હોમ › વેદ મંત્રો › મન્ત્રપુષ્પમ્ (તૈત્તિરીયમ્)

મન્ત્રપુષ્પમ્ (તૈત્તિરીયમ્)

મંત્રો · તૈત્તિરીય આરણ્યક (કૃષ્ણ યજુર્વેદ) · 28 શ્લોક

ૐ ધાતા પુરસ્તાદ્યમુદાજહાર । શક્રઃ પ્રવિદ્વાન્પ્રદિશશ્ચતસ્રઃ । તમેવં વિદ્વાનમૃત ઇહ ભવતિ । નાન્યઃ પન્થા અયનાય વિદ્યતે ॥

ૐ સહસ્રશીર્ષં દેવં વિશ્વાક્ષં વિશ્વશમ્ભુવમ્ । વિશ્વં નારાયણં દેવમક્ષરં પરમં પદમ્ । વિશ્વતઃ પરમાન્નિત્યં વિશ્વં નારાયણગ્ગ્ં હરિમ્ । વિશ્વમેવેદં પુરુષસ્તદ્વિશ્વમુપજીવતિ ॥

પતિં વિશ્વસ્યાત્મેશ્વરગ્ગ્ં શાશ્વતગ્ગ્ં શિવમચ્યુતમ્ । નારાયણં મહાજ્ઞેયં વિશ્વાત્માનં પરાયણમ્ । નારાયણઃ પરો જ્યોતિરાત્મા નારાયણઃ પરઃ । નારાયણઃ પરં બ્રહ્મ તત્ત્વં નારાયણઃ પરઃ ॥

નારાયણઃ પરો ધ્યાતા ધ્યાનં નારાયણઃ પરઃ । યચ્ચ કિંચિજ્જગત્સર્વં દૃશ્યતે શ્રૂયતેઽપિ વા । અન્તર્બહિશ્ચ તત્સર્વં વ્યાપ્ય નારાયણસ્સ્થિતઃ । અનન્તમવ્યયં કવિગ્ગ્ં સમુદ્રેઽન્તં વિશ્વશમ્ભુવમ્ ॥

પદ્મકોશપ્રતીકાશગ્ગ્ં હૃદયં ચાપ્યધોમુખમ્ । અધો નિષ્ટ્યા વિતસ્ત્યાન્તે નાભ્યામુપરિ તિષ્ઠતિ । જ્વાલમાલાકુલં ભાતી વિશ્વસ્યાયતનં મહત્ । સન્તતગ્ગ્ં સિરાભિસ્તુ લમ્બત્યાકોશસન્નિભમ્ ॥

તસ્યાન્તે સુષિરગ્ગ્ં સૂક્ષ્મં તસ્મિન્ સર્વં પ્રતિષ્ઠિતમ્ । તસ્ય મધ્યે મહાનગ્નિર્વિશ્વાર્ચિર્વિશ્વતોમુખઃ । સોઽગ્રભુગ્વિભજન્તિષ્ઠન્નાહારમજરઃ કવિઃ । તિર્યગૂર્ધ્વમધશ્શાયી રશ્મયસ્તસ્ય સન્તતા ॥

સન્તાપયતિ સ્વં દેહમાપાદતલમસ્તકઃ । તસ્ય મધ્યે વહ્નિશિખા અણીયોર્ધ્વા વ્યવસ્થિતા । નીલતોયદમધ્યસ્થા વિદ્યુલ્લેખેવ ભાસ્વરા । નીવારશૂકવત્તન્વી પીતા ભાસ્વત્યણૂપમા ॥

તસ્યાશ્શિખાયા મધ્યે પરમાત્મા વ્યવસ્થિતઃ । સ બ્રહ્મ સ શિવસ્સ હરિસ્સેન્દ્રસ્સોઽક્ષરઃ પરમઃ સ્વરાટ્ ॥

યોઽપાં પુષ્પં વેદ । પુષ્પવાન્પ્રજાવાન્પશુમાન્ભવતિ । ચન્દ્રમા વા અપાં પુષ્પમ્ । પુષ્પવાન્પ્રજાવાન્પશુમાન્ભવતિ । ય એવં વેદ ॥

યોઽપામાયતનં વેદ । આયતનવાન્ભવતિ । અગ્નિર્વા અપામાયતનમ્ । આયતનવાન્ભવતિ । યોઽગ્નેરાયતનં વેદ । આયતનવાન્ભવતિ । આપો વા અગ્નેરાયતનમ્ । આયતનવાન્ભવતિ । ય એવં વેદ ॥

યોઽપામાયતનં વેદ । આયતનવાન્ભવતિ । વાયુર્વા અપામાયતનમ્ । આયતનવાન્ભવતિ । યો વાયોરાયતનં વેદ । આયતનવાન્ભવતિ । આપો વૈ વાયોરાયતનમ્ । આયતનવાન્ભવતિ । ય એવં વેદ ॥

યોઽપામાયતનં વેદ । આયતનવાન્ભવતિ । અસૌ વૈ તપન્નપામાયતનમ્ । આયતનવાન્ભવતિ । યોઽમુષ્ય તપત આયતનં વેદ । આયતનવાન્ભવતિ । આપો વા અમુષ્ય તપત આયતનમ્ । આયતનવાન્ભવતિ । ય એવં વેદ ॥

