হোম › বেদ মন্ত্র › শ্রীরামরক্ষাস্তোত্রম্

শ্রীরামরক্ষাস্তোত্রম্

স্তোত্র · 45টি শ্লোক

অস্য শ্রীরামরক্ষাস্তোত্রমন্ত্রস্য । বুধকৌশিকঋষিঃ । শ্রীসীতারামচন্দ্রো দেবতা । অনুষ্টুপ্ ছ্ন্দঃ । সীতা শক্তিঃ । শ্রীমদ্ হনুমান্ কীলকম্ । শ্রীরামচন্দ্রপ্রীত্যর্থে জপে বিনিযোগঃ । অথ ধ্যানম্ । ধ্যাযেদাজানুবাহুং ধৃতশরধনুষং । বদ্ধপদ্মাসনস্থম্ । পীতং বাসো বসানং নবকমলদলস্পর্ধিনেত্রং প্রসন্নম্ । বামাঙ্কারূঢসীতামুখকমলমিলল্লোচনং নীরদাভম্ । নানালঙ্কারদীপ্তং দধতমুরুজটামণ্ডনং রামচন্দ্রম্ ॥

ইতি ধ্যানম্ । চরিতং রঘুনাথস্য শতকোটিপ্রবিস্তরম্ । একৈকমক্ষরং পুংসাং মহাপাতকনাশনম্ ॥ ১ ॥

ধ্যাত্বা নীলোত্পলশ্যামং রামং রাজীবলোচনম্ । জানকীলক্ষ্মণোপেতং জটামুকুটমণ্ডিতম্ ॥ ২ ॥

সাসিতূণধনুর্বাণপাণিং নক্তংচরান্তকম্ । স্বলীলযা জগত্ত্রাতুমাবির্ভূতমজং বিভুম্ ॥ ৩ ॥

রামরক্ষাম্ পঠেত্ প্রাজ্ঞঃ পাপঘ্নীং সর্বকামদাম্ । শিরো মে রাঘবঃ পাতু ভালং দশরথাত্মজঃ ॥ ৪ ॥

কৌসল্যেযো দৃশৌ পাতু বিশ্বামিত্রপ্রিযঃ শ্রুতী । ঘ্রাণং পাতু মখত্রাতা মুখং সৌমিত্রিবত্সলঃ ॥ ৫ ॥

জিহ্বাং বিদ্যানিধিঃ পাতু কণ্ঠং ভরতবন্দিতঃ । স্কন্ধৌ দিব্যাযুধঃ পাতু ভুজৌ ভগ্নেশকার্মুকঃ ॥ ৬ ॥

করৌ সীতাপতিঃ পাতু হৃদযং জামদগ্ন্যজিত্ । মধ্যং পাতু খরধ্বংসী নাভিং জাম্ববদাশ্রযঃ ॥ ৭ ॥

সুগ্রীবেশঃ কটী পাতু সক্থিনী হনুমত্প্রভুঃ । ঊরূ রঘূত্তমঃ পাতু রক্ষঃকুলবিনাশকৃত্ ॥ ৮ ॥

জানুনী সেতুকৃত্ পাতু জঙ্ঘে দশমুখান্তকঃ । পাদৌ বিভীষণশ্রীদঃ পাতু রামোঽখিলং বপুঃ ॥ ৯ ॥

এতাং রামবলোপেতাং রক্ষাং যঃ সুকৃতী পঠেত্ । স চিরাযুঃ সুখী পুত্রী বিজযী বিনযী ভবেত্ ॥ ১০ ॥

পাতালভূতলব্যোম চারিণশ্ছদ্মচারিণঃ । ন দ্রষ্টুমপি শক্তাস্তে রক্ষিতং রামনামভিঃ ॥ ১১ ॥

রামেতি রামভদ্রেতি রামচন্দ্রেতি বা স্মরন্ । নরো ন লিপ্যতে পাপৈর্ভুক্তিং মুক্তিং চ বিন্দতি ॥ ১২ ॥

জগজ্জৈত্রেকমন্ত্রেণ রামনাম্নাভিরক্ষিতম্ । যঃ কন্ঠে ধারযেত্তস্য করস্থাঃ সর্বসিধ্দযঃ ॥ ১৩ ॥

বজ্রপঞ্জরনামেদমং যো রামকবচং স্মরেত্ । অব্যাহতাজ্ঞঃ সর্বত্র লভতে জযমঙ্গলম্ ॥ ১৪ ॥

আদিষ্টবান্ যথা স্বপ্নে রামরক্ষামিমাং হরঃ । তথা লিখিতবান্ প্রাতঃ প্রবুদ্ধো বুধকৌশিকঃ ॥ ১৫ ॥

আরামঃ কল্পবৃক্ষাণাং বিরামঃ সকলাপদাম্ । অভিরামস্ত্রিলোকানাং রামঃ শ্রীমান্ স নঃ প্রভুঃ ॥ ১৬ ॥

তরুণৌ রূপসংপন্নৌ সুকুমারৌ মহাবলৌ । পুণ্ডরীক বিশালাক্ষৌ চীরকৃষ্ণাজিনাম্বরৌ ॥ ১৭ ॥

ফলমূলাশিনৌ দান্তৌ তাপসৌ ব্রহ্মচারিণৌ । পুত্রৌ দশরথস্যৈতৌ ভ্রাতরৌ রামলক্ষ্মণৌ ॥ ১৮ ॥

শরণ্যৌ সর্বসত্বানাং শ্রেষ্ঠৌ সর্বধনুষ্মতাম্ । রক্ষঃ কুলনিহন্তারৌ ত্রাযেতাং নো রঘূত্তমৌ ॥ ১৯ ॥

