શ્રીલલિતાસહસ્રનામસ્તોત્રમ્
સહસ્રનામ (1000 નામ) · 187 શ્લોક
॥ ન્યાસઃ ॥
અસ્ય શ્રીલલિતાસહસ્રનામસ્તોત્રમાલા મન્ત્રસ્ય । વશિન્યાદિવાગ્દેવતા ઋષયઃ । અનુષ્ટુપ્ છન્દઃ । શ્રીલલિતાપરમેશ્વરી દેવતા । શ્રીમદ્વાગ્ભવકૂટેતિ બીજમ્ । મધ્યકૂટેતિ શક્તિઃ । શક્તિકૂટેતિ કીલકમ્ । શ્રીલલિતામહાત્રિપુરસુન્દરીપ્રસાદસિદ્ધિદ્વારા ચિન્તિતફલાવાપ્ત્યર્થે જપે વિનિયોગઃ । ॥ ધ્યાનમ્ ॥
સિન્દૂરારુણ વિગ્રહાં ત્રિનયનાં માણિક્યમૌલિ સ્ફુરત્ તારા નાયક શેખરાં સ્મિતમુખી માપીન વક્ષોરુહામ્ । પાણિભ્યામલિપૂર્ણ રત્ન ચષકં રક્તોત્પલં બિભ્રતીં સૌમ્યાં રત્ન ઘટસ્થ રક્તચરણાં ધ્યાયેત્ પરામમ્બિકામ્ ॥
॥ અથ શ્રી લલિતા સહસ્રનામ સ્તોત્રમ્ ॥
ૐ શ્રીમાતા શ્રીમહારાજ્ઞી શ્રીમત્સિંહાસનેશ્વરી । ચિદગ્નિકુણ્ડસમ્ભૂતા દેવકાર્યસમુદ્યતા ॥ ૧ ॥
ઉદ્યદ્ભાનુસહસ્રાભા ચતુર્બાહુસમન્વિતા । રાગસ્વરૂપપાશાઢ્યા ક્રોધાકારાંકુશોજ્જ્વલા ॥ ૨ ॥
મનોરૂપેક્ષુકોદણ્ડા પંચતન્માત્રસાયકા । નિજારુણપ્રભાપૂરમજ્જદ્બ્રહ્માણ્ડમણ્ડલા ॥ ૩ ॥
ચમ્પકાશોકપુન્નાગસૌગન્ધિકલસત્કચા । કુરુવિન્દમણિશ્રેણીકનત્કોટીરમણ્ડિતા ॥ ૪ ॥
અષ્ટમીચન્દ્રવિભ્રાજદલિકસ્થલશોભિતા । મુખચન્દ્રકલંકાભમૃગનાભિવિશેષકા ॥ ૫ ॥
વદનસ્મરમાંગલ્યગૃહતોરણચિલ્લિકા । વક્ત્રલક્ષ્મીપરીવાહચલન્મીનાભલોચના ॥ ૬ ॥
નવચમ્પકપુષ્પાભનાસાદણ્ડવિરાજિતા । તારાકાન્તિતિરસ્કારિનાસાભરણભાસુરા ॥ ૭ ॥
કદમ્બમંજરીક્ળિપ્તકર્ણપૂરમનોહરા । તાટંકયુગલીભૂતતપનોડુપમણ્ડલા ॥ ૮ ॥
પદ્મરાગશિલાદર્શપરિભાવિકપોલભૂઃ । નવવિદ્રુમબિમ્બશ્રીન્યક્કારિરદનચ્છદા ॥ ૯ ॥
શુદ્ધવિદ્યાંકુરાકારદ્વિજપંક્તિદ્વયોજ્જ્વલા । કર્પૂરવીટિકામોદસમાકર્ષિદિગન્તરા ॥ ૧૦ ॥
નિજસલ્લાપમાધુર્યવિનિર્ભર્ત્સિતકચ્છપી । મન્દસ્મિતપ્રભાપૂરમજ્જત્કામેશમાનસા ॥ ૧૧ ॥
અનાકલિતસાદૃશ્યચિબુકશ્રીવિરાજિતા । કામેશબદ્ધમાંગલ્યસૂત્રશોભિતકન્ધરા ॥ ૧૨ ॥
કનકાંગદકેયૂરકમનીયભુજાન્વિતા । રત્નગ્રૈવેયચિન્તાકલોલમુક્તાફલાન્વિતા ॥ ૧૩ ॥
કામેશ્વરપ્રેમરત્નમણિપ્રતિપણસ્તની । નાભ્યાલવાલરોમાલિલતાફલકુચદ્વયી ॥ ૧૪ ॥
લક્ષ્યરોમલતાધારતાસમુન્નેયમધ્યમા । સ્તનભારદલન્મધ્યપટ્ટબન્ધવલિત્રયા ॥ ૧૫ ॥
અરુણારુણકૌસુમ્ભવસ્ત્રભાસ્વત્કટીતટી । રત્નકિંકિણિકારમ્યરશનાદામભૂષિતા ॥ ૧૬ ॥
કામેશજ્ઞાતસૌભાગ્યમાર્દવોરુદ્વયાન્વિતા । માણિક્યમુકુટાકારજાનુદ્વયવિરાજિતા ॥ ૧૭ ॥
ઇન્દ્રગોપપરિક્ષિપ્તસ્મરતૂણાભજંઘિકા । ગૂઢગુલ્ફા કૂર્મપૃષ્ઠજયિષ્ણુપ્રપદાન્વિતા ॥ ૧૮ ॥
નખદીધિતિસંછન્નનમજ્જનતમોગુણા । પદદ્વયપ્રભાજાલપરાકૃતસરોરુહા ॥ ૧૯ ॥
