং হরিম্ । বিশ্বমেবেদং পুরুষস্তদ্বিশ্বমুপজীবতি ॥
পতিং বিশ্বস্যাত্মেশ্বরগ্গ্ং শাশ্বতগ্গ্ং শিবমচ্যুতম্ । নারাযণং মহাজ্ঞেযং বিশ্বাত্মানং পরাযণম্ । নারাযণঃ পরো জ্যোতিরাত্মা নারাযণঃ পরঃ । নারাযণঃ পরং ব্রহ্ম তত্ত্বং নারাযণঃ পরঃ ॥
নারাযণঃ পরো ধ্যাতা ধ্যানং নারাযণঃ পরঃ । যচ্চ কিঞ্চিজ্জগত্সর্বং দৃশ্যতে শ্রূযতেঽপি বা । অন্তর্বহিশ্চ তত্সর্বং ব্যাপ্য নারাযণস্স্থিতঃ । অনন্তমব্যযং কবিগ্গ্ং সমুদ্রেঽন্তং বিশ্বশম্ভুবম্ ॥
পদ্মকোশপ্রতীকাশগ্গ্ং হৃদযং চাপ্যধোমুখম্ । অধো নিষ্ট্যা বিতস্ত্যান্তে নাভ্যামুপরি তিষ্ঠতি । জ্বালমালাকুলং ভাতী বিশ্বস্যাযতনং মহত্ । সন্ততগ্গ্ং সিরাভিস্তু লম্বত্যাকোশসন্নিভম্ ॥
তস্যান্তে সুষিরগ্গ্ং সূক্ষ্মং তস্মিন্ সর্বং প্রতিষ্ঠিতম্ । তস্য মধ্যে মহানগ্নির্বিশ্বার্চির্বিশ্বতোমুখঃ । সোঽগ্রভুগ্বিভজন্তিষ্ঠন্নাহারমজরঃ কবিঃ । তির্যগূর্ধ্বমধশ্শাযী রশ্মযস্তস্য সন্ততা ॥
সন্তাপযতি স্বং দেহমাপাদতলমস্তকঃ । তস্য মধ্যে বহ্নিশিখা অণীযোর্ধ্বা ব্যবস্থিতা । নীলতোযদমধ্যস্থা বিদ্যুল্লেখেব ভাস্বরা । নীবারশূকবত্তন্বী পীতা ভাস্বত্যণূপমা ॥
তস্যাশ্শিখাযা মধ্যে পরমাত্মা ব্যবস্থিতঃ । স ব্রহ্ম স শিবস্স হরিস্সেন্দ্রস্সোঽক্ষরঃ পরমঃ স্বরাট্ ॥
যোঽপাং পুষ্পং বেদ । পুষ্পবান্প্রজাবান্পশুমান্ভবতি । চন্দ্রমা বা অপাং পুষ্পম্ । পুষ্পবান্প্রজাবান্পশুমান্ভবতি । য এবং বেদ ॥
যোঽপামাযতনং বেদ । আযতনবান্ভবতি । অগ্নির্বা অপামাযতনম্ । আযতনবান্ভবতি । যোঽগ্নেরাযতনং বেদ । আযতনবান্ভবতি । আপো বা অগ্নেরাযতনম্ । আযতনবান্ভবতি । য এবং বেদ ॥
যোঽপামাযতনং বেদ । আযতনবান্ভবতি । বাযুর্বা অপামাযতনম্ । আযতনবান্ভবতি । যো বাযোরাযতনং বেদ । আযতনবান্ভবতি । আপো বৈ বাযোরাযতনম্ । আযতনবান্ভবতি । য এবং বেদ ॥
যোঽপামাযতনং বেদ । আযতনবান্ভবতি । অসৌ বৈ তপন্নপামাযতনম্ । আযতনবান্ভবতি । যোঽমুষ্য তপত আযতনং বেদ । আযতনবান্ভবতি । আপো বা অমুষ্য তপত আযতনম্ । আযতনবান্ভবতি । য এবং বেদ ॥
যোঽপামাযতনং বেদ । আযতনবান্ভবতি । চন্দ্রমা বা অপামাযতনম্ । আযতনবান্ভবতি । যশ্চন্দ্রমস আযতনং বেদ । আযতনবান্ভবতি । আপো বৈ চন্দ্রমস আযতনম্ । আযতনবান্ভবতি । য এবং বেদ ॥
