॥ অথ শিবপঞ্চাক্ষরস্তোত্রম্ ॥
নাগেন্দ্রহারায বিলোচনায ভস্মাঙ্গরাগায মহেশ্বরায । নিত্যায শুদ্ধায দিগম্বরায তস্মৈ নকারায নমঃ শিবায ॥
মন্দাকিনীসলিলচন্দনচর্চিতায নন্দীশ্বরপ্রমথনাথমহেশ্বরায । মন্দারমুখ্যবহুপুষ্পসুপূজিতায তস্মৈ মকারায নমঃ শিবায ॥
শিবায গৌরীবদনাব্জবৃন্দ- সূর্যায দক্ষাধ্বরনাশকায । শ্রীনীলকণ্ঠায বৃষধ্বজায তস্মৈ শিকারায নমঃ শিবায ॥
বসিষ্ঠকুম্ভোদ্ভবগৌতমার্য- মুনীন্দ্রদেবার্চিতশেখরায। চন্দ্রার্কবৈশ্বানরলোচনায তস্মৈ বকারায নমঃ শিবায ॥
যক্ষস্বরূপায জটাঘরায পিনাকহস্তায সনাতনায । দিব্যায দেবায দিগম্বরায তস্মৈ যকারায নমঃ শিবায ॥
পঞ্চাক্ষরমিদং পুণ্যং যঃ পঠেচ্ছিবসন্নিধৌ । শিবলোকমবাপ্নোতি শিবেন সহ মোদতে ॥
॥ ইতি শ্রীমচ্ছঙ্করাচার্যবিরচিতং শিবপঞ্চাক্ষরস্তোত্রং সম্পূর্ণম্ ॥
উৎস: Wikisource · CC BY-SA 4.0