સિંજાનમણિમંજીરમણ્ડિતશ્રીપદામ્બુજા । મરાલીમન્દગમના મહાલાવણ્યશેવધિઃ ॥ ૨૦ ॥
સર્વારુણાઽનવદ્યાંગી સર્વાભરણભૂષિતા । શિવકામેશ્વરાંકસ્થા શિવા સ્વાધીનવલ્લભા ॥ ૨૧ ॥
સુમેરુમધ્યશૃંગસ્થા શ્રીમન્નગરનાયિકા । ચિન્તામણિગૃહાન્તસ્થા પંચબ્રહ્માસનસ્થિતા ॥ ૨૨ ॥
મહાપદ્માટવીસંસ્થા કદમ્બવનવાસિની । સુધાસાગરમધ્યસ્થા કામાક્ષી કામદાયિની ॥ ૨૩ ॥
દેવર્ષિગણસંઘાતસ્તૂયમાનાત્મવૈભવા । ભણ્ડાસુરવધોદ્યુક્તશક્તિસેનાસમન્વિતા ॥ ૨૪ ॥
સમ્પત્કરીસમારૂઢસિન્ધુરવ્રજસેવિતા । અશ્વારૂઢાધિષ્ઠિતાશ્વકોટિકોટિભિરાવૃતા ॥ ૨૫ ॥
ચક્રરાજરથારૂઢસર્વાયુધપરિષ્કૃતા । ગેયચક્રરથારૂઢમન્ત્રિણીપરિસેવિતા ॥ ૨૬ ॥
કિરિચક્રરથારૂઢદણ્ડનાથાપુરસ્કૃતા । જ્વાલામાલિનિકાક્ષિપ્તવહ્નિપ્રાકારમધ્યગા ॥ ૨૭ ॥
ભણ્ડસૈન્યવધોદ્યુક્તશક્તિવિક્રમહર્ષિતા । નિત્યાપરાક્રમાટોપનિરીક્ષણસમુત્સુકા ॥ ૨૮ ॥
ભણ્ડપુત્રવધોદ્યુક્તબાલાવિક્રમનન્દિતા । મન્ત્રિણ્યમ્બાવિરચિતવિષંગવધતોષિતા ॥ ૨૯ ॥
વિશુક્રપ્રાણહરણવારાહીવીર્યનન્દિતા । કામેશ્વરમુખાલોકકલ્પિતશ્રીગણેશ્વરા ॥ ૩૦ ॥
મહાગણેશનિર્ભિન્નવિઘ્નયન્ત્રપ્રહર્ષિતા । ભણ્ડાસુરેન્દ્રનિર્મુક્તશસ્ત્રપ્રત્યસ્ત્રવર્ષિણી ॥ ૩૧ ॥
કરાંગુલિનખોત્પન્નનારાયણદશાકૃતિઃ । મહાપાશુપતાસ્ત્રાગ્નિનિર્દગ્ધાસુરસૈનિકા ॥ ૩૨ ॥
કામેશ્વરાસ્ત્રનિર્દગ્ધસભણ્ડાસુરશૂન્યકા । બ્રહ્મોપેન્દ્રમહેન્દ્રાદિદેવસંસ્તુતવૈભવા ॥ ૩૩ ॥
હરનેત્રાગ્નિસંદગ્ધકામસંજીવનૌષધિઃ । શ્રીમદ્વાગ્ભવકૂટૈકસ્વરૂપમુખપંકજા ॥ ૩૪ ॥
કણ્ઠાધઃકટિપર્યન્તમધ્યકૂટસ્વરૂપિણી । શક્તિકૂટૈકતાપન્નકટ્યધોભાગધારિણી ॥ ૩૫ ॥
મૂલમન્ત્રાત્મિકા મૂલકૂટત્રયકલેબરા । કુલામૃતૈકરસિકા કુલસંકેતપાલિની ॥ ૩૬ ॥
કુલાંગના કુલાન્તસ્થા કૌલિની કુલયોગિની । અકુલા સમયાન્તસ્થા સમયાચારતત્પરા ॥ ૩૭ ॥
મૂલાધારૈકનિલયા બ્રહ્મગ્રન્થિવિભેદિની । મણિપૂરાન્તરુદિતા વિષ્ણુગ્રન્થિવિભેદિની ॥ ૩૮ ॥
આજ્ઞાચક્રાન્તરાલસ્થા રુદ્રગ્રન્થિવિભેદિની । સહસ્રારામ્બુજારૂઢા સુધાસારાભિવર્ષિણી ॥ ૩૯ ॥
તડિલ્લતાસમરુચિઃ ષટ્ચક્રોપરિસંસ્થિતા । મહાશક્તિઃ કુણ્ડલિની બિસતન્તુતનીયસી ॥ ૪૦ ॥
ભવાની ભાવનાગમ્યા ભવારણ્યકુઠારિકા । ભદ્રપ્રિયા ભદ્રમૂર્તિર્ ભક્તસૌભાગ્યદાયિની ॥ ૪૧ ॥
ભક્તિપ્રિયા ભક્તિગમ્યા ભક્તિવશ્યા ભયાપહા । શામ્ભવી શારદારાધ્યા શર્વાણી શર્મદાયિની ॥ ૪૨ ॥
શાંકરી શ્રીકરી સાધ્વી શરચ્ચન્દ્રનિભાનના । શાતોદરી શાન્તિમતી નિરાધારા નિરંજના ॥ ૪૩ ॥
નિર્લેપા નિર્મલા નિત્યા નિરાકારા નિરાકુલા । નિર્ગુણા નિષ્કલા શાન્તા નિષ્કામા નિરુપપ્લવા ॥ ૪૪ ॥
