পুরুষসূক্তম্ (ঋগ্বেদঃ)
বৈদিক সূক্ত · তৈত্তিরীয় আরণ্যক (কৃষ্ণ যজুর্বেদ) · 24টি শ্লোক
সহস্রশীর্ষা পুরুষঃ । সহস্রাক্ষঃ সহস্রপাত্ । স ভূমিং বিশ্বতো বৃত্বা । অত্যতিষ্ঠদ্দশাঙ্গুলম্
পুরুষ এবেদগ্ং সর্বম্ । যদ্ভূতং যচ্চ ভব্যম্ । উতামৃতত্বস্যেশানঃ । যদন্নেনাতিরোহতি
এতাবানস্য মহিমা । অতো জ্যাযাগ্ংশ্চ পূরুষঃ । পাদোঽস্য বিশ্বা ভূতানি । ত্রিপাদস্যামৃতং দিবি
ত্রিপাদূর্ধ্ব উদৈত্পুরুষঃ । পাদোঽস্যেহাঽভবাত্পুনঃ । ততো বিষ্বঙ্ব্যক্রামত্ । সাশনানশনে অভি
তস্মাদ্বিরাডজাযত । বিরাজো অধি পূরুষঃ । স জাতো অত্যরিচ্যত । পশ্চাদ্ভূমিমথো পুরঃ
যত্পুরুষেণ হবিষা । দেবা যজ্ঞমতন্বত । বসন্তো অস্যাঽঽসীদাজ্যম্ । গ্রীষ্ম ইধ্মঃ শরদ্ধবিঃ
সপ্তাস্যাঽঽসন্পরিধযঃ । ত্রিঃসপ্ত সমিধঃ কৃতাঃ । দেবা যদ্যজ্ঞং তন্বানাঃ । অবধ্নন্পুরুষং পশুম্
তং যজ্ঞং বর্হিষি প্রৌক্ষন্ । পুরুষং জাতমগ্রতঃ । তেন দেবা অযজন্ত । সাধ্যা ঋষযশ্চ যে
তস্মাদ্যজ্ঞাত্সর্বহুতঃ । সংভৃতং পৃষদাজ্যম্ । পশূগ্ংস্তাগ্ংশ্চক্রে বাযব্যান্ । আরণ্যান্গ্রাম্যাশ্চ যে
তস্মাদ্যজ্ঞাত্সর্বহুতঃ । ঋচঃ সামানি জজ্ঞিরে । ছন্দাগ্ংসি জজ্ঞিরে তস্মাত্ । যজুস্তস্মাদজাযত
তস্মাদশ্বা অজাযন্ত । যে কে চোভযাদতঃ । গাবো হ জজ্ঞিরে তস্মাত্ । তস্মাজ্জাতা অজাবযঃ
যত্পুরুষং ব্যদধুঃ । কতিধা ব্যকল্পযন্ । মুখং কিমস্য কৌ বাহূ । কাবূরূ পাদাবুচ্যেতে
ব্রাহ্মণোঽস্য মুখমাসীত্ । বাহূ রাজন্যঃ কৃতঃ । ঊরূ তদস্য যদ্বৈশ্যঃ । পদ্ভ্যাম্ শূদ্রো অজাযত
চন্দ্রমা মনসো জাতঃ । চক্ষোঃ সূর্যো অজাযত । মুখাদিন্দ্রশ্চাগ্নিশ্চ । প্রাণাদ্বাযুরজাযত
নাভ্যা আসীদন্তরিক্ষম্ । শীর্ষ্ণো দ্যৌঃ সমবর্তত । পদ্ভ্যাং ভূমির্দিশঃ শ্রোত্রাত্ । তথা লোকাগ্ং অকল্পযন্
বেদাহমেতং পুরুষং মহান্তম্ । আদিত্যবর্ণং তমসস্তু পারে । সর্বাণি রূপাণি বিচিত্য ধীরঃ । নামানি কৃত্বাঽভিবদন্যদাস্তে
ধাতা পুরস্তাদ্যমুদাজহার । শক্রঃ প্রবিদ্বান্প্রদিশশ্চতস্রঃ । তমেবং বিদ্বানমৃতং ইহ ভবতি । নান্যঃ পন্থা অযনায বিদ্যতে
যজ্ঞেন যজ্ঞমযজন্ত দেবাঃ । তানি ধর্মাণি প্রথমান্যাসন্ । তে হ নাকং মহিমানঃ সচন্তে । যত্র পূর্বে সাধ্যাঃ সন্তি দেবাঃ
অদ্ভ্যঃ সংভূতঃ পৃথিব্যৈ রসাচ্চ । বিশ্বকর্মণঃ সমবর্ততাধি । তস্য ত্বষ্টা বিদধদ্রূপমেতি । তত্পুরুষস্য বিশ্বমাজানমগ্রে
বেদাহমেতং পুরুষং মহান্তম্ । আদিত্যবর্ণং তমসঃ পরস্তাত্ । তমেবং বিদ্বানমৃত ইহ ভবতি । নান্যঃ পন্থা বিদ্যতেঽযনায
প্রজাপতিশ্চরতি গর্ভে অন্তঃ । অজাযমানো বহুধা বিজাযতে । তস্য ধীরাঃ পরিজানন্তি যোনিম্ । মরীচীনাং পদমিচ্ছন্তি বেধসঃ
যো দেবেভ্য আতপতি । যো দেবানাং পুরোহিতঃ । পূর্বো যো দেবেভ্যো জাতঃ । নমো রুচায ব্রাহ্মযে
রুচং ব্রাহ্মং জনযন্তঃ । দেবা অগ্রে তদব্রুবন্ । যস্ত্বৈবং ব্রাহ্মণো বিদ্যাত্ । তস্য দেবা অসন্বশে
হ্রীশ্চ তে লক্ষ্মীশ্চ পত্ন্যৌ । অহোরাত্রে পার্শ্বে । নক্ষত্রাণি রূপম্ । অশ্বিনৌ ব্যাত্তম্ । ইষ্টং মনিষাণ । অমুং মনিষাণ । সর্বং মনিষাণ
পুরুষসূক্তম্ (ঋগ্বেদঃ) (ঋগ্বেদ)
উৎস: Wikisource · CC BY-SA 4.0