હોમ › વેદ મંત્રો › કનકધારાસ્તોત્રમ્

કનકધારાસ્તોત્રમ્

સ્તોત્રો · 24 શ્લોક

॥ શ્રીકનકધારાસ્તોત્રમ્ ॥

અંગં હરેઃ પુલકભૂષણમાશ્રયન્તી ભૃંગાંગનેવ મુકુલાભરણં તમાલમ્ । અંગીકૃતાખિલવિભૂતિરપાંગલીલા માંગલ્યદાઽસ્તુ મમ મંગલદેવતાયાઃ ॥ ૧ ॥

મુગ્ધા મુહુર્વિદધતી વદને મુરારેઃ પ્રેમત્રપાપ્રણિહિતાનિ ગતાગતાનિ । માલા દૃશોર્મધુકરીવ મહોત્પલે યા સા મે શ્રિયં દિશતુ સાગરસમ્ભવાયાઃ ॥ ૨ ॥

આમીલિતાક્ષમધિગમ્ય મુદા મુકુન્દમ્– આનન્દકન્દમનિમેષમનંગતન્ત્રમ્। આકેકરસ્થિતકનીનિકપક્ષ્મનેત્રં ભૂત્યૈ ભવેન્મમ ભુજંગશયાંગનાયાઃ ॥ ૩ ॥

બાહ્વન્તરે મધુજિતઃ શ્રિતકૌસ્તુભે યા હારાવલીવ હરિનીલમયી વિભાતિ । કામપ્રદા ભગવતોઽપિ કટાક્ષમાલા કલ્યાણમાવહતુ મે કમલાલયાયાઃ ॥ ૪ ॥

કાલામ્બુદાલિલલિતોરસિ કૈટભારેર્– ધારાધરે સ્ફુરતિ યા તડિદંગનેવ । માતુઃ સમસ્તજગતાં મહનીયમૂર્તિર્– ભદ્રાણિ મે દિશતુ ભાર્ગવનન્દનાયાઃ ॥ ૫ ॥

પ્રાપ્તં પદં પ્રથમતઃ ખલુ યત્પ્રભાવાન્– માંગલ્યભાજિ મધુમાથિનિ મન્મથેન । મય્યાપતેત્તદિહ મન્થરમીક્ષણાર્ધં મન્દાલસં ચ મકરાલયકન્યકાયાઃ ॥ ૬ ॥

વિશ્વામરેન્દ્રપદવિભ્રમદાનદક્ષમ્– આનન્દહેતુરધિકં મુરવિદ્વિષોઽપિ । ઈષન્નિષીદતુ મયિ ક્ષણમીક્ષણાર્ધમ્– ઇન્દીવરોદરસહોદરમિન્દિરાયાઃ ॥ ૭ ॥

ઇષ્ટાવિશિષ્ટમતયોઽપિ યયા દયાર્દ્ર– દૃષ્ટ્યા ત્રિવિષ્ટપપદં સુલભં લભન્તે । દૃષ્ટિઃ પ્રહૃષ્ટકમલોદરદીપ્તિરિષ્ટાં પુષ્ટિં કૃષીષ્ટ મમ પુષ્કરવિષ્ટરાયાઃ ॥ ૮ ॥

દદ્યાદ્દયાનુપવનો દ્રવિણામ્બુધારામ્– અસ્મિન્નકિંચનવિહંગશિશૌ વિષણ્ણે । દુષ્કર્મધર્મમપનીય ચિરાય દૂરં નારાયણપ્રણયિનીનયનામ્બુવાહઃ ॥ ૯ ॥

ગીર્દેવતેતિ ગરુડ઼ધ્વજસુન્દરીતિ શાકમ્ભરીતિ શશિશેખરવલ્લભેતિ । સૃષ્ટિસ્થિતિપ્રલયકેલિષુ સંસ્થિતાયૈ તસ્યૈ નમસ્ત્રિભુવનૈકગુરોસ્તરુણ્યૈ ॥ ૧૦ ॥

શ્રુત્યૈ નમોઽસ્તુ શુભકર્મફલપ્રસૂત્યૈ રત્યૈ નમોઽસ્તુ રમણીયગુણાર્ણવાયૈ । શક્ત્યૈ નમોઽસ્તુ શતપત્રનિકેતનાયૈ પુષ્ટ્યૈ નમોઽસ્તુ પુરુષોત્તમવલ્લભાયૈ ॥ ૧૧ ॥