નિત્યમુક્તા નિર્વિકારા નિષ્પ્રપંચા નિરાશ્રયા । નિત્યશુદ્ધા નિત્યબુદ્ધા નિરવદ્યા નિરન્તરા ॥ ૪૫ ॥
નિષ્કારણા નિષ્કલંકા નિરુપાધિર્ નિરીશ્વરા । નીરાગા રાગમથની નિર્મદા મદનાશિની ॥ ૪૬ ॥
નિશ્ચિન્તા નિરહંકારા નિર્મોહા મોહનાશિની । નિર્મમા મમતાહન્ત્રી નિષ્પાપા પાપનાશિની ॥ ૪૭ ॥
નિષ્ક્રોધા ક્રોધશમની નિર્લોભા લોભનાશિની । નિઃસંશયા સંશયઘ્ની નિર્ભવા ભવનાશિની ॥ ૪૮ ॥
નિર્વિકલ્પા નિરાબાધા નિર્ભેદા ભેદનાશિની । નિર્નાશા મૃત્યુમથની નિષ્ક્રિયા નિષ્પરિગ્રહા ॥ ૪૯ ॥
નિસ્તુલા નીલચિકુરા નિરપાયા નિરત્યયા । દુર્લભા દુર્ગમા દુર્ગા દુઃખહન્ત્રી સુખપ્રદા ॥ ૫૦ ॥
દુષ્ટદૂરા દુરાચારશમની દોષવર્જિતા । સર્વજ્ઞા સાન્દ્રકરુણા સમાનાધિકવર્જિતા ॥ ૫૧ ॥
સર્વશક્તિમયી સર્વમંગલા સદ્ગતિપ્રદા । સર્વેશ્વરી સર્વમયી સર્વમન્ત્રસ્વરૂપિણી ॥ ૫૨ ॥
સર્વયન્ત્રાત્મિકા સર્વતન્ત્રરૂપા મનોન્મની । માહેશ્વરી મહાદેવી મહાલક્ષ્મીર્ મૃડપ્રિયા ॥ ૫૩ ॥
મહારૂપા મહાપૂજ્યા મહાપાતકનાશિની । મહામાયા મહાસત્ત્વા મહાશક્તિર્ મહારતિઃ ॥ ૫૪ ॥
મહાભોગા મહૈશ્વર્યા મહાવીર્યા મહાબલા । મહાબુદ્ધિર્ મહાસિદ્ધિર્ મહાયોગેશ્વરેશ્વરી ॥ ૫૫ ॥
મહાતન્ત્રા મહામન્ત્રા મહાયન્ત્રા મહાસના । મહાયાગક્રમારાધ્યા મહાભૈરવપૂજિતા ॥ ૫૬ ॥
મહેશ્વરમહાકલ્પમહાતાણ્ડવસાક્ષિણી । મહાકામેશમહિષી મહાત્રિપુરસુન્દરી ॥ ૫૭ ॥
ચતુઃષષ્ટ્યુપચારાઢ્યા ચતુઃષષ્ટિકલામયી । મહાચતુઃષષ્ટિકોટિયોગિનીગણસેવિતા ॥ ૫૮ ॥
મનુવિદ્યા ચન્દ્રવિદ્યા ચન્દ્રમણ્ડલમધ્યગા । ચારુરૂપા ચારુહાસા ચારુચન્દ્રકલાધરા ॥ ૫૯ ॥
ચરાચરજગન્નાથા ચક્રરાજનિકેતના । પાર્વતી પદ્મનયના પદ્મરાગસમપ્રભા ॥ ૬૦ ॥
પંચપ્રેતાસનાસીના પંચબ્રહ્મસ્વરૂપિણી । ચિન્મયી પરમાનન્દા વિજ્ઞાનઘનરૂપિણી ॥ ૬૧ ॥
ધ્યાનધ્યાતૃધ્યેયરૂપા ધર્માધર્મવિવર્જિતા । વિશ્વરૂપા જાગરિણી સ્વપન્તી તૈજસાત્મિકા ॥ ૬૨ ॥
સુપ્તા પ્રાજ્ઞાત્મિકા તુર્યા સર્વાવસ્થાવિવર્જિતા । સૃષ્ટિકર્ત્રી બ્રહ્મરૂપા ગોપ્ત્રી ગોવિન્દરૂપિણી ॥ ૬૩ ॥
સંહારિણી રુદ્રરૂપા તિરોધાનકરીશ્વરી । સદાશિવાઽનુગ્રહદા પંચકૃત્યપરાયણા ॥ ૬૪ ॥
ભાનુમણ્ડલમધ્યસ્થા ભૈરવી ભગમાલિની । પદ્માસના ભગવતી પદ્મનાભસહોદરી ॥ ૬૫ ॥
ઉન્મેષનિમિષોત્પન્નવિપન્નભુવનાવલી । સહસ્રશીર્ષવદના સહસ્રાક્ષી સહસ્રપાત્ ॥ ૬૬ ॥
આબ્રહ્મકીટજનની વર્ણાશ્રમવિધાયિની । નિજાજ્ઞારૂપનિગમા પુણ્યાપુણ્યફલપ્રદા ॥ ૬૭ ॥
શ્રુતિસીમન્તસિન્દૂરીકૃતપાદાબ્જધૂલિકા । સકલાગમસન્દોહશુક્તિસમ્પુટમૌક્તિકા ॥ ૬૮ ॥
