॥ অথ নবগ্রহস্তোত্রম্ ॥
॥ রবিঃ ॥
জপাকুসুমসঙ্কাশং কাশ্যপেযং মহাদ্যুতিম্। তমোঽরিং সর্বপাপঘ্নং প্রণতোঽস্মি দিবাকরম্॥ ১ ॥
॥ সোমঃ ॥
দধিশঙ্খতুষারাভং ক্ষীরোদার্ণবসম্ভবম্। নমামি শশিনং সোমং শম্ভোর্মুকুটভূষণম্॥ ২ ॥
॥ মঙ্গলঃ ॥
ধরণীগর্ভসম্ভূতং বিদ্যুত্কান্তিসমপ্রভম্। কুমারং শক্তিহস্তং তং মঙ্গলং প্রণমাম্যহম্॥ ৩ ॥
॥ বুধঃ ॥
প্রিযঙ্গুকলিকাশ্যামং রূপেণাপ্রতিমং বুধম্। সৌম্যং সৌম্যগুণোপেতং তং বুধং প্রণমাম্যহম্॥ ৪ ॥
॥ গুরুঃ ॥
দেবানাং চ ঋষীণাং চ গুরুং কাঞ্চনসন্নিভম্। বুদ্ধিভূতং ত্রিলোকেশং তং নমামি বৃহস্পতিম্॥ ৫ ॥
॥ শুক্রঃ ॥
হিমকুন্দমৃণালাভং দৈত্যানাং পরমং গুরুম্। সর্বশাস্ত্রপ্রবক্তারং ভার্গবং প্রণমাম্যহম্॥ ৬ ॥
॥ শনিঃ ॥
নীলাঞ্জনসমাভাসং রবিপুত্রং যমাগ্রজম্। ছাযামার্তণ্ডসম্ভূতং তং নমামি শনৈশ্চরম্॥ ৭ ॥
॥ রাহুঃ ॥
অর্ধকাযং মহাবীর্যং চন্দ্রাদিত্যবিমর্দনম্। সিংহিকাগর্ভসংভূতং তং রাহুং প্রণমাম্যহম্॥ ৮ ॥
॥ কেতুঃ ॥
পলাশপুষ্পসঙ্কাশং তারকাগ্রহমস্তকম্। রৌদ্রং রৌদ্রাত্মকং ঘোরং তং কেতুং প্রণমাম্যহম্॥ ৯ ॥
॥ ফলশ্রুতিঃ ॥
ইতি ব্যাসমুখোদ্গীতং যঃ পঠেত্সুসমাহিতঃ। দিবা বা যদি বা রাত্রৌ বিঘ্নশান্তির্ভবিষ্যতি॥
নরনারীনৃপাণাং চ ভবেদ্দুঃস্বপ্ননাশনম্। ঐশ্বর্যমতুলং তেষামারোগ্যং পুষ্টিবর্ধনম্॥
গ্রহনক্ষত্রজাঃ পীডাস্তস্করাগ্নিসমুদ্ভবাঃ। তাঃ সর্বাঃ প্রশমং যান্তি ব্যাসো ব্রূতে ন সংশযঃ॥
॥ ইতি শ্রীব্যাসবিরচিতম্ আদিত্যাদিনবগ্রহস্তোত্রং সম্পূর্ণম্ ॥
উৎস: Wikisource · CC BY-SA 4.0