আত্তসজ্জধনুষাবিষুস্পৃশাবক্ষযাশুগনিষঙ্গসঙ্গিনৌ । রক্ষণায মম্ রামলক্ষ্মণাবগ্রতঃ পথি সদৈব গচ্ছতাম্ ॥ ২০ ॥

সংনদ্ধঃ কবচী খড্গী চাপবাণধরো যুবা । গচ্ছন্ মনোরথোঽস্মাকং রামঃ পাতু সলক্ষ্মণঃ ॥ ২১ ॥

রামো দাশরথিঃ শূরো লক্ষ্মণানুচরো বলী । কাকুত্স্থঃ পুরুষঃ পূর্ণঃ কৌসল্যেযো রঘূত্তমঃ ॥ ২২ ॥

বেদান্তবেদ্যো যজ্ঞেশঃ পুরাণপুরুষোত্তমঃ । জানকীবল্লভঃ শ্রীমানপ্রমেযপরাক্রমঃ ॥ ২৩ ॥

ইত্যেতানি জপেন্নিত্যং মদ্ভক্তঃ শ্রদ্ধযান্বিতঃ । অশ্বমেধাধিকং পুণ্যং সম্প্রাপ্নোতি ন সংশযঃ ॥ ২৪ ॥

রামংদূর্বাদলশ্যামং পদ্মাক্ষং পীতবাসসম্ । স্তুবন্তি নামভির্দিব্যৈর্ন তে সংসারিণো নরঃ ॥ ২৫ ॥

রামং লক্ষ্মণপূর্বজম্ রঘুবরং সীতাপতিং সুন্দরম্ । কাকুত্স্থং করুণার্ণবং গুণনিধিং বিপ্রপ্রিযং ধার্মিকম্ ॥

রাজেন্দ্রং সত্যসন্ধং দশরথতনযং শ্যামলং শান্তমূর্তিম্ । বন্দে লোকাভিরামং রঘুকুলতিলকম্ রাঘবং রাবণারিম্ ॥ ২৬ ॥

রামায রামভদ্রায রামচন্দ্রায বেধসে । রঘুনাথায নাথায সীতাযাঃ পতযে নমঃ ॥ ২৭ ॥

শ্রীরাম রাম রঘুনন্দন রাম রাম । শ্রীরাম রাম ভরতাগ্রজ রাম রাম ॥

শ্রীরাম রাম রণকর্কশ রাম রাম । শ্রীরাম রাম শরণং ভব রাম রাম ॥ ২৮ ॥

শ্রীরামচন্দ্রচরণৌ মনসা স্মরামি । শ্রীরামচন্দ্রচরণৌ বচসা গৃণামি ॥

শ্রীরামচন্দ্রচরণৌ শিরসা নমামি । শ্রীরামচন্দ্রচরণৌ শরণং প্রপদ্যে ॥ ২৯ ॥

মাতা রামো মত্পিতা রামচন্দ্রঃ । স্বামী রামো মত্সখা রামচন্দ্রঃ ॥

সর্বস্বং মে রামচন্দ্রো দযালুঃ । নান্যং জানে নৈব জানে ন জানে ॥ ৩০ ॥

দক্ষিণে লক্ষ্মণো যস্য বামে তু জনকাত্মজা । পুরতো মারুতির্যস্য তং বন্দে রঘুনন্দনম্ ॥ ৩১ ॥

লোকাভিরামং রণরঙ্গধীরং রাজীবনেত্রং রঘুবংশনাথম্ । কারুণ্যরূপং করুণাকরং তং শ্রীরামচন্দ্রং শরণং প্রপদ্যে ॥ ৩২ ॥

মনোজবং মারুততুল্যবেগং জিতেন্দ্রিযং বুদ্ধিমতাং বরিষ্ঠম্ । বাতাত্মজং বানরযূথমুখ্যং শ্রীরামদূতং শরণং প্রপদ্যে ॥ ৩৩ ॥

কূজন্তং রামরামেতি মধুরং মধুরাক্ষরম্ । আরুহ্য কবিতাশাখাং বন্দে বাল্মীকিকোকিলম্ ॥ ৩৪ ॥

আপদামপহর্তারং দাতারং সর্বসংপদাম্ । লোকাভিরামং শ্রীরামং ভূযো ভূযো নমাম্যহম্ ॥ ৩৫ ॥

ভর্জনং ভববীজানামর্জনং সুখসংপদাম্ । তর্জনং যমদূতানাং রামরামেতি গর্জনম্ ॥ ৩৬ ॥

রামো রাজমণিঃ সদা বিজযতে রামং রমেশং ভজে । রামেণাভিহতা নিশাচরচমূ রামায তস্মৈ নমঃ ॥

রামান্নাস্তি পরাযণং পরতরং রামস্য দাসোঽস্ম্যহম্ । রামে চিত্তলযঃ সদা ভবতু মে ভো রাম মামুদ্ধর ॥ ৩৭ ॥

রামরামেতি রামেতি রমে রামে মনোরমে । সহস্ত্রনামতত্তুল্যং রামনাম বরাননে ॥ ৩৮ ॥

ইতি শ্রীবুধকৌশিকবিরচিতং শ্রীরামরক্ষাস্ত্রোত্রং সম্পূর্ণম্ ।

উৎস: Wikisource · CC BY-SA 4.0

আপনার মতামত পাঠান

কী উন্নত করা দরকার, কী ভুল আছে, বা আপনার কী ভালো লেগেছে জানান। আমরা প্রতিটি বার্তা পড়ি।

কী বিষয়ে
শঙ্খ আপনার কাছে কতটা উপকারী? (ঐচ্ছিক)