પુરુષાર્થપ્રદા પૂર્ણા ભોગિની ભુવનેશ્વરી । અમ્બિકાઽનાદિનિધના હરિબ્રહ્મેન્દ્રસેવિતા ॥ ૬૯ ॥
નારાયણી નાદરૂપા નામરૂપવિવર્જિતા । હ્રીંકારી હ્રીમતી હૃદ્યા હેયોપાદેયવર્જિતા ॥ ૭૦ ॥
રાજરાજાર્ચિતા રાજ્ઞી રમ્યા રાજીવલોચના । રંજની રમણી રસ્યા રણત્કિંકિણિમેખલા ॥ ૭૧ ॥
રમા રાકેન્દુવદના રતિરૂપા રતિપ્રિયા । રક્ષાકરી રાક્ષસઘ્ની રામા રમણલમ્પટા ॥ ૭૨ ॥
કામ્યા કામકલારૂપા કદમ્બકુસુમપ્રિયા । કલ્યાણી જગતીકન્દા કરુણારસસાગરા ॥ ૭૩ ॥
કલાવતી કલાલાપા કાન્તા કાદમ્બરીપ્રિયા । વરદા વામનયના વારુણીમદવિહ્વલા ॥ ૭૪ ॥
વિશ્વાધિકા વેદવેદ્યા વિન્ધ્યાચલનિવાસિની । વિધાત્રી વેદજનની વિષ્ણુમાયા વિલાસિની ॥ ૭૫ ॥
ક્ષેત્રસ્વરૂપા ક્ષેત્રેશી ક્ષેત્રક્ષેત્રજ્ઞપાલિની । ક્ષયવૃદ્ધિવિનિર્મુક્તા ક્ષેત્રપાલસમર્ચિતા ॥ ૭૬ ॥
વિજયા વિમલા વન્દ્યા વન્દારુજનવત્સલા । વાગ્વાદિની વામકેશી વહ્નિમણ્ડલવાસિની ॥ ૭૭ ॥
ભક્તિમત્કલ્પલતિકા પશુપાશવિમોચિની । સંહૃતાશેષપાષણ્ડા સદાચારપ્રવર્તિકા ॥ ૭૮ ॥
તાપત્રયાગ્નિસન્તપ્તસમાહ્લાદનચન્દ્રિકા । તરુણી તાપસારાધ્યા તનુમધ્યા તમોઽપહા ॥ ૭૯ ॥
ચિતિસ્તત્પદલક્ષ્યાર્થા ચિદેકરસરૂપિણી । સ્વાત્માનન્દલવીભૂતબ્રહ્માદ્યાનન્દસન્તતિઃ ॥ ૮૦ ॥
પરા પ્રત્યક્ચિતીરૂપા પશ્યન્તી પરદેવતા । મધ્યમા વૈખરીરૂપા ભક્તમાનસહંસિકા ॥ ૮૧ ॥
કામેશ્વરપ્રાણનાડી કૃતજ્ઞા કામપૂજિતા । શૃંગારરસસમ્પૂર્ણા જયા જાલન્ધરસ્થિતા ॥ ૮૨ ॥
ઓડ્યાણપીઠનિલયા બિન્દુમણ્ડલવાસિની । રહોયાગક્રમારાધ્યા રહસ્તર્પણતર્પિતા ॥ ૮૩ ॥
સદ્યઃપ્રસાદિની વિશ્વસાક્ષિણી સાક્ષિવર્જિતા । ષડંગદેવતાયુક્તા ષાડ્ગુણ્યપરિપૂરિતા ॥ ૮૪ ॥
નિત્યક્લિન્ના નિરુપમા નિર્વાણસુખદાયિની । નિત્યાષોડશિકારૂપા શ્રીકણ્ઠાર્ધશરીરિણી ॥ ૮૫ ॥
પ્રભાવતી પ્રભારૂપા પ્રસિદ્ધા પરમેશ્વરી । મૂલપ્રકૃતિર્ અવ્યક્તા વ્યક્તાવ્યક્તસ્વરૂપિણી ॥ ૮૬ ॥
વ્યાપિની વિવિધાકારા વિદ્યાવિદ્યાસ્વરૂપિણી । મહાકામેશનયનકુમુદાહ્લાદકૌમુદી ॥ ૮૭ ॥
ભક્તહાર્દતમોભેદભાનુમદ્ભાનુસન્તતિઃ । શિવદૂતી શિવારાધ્યા શિવમૂર્તિઃ શિવંકરી ॥ ૮૮ ॥
શિવપ્રિયા શિવપરા શિષ્ટેષ્ટા શિષ્ટપૂજિતા । અપ્રમેયા સ્વપ્રકાશા મનોવાચામગોચરા ॥ ૮૯ ॥
ચિચ્છક્તિશ્ ચેતનારૂપા જડશક્તિર્ જડાત્મિકા । ગાયત્રી વ્યાહૃતિઃ સન્ધ્યા દ્વિજબૃન્દનિષેવિતા ॥ ૯૦ ॥
તત્ત્વાસના તત્ત્વમયી પંચકોશાન્તરસ્થિતા । નિઃસીમમહિમા નિત્યયૌવના મદશાલિની ॥ ૯૧ ॥
મદઘૂર્ણિતરક્તાક્ષી મદપાટલગણ્ડભૂઃ । ચન્દનદ્રવદિગ્ધાંગી ચામ્પેયકુસુમપ્રિયા ॥ ૯૨ ॥
