॥অথ সুসংশুদ্ধং রাবণকৃতশিবতাণ্ডবস্তোত্রম্॥
॥শ্রীগণেশায নমঃ॥
জটাঽটবীগলজ্জলপ্রবাহপাবিতস্থলে গলেঽবলম্ব্য লম্বিতাং ভুজঙ্গতুঙ্গমালিকাম্। ডমড্ডমড্ডমড্ডমন্নিনাদবড্ডমর্বযং চকার চণ্ডতাণ্ডবং তনোতু নঃ শিবঃ শিবম্ ॥ ১ ॥
জটাকটাহসম্ভ্রমভ্রমন্নিলিম্পনির্ঝরীবিলোলবীচিবল্লরীবিরাজমানমূর্দ্ধনি। ধগদ্ধগদ্ধগজ্জ্বলল্ললাটপট্টপাবকে কিশোরচন্দ্রশেখরে রতিঃ প্রতিক্ষণং মম ॥ ২ ॥
ধরাধরেন্দ্রনন্দিনীবিলাসবন্ধুবন্ধুরস্ফুরদ্দিগন্তসন্ততিপ্রমোদমানমানসে। কৃপাকটাক্ষধোরণীনিরুদ্ধদুর্ধরাপদি ক্বচিদ্দিগম্বরে মনো বিনোদমেতু বস্তুনি ॥ ৩ ॥
জটাভুজঙ্গপিঙ্গলস্ফুরত্ফণামণিপ্রভাকদম্বকুঙ্কুমদ্রবপ্রলিপ্তদিগ্বধূমুখে। মদান্ধসিন্ধুরাসুরত্বগুত্তরীযমেদুরে মনো বিনোদমদ্ভুতং বিভর্তু ভূতভর্তরি ॥ ৪ ॥
সহস্রলোচনপ্রভৃত্যশেষলেখশেখরপ্রসূনধূলিধোরণীবিধূসরাঙ্ঘ্রিপীঠভূঃ। ভুজঙ্গরাজমালযা নিবদ্ধজাটজূটকঃ শ্রিযে চিরায জাযতাং চকোরবন্ধুশেখরঃ ॥ ৫ ॥
ললাটচত্বরজ্বলদ্ধনঞ্জযস্ফুলিঙ্গভানিপীতপঞ্চসাযকং নমন্নিলিম্পনাযকম্। সুধামযূখলেখযা বিরাজমানশেখরং মহঃ কপালি সম্পদে সরিজ্জটালমস্তু নঃ ॥ ৬ ॥
করালভালপট্টিকাধগদ্ধগদ্ধগজ্জ্বলদ্ধনঞ্জযাহুতীকৃতপ্রচণ্ডপঞ্চসাযকে। ধরাধরেন্দ্রনন্দিনীকুচাগ্রচিত্রপত্রকপ্রকল্পনৈকশিল্পিনি ত্রিলোচনে রতির্মম ॥ ৭ ॥
নবীনমেঘমণ্ডলীনিরুদ্ধদুর্ধরস্ফুরত্কুহূনিশীথিনীতমঃপ্রবন্ধবদ্ধকন্ধরঃ। নিলিম্পনির্ঝরীধরস্তনোতু কৃত্তিসিন্ধুরঃ কলানিধানবন্ধুরঃ শ্রিযং জগদ্ধুরন্ধরঃ ॥ ৮ ॥
প্রফুল্লনীলপঙ্কজপ্রপঞ্চকালিমপ্রভাঽবলম্বিকণ্ঠকন্দলীরুচিপ্রবদ্ধকন্ধরম্। স্মরচ্ছিদং পুরচ্ছিদং ভবচ্ছিদং মখচ্ছিদং গজচ্ছিদান্ধকচ্ছিদং তমন্তকচ্ছিদং ভজে ॥ ৯ ॥
অখর্বসর্বমঙ্গলাকলাকদম্বমঞ্জরীরসপ্রবাহমাধুরীবিজৃম্ভণামধুব্রতম্। স্মরান্তকং পুরান্তকং ভবান্তকং মখান্তকং গজান্তকান্ধকান্তকং তমন্তকান্তকং ভজে ॥ ১০ ॥
জযত্বদভ্রবিভ্রমভ্রমদ্ভুজঙ্গমশ্বসদ্বিনির্গমত্ক্রমস্ফুরত্করালভালহব্যবাট্। ধিমিদ্ধিমিদ্ধিমিদ্ধ্বনন্মৃদঙ্গতুঙ্গমঙ্গলধ্বনিক্রমপ্রবর্তিতপ্রচণ্ডতাণ্ডবঃ শিবঃ ॥ ১১ ॥
দৃষদ্বিচিত্রতল্পযোর্ভুজঙ্গমৌক্তিকস্রজোর্গরিষ্ঠরত্নলোষ্ঠযোঃ সুহৃদ্বিপক্ষপক্ষযোঃ। তৃণারবিন্দচক্ষুষোঃ প্রজামহীমহেন্দ্রযোঃ সমপ্রবৃত্তিকঃ কদা সদাশিবং ভজাম্যহম্ ॥ ১২ ॥
কদা নিলিম্পনির্ঝরীনিকুঞ্জকোটরে বসন্ বিমুক্তদুর্মতিঃ সদা শিরঃস্থমঞ্জলিং বহন্। বিমুক্তলোললোচনাললামভাললগ্নকং শিবেতি মন্ত্রমুচ্চরন্ কদা সুখী ভবাম্যহম্ ॥ ১৩ ॥
নিলিম্পনাথনাগরীকদম্বমৌলমল্লিকানিগুম্ফনির্ভরক্ষরন্মধূষ্ণিকামনোহরঃ। তনোতু নো মনোমুদং বিনোদিনীমহর্নিশং পরশ্রিযঃ পরং পদং তদঙ্গজত্বিষাং চযঃ ॥ ১৪ ॥
প্রচণ্ডবাডবানলপ্রভাশুভপ্রচারণী মহাষ্টসিদ্ধিকামিনীজনাঽবহূতজল্পনা। বিমুক্তবামলোচনাবিবাহকালিকধ্বনিঃ শিবেতি মন্ত্রভূষণা জগজ্জযায জাযতাম্ ॥ ১৫ ॥
ইমং হি নিত্যমেবমুক্তমুত্তমোত্তমং স্তবং পঠন্স্মরন্ব্রুবন্নরো বিশুদ্ধিমেতিসন্ততম্। হরে গুরৌ সুভক্তিমাশু যাতি নাঽন্যথা গতিং বিমোহনং হি দেহিনাং সুশঙ্করস্য চিন্তনম্ ॥ ১৬ ॥
পূজাবসানসমযে দশবক্ত্রগীতং যঃ শম্ভুপূজনপরং পঠতি প্রদোষে। তস্য স্থিরাং রথগজেন্দ্রতুরঙ্গযুক্তাং লক্ষ্মীং প্রসাদসমযে প্রদদাতি শম্ভুঃ ॥
॥ ইতি রাবণকৃতং শিবতাণ্ডবস্তোত্রং সম্পূর্ণম্ ॥
উৎস: Wikisource · CC BY-SA 4.0