যোঽপামাযতনং বেদ । আযতনবান্ভবতি । নক্ষত্রাণি বা অপামাযতনম্ । আযতনবান্ভবতি । যো নক্ষত্রাণামাযতনং বেদ । আযতনবান্ভবতি । আপো বৈ নক্ষত্রাণামাযতনম্ । আযতনবান্ভবতি । য এবং বেদ ॥
যোঽপামাযতনং বেদ । আযতনবান্ভবতি । পর্জন্যো বা অপামাযতনম্ । আযতনবান্ভবতি । যঃ পর্জন্যস্যাযতনং বেদ । আযতনবান্ভবতি । আপো বৈ পর্জন্যস্যাযতনম্ । আযতনবান্ভবতি । য এবং বেদ ॥
যোঽপামাযতনং বেদ । আযতনবান্ভবতি । সংবত্সরো বা অপামাযতনম্ । আযতনবান্ভবতি । যস্সংবত্সরস্যাযতনং বেদ । আযতনবান্ভবতি । আপো বৈ সংবত্সরস্যাযতনম্ । আযতনবান্ভবতি । য এবং বেদ ॥
যোঽপ্সু নাবং প্রতিষ্ঠিতাং বেদ । প্রত্যেব তিষ্ঠতি ॥
কিং তদ্বিষ্ণোর্বলমাহুঃ । কা দীপ্তিঃ কিং পরাযণম্ । একো যদ্ধারযদ্দেবঃ । রেজতী রোদসী উভে । বাতাদ্বিষ্ণোর্বলমাহুঃ । অক্ষরাদ্দীপ্তিরুচ্যতে । ত্রিপদাদ্ধারযদ্দেবঃ । যদ্বিষ্ণোরেকমুত্তমম্ ॥
রাজাধিরাজায প্রসহ্যসাহিনে । নমো বযং বৈশ্রবণায কুর্মহে । স মে কামান্কামকামায মহ্যম্ । কামেশ্বরো বৈশ্রবণো দদাতু । কুবেরায বৈশ্রবণায । মহারাজায নমঃ ॥
ওং তদ্ব্রহ্ম । ওং তদ্বাযুঃ । ওং তদাত্মা । ওং তত্সত্যম্ । ওং তত্সর্বম্ । ওং তত্পুরোর্নমঃ ॥
অন্তশ্চরতি ভূতেষু গুহাযাং বিশ্বমূর্তিষু । ত্বং যজ্ঞস্ত্বং বষট্কারস্ত্বমিন্দ্রস্ত্বগ্গ্ং রুদ্রস্ত্বং বিষ্ণুস্ত্বং ব্রহ্ম ত্বং প্রজাপতিঃ । ত্বং তদাপ আপো জ্যোতী রসোঽমৃতং ব্রহ্ম ভূর্ভুবস্সুবরোম্ ॥
ঈশানস্সর্ববিদ্যানামীশ্বরস্সর্বভূতানাং । ব্রহ্মাধিপতির্ব্রহ্মণোঽধিপতির্ব্রহ্মা শিবো মে অস্তু সদাশিবোম্ ॥
তদ্বিষ্ণোঃ পরমং পদগ্গ্ং সদা পশ্যন্তি সূরযঃ । দিবীব চক্ষুরাততম্ । তদ্বিপ্রাসো বিপন্যবো জাগৃবাগ্গ্ংসস্সমিন্ধতে । বিষ্ণোর্যত্পরমং পদম্ ॥
ঋতগ্গ্ং সত্যং পরং ব্রহ্ম পুরুষং কৃষ্ণপিঙ্গলম্ । ঊর্ধ্বরেতং বিরূপাক্ষং বিশ্বরূপায বৈ নমো নমঃ ॥
ওঁ নারাযণায বিদ্মহে বাসুদেবায ধীমহি । তন্নো বিষ্ণুঃ প্রচোদযাত্ ॥
মহাদেব্যৈ চ বিদ্মহে বিষ্ণুপত্নী চ ধীমহি । তন্নো লক্ষ্মীঃ প্রচোদযাত্ ॥
আকাশাত্পতিতং তোযং যথা গচ্ছতি সাগরম্ । সর্বদেবনমস্কারঃ কেশবং প্রতিগচ্ছতি ॥
ওঁ শান্তিশ্শান্তিশ্শান্তিঃ ॥
উৎস: Wikisource · CC BY-SA 4.0