કુશલા કોમલાકારા કુરુકુલ્લા કુલેશ્વરી । કુલકુણ્ડાલયા કૌલમાર્ગતત્પરસેવિતા ॥ ૯૩ ॥
કુમારગણનાથામ્બા તુષ્ટિઃ પુષ્ટિર્ મતિર્ ધૃતિઃ । શાન્તિઃ સ્વસ્તિમતી કાન્તિર્ નન્દિની વિઘ્નનાશિની ॥ ૯૪ ॥
તેજોવતી ત્રિનયના લોલાક્ષીકામરૂપિણી । માલિની હંસિની માતા મલયાચલવાસિની ॥ ૯૫ ॥
સુમુખી નલિની સુભ્રૂઃ શોભના સુરનાયિકા । કાલકણ્ઠી કાન્તિમતી ક્ષોભિણી સૂક્ષ્મરૂપિણી ॥ ૯૬ ॥
વજ્રેશ્વરી વામદેવી વયોઽવસ્થાવિવર્જિતા । સિદ્ધેશ્વરી સિદ્ધવિદ્યા સિદ્ધમાતા યશસ્વિની ॥ ૯૭ ॥
વિશુદ્ધિચક્રનિલયાઽઽરક્તવર્ણા ત્રિલોચના । ખટ્વાંગાદિપ્રહરણા વદનૈકસમન્વિતા ॥ ૯૮ ॥
પાયસાન્નપ્રિયા ત્વક્સ્થા પશુલોકભયંકરી । અમૃતાદિમહાશક્તિસંવૃતા ડાકિનીશ્વરી ॥ ૯૯ ॥
અનાહતાબ્જનિલયા શ્યામાભા વદનદ્વયા । દંષ્ટ્રોજ્જ્વલાઽક્ષમાલાદિધરા રુધિરસંસ્થિતા ॥ ૧૦૦ ॥
કાલરાત્ર્યાદિશક્ત્યૌઘવૃતા સ્નિગ્ધૌદનપ્રિયા । મહાવીરેન્દ્રવરદા રાકિણ્યમ્બાસ્વરૂપિણી ॥ ૧૦૧ ॥
મણિપૂરાબ્જનિલયા વદનત્રયસંયુતા । વજ્રાદિકાયુધોપેતા ડામર્યાદિભિરાવૃતા ॥ ૧૦૨ ॥
રક્તવર્ણા માંસનિષ્ઠા ગુડાન્નપ્રીતમાનસા । સમસ્તભક્તસુખદા લાકિન્યમ્બાસ્વરૂપિણી ॥ ૧૦૩ ॥
સ્વાધિષ્ઠાનામ્બુજગતા ચતુર્વક્ત્રમનોહરા । શૂલાદ્યાયુધસમ્પન્ના પીતવર્ણાઽતિગર્વિતા ॥ ૧૦૪ ॥
મેદોનિષ્ઠા મધુપ્રીતા બન્ધિન્યાદિસમન્વિતા । દધ્યન્નાસક્તહૃદયા કાકિનીરૂપધારિણી ॥ ૧૦૫ ॥
મૂલાધારામ્બુજારૂઢા પંચવક્ત્રાઽસ્થિસંસ્થિતા । અંકુશાદિપ્રહરણા વરદાદિનિષેવિતા ॥ ૧૦૬ ॥
મુદ્ગૌદનાસક્તચિત્તા સાકિન્યમ્બાસ્વરૂપિણી । આજ્ઞાચક્રાબ્જનિલયા શુક્લવર્ણા ષડાનના ॥ ૧૦૭ ॥
મજ્જાસંસ્થા હંસવતીમુખ્યશક્તિસમન્વિતા । હરિદ્રાન્નૈકરસિકા હાકિનીરૂપધારિણી ॥ ૧૦૮ ॥
સહસ્રદલપદ્મસ્થા સર્વવર્ણોપશોભિતા । સર્વાયુધધરા શુક્લસંસ્થિતા સર્વતોમુખી ॥ ૧૦૯ ॥
સર્વૌદનપ્રીતચિત્તા યાકિન્યમ્બાસ્વરૂપિણી । સ્વાહા સ્વધાઽમતિર્ મેધા શ્રુતિઃ સ્મૃતિર્ અનુત્તમા ॥ ૧૧૦ ॥
પુણ્યકીર્તિઃ પુણ્યલભ્યા પુણ્યશ્રવણકીર્તના । પુલોમજાર્ચિતા બન્ધમોચની બન્ધુરાલકા ॥ ૧૧૧ ॥
બર્બરાલકા વિમર્શરૂપિણી વિદ્યા વિયદાદિજગત્પ્રસૂઃ । સર્વવ્યાધિપ્રશમની સર્વમૃત્યુનિવારિણી ॥ ૧૧૨ ॥
અગ્રગણ્યાઽચિન્ત્યરૂપા કલિકલ્મષનાશિની । કાત્યાયની કાલહન્ત્રી કમલાક્ષનિષેવિતા ॥ ૧૧૩ ॥
તામ્બૂલપૂરિતમુખી દાડિમીકુસુમપ્રભા । મૃગાક્ષી મોહિની મુખ્યા મૃડાની મિત્રરૂપિણી ॥ ૧૧૪ ॥
નિત્યતૃપ્તા ભક્તનિધિર્ નિયન્ત્રી નિખિલેશ્વરી । મૈત્ર્યાદિવાસનાલભ્યા મહાપ્રલયસાક્ષિણી ॥ ૧૧૫ ॥