નમોઽસ્તુ નાલીકનિભાનનાયૈ નમોઽસ્તુ દુગ્ધોદધિજન્મભૂત્યૈ । નમોઽસ્તુ સોમામૃતસોદરાયૈ નમોઽસ્તુ નારાયણવલ્લભાયૈ ॥ ૧૨ ॥

નમોઽસ્તુ હેમામ્બુજપીઠિકાયૈ નમોઽસ્તુ ભૂમણ્ડલનાયિકાયૈ । નમોઽસ્તુ દેવાદિદયાપરાયૈ નમોઽસ્તુ શાર્ંગાયુધવલ્લભાયૈ ॥ ૧૩ ॥

નમોઽસ્તુ દેવ્યૈ ભૃગુનન્દનાયૈ નમોઽસ્તુ વિષ્ણોરુરસિ સ્થિતાયૈ । નમોઽસ્તુ લક્ષ્મ્યૈ કમલાલયાયૈ નમોઽસ્તુ દામોદરવલ્લભાયૈ ॥ ૧૪ ॥

નમોઽસ્તુ કાન્ત્યૈ કમલેક્ષણાયૈ નમોઽસ્તુ ભૂત્યૈ ભુવનપ્રસૂત્યૈ । નમોઽસ્તુ દેવાદિભિરર્ચિતાયૈ નમોઽસ્તુ નન્દાત્મજવલ્લભાયૈ ॥ ૧૫ ॥

સમ્પત્કરાણિ સકલેન્દ્રિયનન્દનાનિ સામ્રાજ્યદાનવિભવાનિ સરોરુહાક્ષિ । ત્વદ્વન્દનાનિ દુરિતોદ્ધરણોદ્યતાનિ મામેવ માતરનિશં કલયન્તુ માન્યે ॥ ૧૬ ॥

યત્કટાક્ષસમુપાસનાવિધિઃ સેવકસ્ય સકલાર્થસમ્પદઃ । સન્તનોતિ વચનાંગમાનસૈસ્– ત્વાં મુરારિહૃદયેશ્વરીં ભજે ॥ ૧૭ ॥

સરસિજનિલયે સરોજહસ્તે ધવલતમાંશુકગન્ધમાલ્યશોભે । ભગવતિ હરિવલ્લભે મનોજ્ઞે ત્રિભુવનભૂતિકરિ પ્રસીદ મહ્યમ્ ॥ ૧૮ ॥

દિગ્ઘસ્તિભિઃ કનકકુમ્ભમુખાવસૃષ્ટ– સ્વર્વાહિનીવિમલચારુજલપ્લુતાંગીમ્ । પ્રાતર્નમામિ જગતાં જનનીમશેષ– લોકાધિનાથગૃહિણીમમૃતાબ્ધિપુત્રીમ્ ॥ ૧૯ ॥

કમલે કમલાક્ષવલ્લભે ત્વં કરુણાપૂરતરંગિતૈરપાંગૈઃ । અવલોકય મામકિંચનાનાં પ્રથમં પાત્રમકૃત્રિમં દયાયાઃ ॥ ૨૦ ॥

દેવિ પ્રસીદ જગદીશ્વરિ લોકમાતઃ કલ્યાણગાત્રિ કમલેક્ષણજીવનાથે । દારિદ્ર્યભીતિહૃદયં શરણાગતં મામ્– આલોકય પ્રતિદિનં સદયૈરપાંગૈઃ ॥ ૨૧ ॥

સ્તુવન્તિ યે સ્તુતિભિરમૂભિરન્વહં ત્રયીમયીં ત્રિભુવનમાતરં રમામ્ । ગુણાધિકા ગુરુતરભાગ્યભાગિનો ભવન્તિ તે ભુવિ બુધભાવિતાશયાઃ ॥ ૨૨ ॥

॥ ઇતિ શ્રીમચ્છંકરાચાર્યકૃતં શ્રીકનકધારાસ્તોત્રં સમ્પૂર્ણમ્ ॥

સ્રોત: Wikisource · CC BY-SA 4.0

તમારો પ્રતિભાવ મોકલો

શું સુધારવું, શું ખોટું છે, કે તમને શું ગમ્યું તે જણાવો. અમે દરેક સંદેશ વાંચીએ છીએ.

શેના વિશે
શંખ તમારા માટે કેટલું ઉપયોગી છે? (વૈકલ્પિક)