યોઽપામાયતનં વેદ । આયતનવાન્ભવતિ । ચન્દ્રમા વા અપામાયતનમ્ । આયતનવાન્ભવતિ । યશ્ચન્દ્રમસ આયતનં વેદ । આયતનવાન્ભવતિ । આપો વૈ ચન્દ્રમસ આયતનમ્ । આયતનવાન્ભવતિ । ય એવં વેદ ॥

યોઽપામાયતનં વેદ । આયતનવાન્ભવતિ । નક્ષત્રાણિ વા અપામાયતનમ્ । આયતનવાન્ભવતિ । યો નક્ષત્રાણામાયતનં વેદ । આયતનવાન્ભવતિ । આપો વૈ નક્ષત્રાણામાયતનમ્ । આયતનવાન્ભવતિ । ય એવં વેદ ॥

યોઽપામાયતનં વેદ । આયતનવાન્ભવતિ । પર્જન્યો વા અપામાયતનમ્ । આયતનવાન્ભવતિ । યઃ પર્જન્યસ્યાયતનં વેદ । આયતનવાન્ભવતિ । આપો વૈ પર્જન્યસ્યાયતનમ્ । આયતનવાન્ભવતિ । ય એવં વેદ ॥

યોઽપામાયતનં વેદ । આયતનવાન્ભવતિ । સંવત્સરો વા અપામાયતનમ્ । આયતનવાન્ભવતિ । યસ્સંવત્સરસ્યાયતનં વેદ । આયતનવાન્ભવતિ । આપો વૈ સંવત્સરસ્યાયતનમ્ । આયતનવાન્ભવતિ । ય એવં વેદ ॥

યોઽપ્સુ નાવં પ્રતિષ્ઠિતાં વેદ । પ્રત્યેવ તિષ્ઠતિ ॥

કિં તદ્વિષ્ણોર્બલમાહુઃ । કા દીપ્તિઃ કિં પરાયણમ્ । એકો યદ્ધારયદ્દેવઃ । રેજતી રોદસી ઉભે । વાતાદ્વિષ્ણોર્બલમાહુઃ । અક્ષરાદ્દીપ્તિરુચ્યતે । ત્રિપદાદ્ધારયદ્દેવઃ । યદ્વિષ્ણોરેકમુત્તમમ્ ॥

રાજાધિરાજાય પ્રસહ્યસાહિને । નમો વયં વૈશ્રવણાય કુર્મહે । સ મે કામાન્કામકામાય મહ્યમ્ । કામેશ્વરો વૈશ્રવણો દદાતુ । કુબેરાય વૈશ્રવણાય । મહારાજાય નમઃ ॥

ઓં તદ્બ્રહ્મ । ઓં તદ્વાયુઃ । ઓં તદાત્મા । ઓં તત્સત્યમ્ । ઓં તત્સર્વમ્ । ઓં તત્પુરોર્નમઃ ॥

અન્તશ્ચરતિ ભૂતેષુ ગુહાયાં વિશ્વમૂર્તિષુ । ત્વં યજ્ઞસ્ત્વં વષટ્કારસ્ત્વમિન્દ્રસ્ત્વગ્ગ્ં રુદ્રસ્ત્વં વિષ્ણુસ્ત્વં બ્રહ્મ ત્વં પ્રજાપતિઃ । ત્વં તદાપ આપો જ્યોતી રસોઽમૃતં બ્રહ્મ ભૂર્ભુવસ્સુવરોમ્ ॥

ઈશાનસ્સર્વવિદ્યાનામીશ્વરસ્સર્વભૂતાનાં । બ્રહ્માધિપતિર્બ્રહ્મણોઽધિપતિર્બ્રહ્મા શિવો મે અસ્તુ સદાશિવોમ્ ॥

તદ્વિષ્ણોઃ પરમં પદગ્ગ્ં સદા પશ્યન્તિ સૂરયઃ । દિવીવ ચક્ષુરાતતમ્ । તદ્વિપ્રાસો વિપન્યવો જાગૃવાગ્ગ્ંસસ્સમિન્ધતે । વિષ્ણોર્યત્પરમં પદમ્ ॥

ઋતગ્ગ્ં સત્યં પરં બ્રહ્મ પુરુષં કૃષ્ણપિંગલમ્ । ઊર્ધ્વરેતં વિરૂપાક્ષં વિશ્વરૂપાય વૈ નમો નમઃ ॥

ૐ નારાયણાય વિદ્મહે વાસુદેવાય ધીમહિ । તન્નો વિષ્ણુઃ પ્રચોદયાત્ ॥

મહાદેવ્યૈ ચ વિદ્મહે વિષ્ણુપત્ની ચ ધીમહિ । તન્નો લક્ષ્મીઃ પ્રચોદયાત્ ॥

આકાશાત્પતિતં તોયં યથા ગચ્છતિ સાગરમ્ । સર્વદેવનમસ્કારઃ કેશવં પ્રતિગચ્છતિ ॥

ૐ શાન્તિશ્શાન્તિશ્શાન્તિઃ ॥

સ્રોત: Wikisource · CC BY-SA 4.0

તમારો પ્રતિભાવ મોકલો

શું સુધારવું, શું ખોટું છે, કે તમને શું ગમ્યું તે જણાવો. અમે દરેક સંદેશ વાંચીએ છીએ.

શેના વિશે
શંખ તમારા માટે કેટલું ઉપયોગી છે? (વૈકલ્પિક)