પરા શક્તિઃ પરા નિષ્ઠા પ્રજ્ઞાનઘનરૂપિણી । માધ્વીપાનાલસા મત્તા માતૃકાવર્ણરૂપિણી ॥ ૧૧૬ ॥
મહાકૈલાસનિલયા મૃણાલમૃદુદોર્લતા । મહનીયા દયામૂર્તિર્ મહાસામ્રાજ્યશાલિની ॥ ૧૧૭ ॥
આત્મવિદ્યા મહાવિદ્યા શ્રીવિદ્યા કામસેવિતા । શ્રીષોડશાક્ષરીવિદ્યા ત્રિકૂટા કામકોટિકા ॥ ૧૧૮ ॥
કટાક્ષકિંકરીભૂતકમલાકોટિસેવિતા । શિરઃસ્થિતા ચન્દ્રનિભા ભાલસ્થેન્દ્રધનુઃપ્રભા ॥ ૧૧૯ ॥
હૃદયસ્થા રવિપ્રખ્યા ત્રિકોણાન્તરદીપિકા । દાક્ષાયણી દૈત્યહન્ત્રી દક્ષયજ્ઞવિનાશિની ॥ ૧૨૦ ॥
દરાન્દોલિતદીર્ઘાક્ષી દરહાસોજ્જ્વલન્મુખી । ગુરુમૂર્તિર્ ગુણનિધિર્ ગોમાતા ગુહજન્મભૂઃ ॥ ૧૨૧ ॥
દેવેશી દણ્ડનીતિસ્થા દહરાકાશરૂપિણી । પ્રતિપન્મુખ્યરાકાન્તતિથિમણ્ડલપૂજિતા ॥ ૧૨૨ ॥
કલાત્મિકા કલાનાથા કાવ્યાલાપવિનોદિની । સચામરરમાવાણીસવ્યદક્ષિણસેવિતા ॥ ૧૨૩ ॥
આદિશક્તિર્ અમેયાઽઽત્મા પરમા પાવનાકૃતિઃ । અનેકકોટિબ્રહ્માણ્ડજનની દિવ્યવિગ્રહા ॥ ૧૨૪ ॥
ક્લીંકારી કેવલા ગુહ્યા કૈવલ્યપદદાયિની । ત્રિપુરા ત્રિજગદ્વન્દ્યા ત્રિમૂર્તિસ્ ત્રિદશેશ્વરી ॥ ૧૨૫ ॥
ત્ર્યક્ષરી દિવ્યગન્ધાઢ્યા સિન્દૂરતિલકાંચિતા । ઉમા શૈલેન્દ્રતનયા ગૌરી ગન્ધર્વસેવિતા ॥ ૧૨૬ ॥
વિશ્વગર્ભા સ્વર્ણગર્ભા વરદા વાગધીશ્વરી । ધ્યાનગમ્યાઽપરિચ્છેદ્યા જ્ઞાનદા જ્ઞાનવિગ્રહા ॥ ૧૨૭ ॥
સર્વવેદાન્તસંવેદ્યા સત્યાનન્દસ્વરૂપિણી । લોપામુદ્રાર્ચિતા લીલાક્ળિપ્તબ્રહ્માણ્ડમણ્ડલા ॥ ૧૨૮ ॥
અદૃશ્યા દૃશ્યરહિતા વિજ્ઞાત્રી વેદ્યવર્જિતા । યોગિની યોગદા યોગ્યા યોગાનન્દા યુગન્ધરા ॥ ૧૨૯ ॥
ઇચ્છાશક્તિજ્ઞાનશક્તિક્રિયાશક્તિસ્વરૂપિણી । સર્વાધારા સુપ્રતિષ્ઠા સદસદ્રૂપધારિણી ॥ ૧૩૦ ॥
અષ્ટમૂર્તિર્ અજાજૈત્રી લોકયાત્રાવિધાયિની । એકાકિની ભૂમરૂપા નિર્દ્વૈતા દ્વૈતવર્જિતા ॥ ૧૩૧ ॥
અન્નદા વસુદા વૃદ્ધા બ્રહ્માત્મૈક્યસ્વરૂપિણી । બૃહતી બ્રાહ્મણી બ્રાહ્મી બ્રહ્માનન્દા બલિપ્રિયા ॥ ૧૩૨ ॥
ભાષારૂપા બૃહત્સેના ભાવાભાવવિવર્જિતા । સુખારાધ્યા શુભકરી શોભના સુલભા ગતિઃ ॥ ૧૩૩ ॥
રાજરાજેશ્વરી રાજ્યદાયિની રાજ્યવલ્લભા । રાજત્કૃપા રાજપીઠનિવેશિતનિજાશ્રિતા ॥ ૧૩૪ ॥
રાજ્યલક્ષ્મીઃ કોશનાથા ચતુરંગબલેશ્વરી । સામ્રાજ્યદાયિની સત્યસન્ધા સાગરમેખલા ॥ ૧૩૫ ॥
દીક્ષિતા દૈત્યશમની સર્વલોકવશંકરી । સર્વાર્થદાત્રી સાવિત્રી સચ્ચિદાનન્દરૂપિણી ॥ ૧૩૬ ॥
દેશકાલાપરિચ્છિન્ના સર્વગા સર્વમોહિની । સરસ્વતી શાસ્ત્રમયી ગુહામ્બા ગુહ્યરૂપિણી ॥ ૧૩૭ ॥
સર્વોપાધિવિનિર્મુક્તા સદાશિવપતિવ્રતા । સમ્પ્રદાયેશ્વરી સાધ્વી ગુરુમણ્ડલરૂપિણી ॥ ૧૩૮ ॥
કુલોત્તીર્ણા ભગારાધ્યા માયા મધુમતી મહી । ગણામ્બા ગુહ્યકારાધ્યા કોમલાંગી ગુરુપ્રિયા ॥ ૧૩૯ ॥
સ્વતન્ત્રા સર્વતન્ત્રેશી દક્ષિણામૂર્તિરૂપિણી । સનકાદિસમારાધ્યા શિવજ્ઞાનપ્રદાયિની ॥ ૧૪૦ ॥
ચિત્કલાઽઽનન્દકલિકા પ્રેમરૂપા પ્રિયંકરી । નામપારાયણપ્રીતા નન્દિવિદ્યા નટેશ્વરી ॥ ૧૪૧ ॥
મિથ્યાજગદધિષ્ઠાના મુક્તિદા મુક્તિરૂપિણી । લાસ્યપ્રિયા લયકરી લજ્જા રમ્ભાદિવન્દિતા ॥ ૧૪૨ ॥
ભવદાવસુધાવૃષ્ટિઃ પાપારણ્યદવાનલા । દૌર્ભાગ્યતૂલવાતૂલા જરાધ્વાન્તરવિપ્રભા ॥ ૧૪૩ ॥
ભાગ્યાબ્ધિચન્દ્રિકા ભક્તચિત્તકેકિઘનાઘના । રોગપર્વતદમ્ભોલિર્ મૃત્યુદારુકુઠારિકા ॥ ૧૪૪ ॥
મહેશ્વરી મહાકાલી મહાગ્રાસા મહાશના । અપર્ણા ચણ્ડિકા ચણ્ડમુણ્ડાસુરનિષૂદિની ॥ ૧૪૫ ॥
ક્ષરાક્ષરાત્મિકા સર્વલોકેશી વિશ્વધારિણી । ત્રિવર્ગદાત્રી સુભગા ત્ર્યમ્બકા ત્રિગુણાત્મિકા ॥ ૧૪૬ ॥
સ્વર્ગાપવર્ગદા શુદ્ધા જપાપુષ્પનિભાકૃતિઃ । ઓજોવતી દ્યુતિધરા યજ્ઞરૂપા પ્રિયવ્રતા ॥ ૧૪૭ ॥
દુરારાધ્યા દુરાધર્ષા પાટલીકુસુમપ્રિયા । મહતી મેરુનિલયા મન્દારકુસુમપ્રિયા ॥ ૧૪૮ ॥
વીરારાધ્યા વિરાડ્રૂપા વિરજા વિશ્વતોમુખી । પ્રત્યગ્રૂપા પરાકાશા પ્રાણદા પ્રાણરૂપિણી ॥ ૧૪૯ ॥
માર્તાણ્ડભૈરવારાધ્યા મન્ત્રિણીન્યસ્તરાજ્યધૂઃ । ત્રિપુરેશી જયત્સેના નિસ્ત્રૈગુણ્યા પરાપરા ॥ ૧૫૦ ॥
સત્યજ્ઞાનાનન્દરૂપા સામરસ્યપરાયણા । કપર્દિની કલામાલા કામધુક્ કામરૂપિણી ॥ ૧૫૧ ॥
કલાનિધિઃ કાવ્યકલા રસજ્ઞા રસશેવધિઃ । પુષ્ટા પુરાતના પૂજ્યા પુષ્કરા પુષ્કરેક્ષણા ॥ ૧૫૨ ॥
પરંજ્યોતિઃ પરંધામ પરમાણુઃ પરાત્પરા । પાશહસ્તા પાશહન્ત્રી પરમન્ત્રવિભેદિની ॥ ૧૫૩ ॥
મૂર્તાઽમૂર્તાઽનિત્યતૃપ્તા મુનિમાનસહંસિકા । સત્યવ્રતા સત્યરૂપા સર્વાન્તર્યામિની સતી ॥ ૧૫૪ ॥
બ્રહ્માણી બ્રહ્મજનની બહુરૂપા બુધાર્ચિતા । પ્રસવિત્રી પ્રચણ્ડાઽઽજ્ઞા પ્રતિષ્ઠા પ્રકટાકૃતિઃ ॥ ૧૫૫ ॥
પ્રાણેશ્વરી પ્રાણદાત્રી પંચાશત્પીઠરૂપિણી । વિશૃંખલા વિવિક્તસ્થા વીરમાતા વિયત્પ્રસૂઃ ॥ ૧૫૬ ॥
મુકુન્દા મુક્તિનિલયા મૂલવિગ્રહરૂપિણી । ભાવજ્ઞા ભવરોગઘ્ની ભવચક્રપ્રવર્તિની ॥ ૧૫૭ ॥
છન્દઃસારા શાસ્ત્રસારા મન્ત્રસારા તલોદરી । ઉદારકીર્તિર્ ઉદ્દામવૈભવા વર્ણરૂપિણી ॥ ૧૫૮ ॥
જન્મમૃત્યુજરાતપ્તજનવિશ્રાન્તિદાયિની । સર્વોપનિષદુદ્ઘુષ્ટા શાન્ત્યતીતકલાત્મિકા ॥ ૧૫૯ ॥
ગમ્ભીરા ગગનાન્તસ્થા ગર્વિતા ગાનલોલુપા । કલ્પનારહિતા કાષ્ઠાઽકાન્તા કાન્તાર્ધવિગ્રહા ॥ ૧૬૦ ॥
કાર્યકારણનિર્મુક્તા કામકેલિતરંગિતા । કનત્કનકતાટંકા લીલાવિગ્રહધારિણી ॥ ૧૬૧ ॥
અજા ક્ષયવિનિર્મુક્તા મુગ્ધા ક્ષિપ્રપ્રસાદિની । અન્તર્મુખસમારાધ્યા બહિર્મુખસુદુર્લભા ॥ ૧૬૨ ॥
ત્રયી ત્રિવર્ગનિલયા ત્રિસ્થા ત્રિપુરમાલિની । નિરામયા નિરાલમ્બા સ્વાત્મારામા સુધાસૃતિઃ ॥ ૧૬૩ ॥
સંસારપંકનિર્મગ્નસમુદ્ધરણપણ્ડિતા । યજ્ઞપ્રિયા યજ્ઞકર્ત્રી યજમાનસ્વરૂપિણી ॥ ૧૬૪ ॥
ધર્માધારા ધનાધ્યક્ષા ધનધાન્યવિવર્ધિની । વિપ્રપ્રિયા વિપ્રરૂપા વિશ્વભ્રમણકારિણી ॥ ૧૬૫ ॥
વિશ્વગ્રાસા વિદ્રુમાભા વૈષ્ણવી વિષ્ણુરૂપિણી । અયોનિર્ યોનિનિલયા કૂટસ્થા કુલરૂપિણી ॥ ૧૬૬ ॥
વીરગોષ્ઠીપ્રિયા વીરા નૈષ્કર્મ્યા નાદરૂપિણી । વિજ્ઞાનકલના કલ્યા વિદગ્ધા બૈન્દવાસના ॥ ૧૬૭ ॥
તત્ત્વાધિકા તત્ત્વમયી તત્ત્વમર્થસ્વરૂપિણી । સામગાનપ્રિયા સૌમ્યા સદાશિવકુટુમ્બિની ॥ ૧૬૮ ॥
સવ્યાપસવ્યમાર્ગસ્થા સર્વાપદ્વિનિવારિણી । સ્વસ્થા સ્વભાવમધુરા ધીરા ધીરસમર્ચિતા ॥ ૧૬૯ ॥
ચૈતન્યાર્ઘ્યસમારાધ્યા ચૈતન્યકુસુમપ્રિયા । સદોદિતા સદાતુષ્ટા તરુણાદિત્યપાટલા ॥ ૧૭૦ ॥
દક્ષિણાદક્ષિણારાધ્યા દરસ્મેરમુખામ્બુજા । કૌલિનીકેવલાઽનર્ઘ્યકૈવલ્યપદદાયિની ॥ ૧૭૧ ॥
સ્તોત્રપ્રિયા સ્તુતિમતી શ્રુતિસંસ્તુતવૈભવા । મનસ્વિની માનવતી મહેશી મંગલાકૃતિઃ ॥ ૧૭૨ ॥
વિશ્વમાતા જગદ્ધાત્રી વિશાલાક્ષી વિરાગિણી । પ્રગલ્ભા પરમોદારા પરામોદા મનોમયી ॥ ૧૭૩ ॥
વ્યોમકેશી વિમાનસ્થા વજ્રિણી વામકેશ્વરી । પંચયજ્ઞપ્રિયા પંચપ્રેતમંચાધિશાયિની ॥ ૧૭૪ ॥
પંચમી પંચભૂતેશી પંચસંખ્યોપચારિણી । શાશ્વતી શાશ્વતૈશ્વર્યા શર્મદા શમ્ભુમોહિની ॥ ૧૭૫ ॥
ધરા ધરસુતા ધન્યા ધર્મિણી ધર્મવર્ધિની । લોકાતીતા ગુણાતીતા સર્વાતીતા શમાત્મિકા ॥ ૧૭૬ ॥
બન્ધૂકકુસુમપ્રખ્યા બાલા લીલાવિનોદિની । સુમંગલી સુખકરી સુવેષાઢ્યા સુવાસિની ॥ ૧૭૭ ॥
સુવાસિન્યર્ચનપ્રીતાઽઽશોભના શુદ્ધમાનસા । બિન્દુતર્પણસન્તુષ્ટા પૂર્વજા ત્રિપુરામ્બિકા ॥ ૧૭૮ ॥
દશમુદ્રાસમારાધ્યા ત્રિપુરાશ્રીવશંકરી । જ્ઞાનમુદ્રા જ્ઞાનગમ્યા જ્ઞાનજ્ઞેયસ્વરૂપિણી ॥ ૧૭૯ ॥
યોનિમુદ્રા ત્રિખણ્ડેશી ત્રિગુણામ્બા ત્રિકોણગા । અનઘાઽદ્ભુતચારિત્રા વાંછિતાર્થપ્રદાયિની ॥ ૧૮૦ ॥
અભ્યાસાતિશયજ્ઞાતા ષડધ્વાતીતરૂપિણી । અવ્યાજકરુણામૂર્તિર્ અજ્ઞાનધ્વાન્તદીપિકા ॥ ૧૮૧ ॥
આબાલગોપવિદિતા સર્વાનુલ્લંઘ્યશાસના । શ્રીચક્રરાજનિલયા શ્રીમત્ત્રિપુરસુન્દરી ॥ ૧૮૨ ॥
શ્રીશિવા શિવશક્ત્યૈક્યરૂપિણી લલિતામ્બિકા । એવં શ્રીલલિતા દેવ્યા નામ્ નાં સાહસ્રકં જગુઃ । ॥ ઇતિ શ્રી બ્રહ્માણ્ડ પુરાણે ઉત્તરખણ્ડે શ્રી હયગ્રીવાગસ્ત્યસંવાદે શ્રીલલિતા સહસ્રનામ સ્તોત્ર કથનં સમ્પૂર્ણમ્ ॥
સ્રોત: Wikisource · CC BY-SA 4.0