॥ અથ શ્રી વેંકટેશ સુપ્રભાતમ્ ॥
કૌસલ્યા સુપ્રજા રામ પૂર્વા સન્ધ્યા પ્રવર્તતે ઉત્તિષ્ઠ નરશાર્દૂલ કર્તવ્યં દૈવમાહ્નિકમ્ ॥ ૧
ઉત્તિષ્ઠોત્તિષ્ઠ ગોવિન્દ ઉત્તિષ્ઠ ગરુડધ્વજ ઉત્તિષ્ઠ કમલાકાન્ત ત્રૈલોક્યં મંગલં કુરુ ॥ ૨
માતસ્સમસ્તજગતાં મધુકૈટભારેઃ વક્ષોવિહારિણિ મનોહરદિવ્યમૂર્તે । શ્રીસ્વામિનિ શ્રિતજનપ્રિયદાનશીલે શ્રીવેંકટેશદયિતે તવ સુપ્રભાતમ્ ॥ ૩
તવ સુપ્રભાતમરવિન્દલોચને ભવતુ પ્રસન્નમુખચન્દ્રમણ્ડલે । વિધિશંકરેન્દ્રવનિતાભિરર્ચિતે વૃષશૈલનાથદયિતે દયાનિધે ॥ ૪
અત્ર્યાદિસપ્તઋષયસ્સમુપાસ્ય સન્ધ્યાં આકાશસિન્ધુકમલાનિ મનોહરાણિ । આદાય પાદયુગમર્ચયિતું પ્રપન્નાઃ શેષાદ્રિશેખરવિભો તવ સુપ્રભાતમ્ ॥ ૫
પંચાનનાબ્જભવષણ્મુખવાસવાદ્યાઃ ત્રૈવિક્રમાદિચરિતં વિબુધાઃ સ્તુવન્તિ । ભાષાપતિઃ પઠતિ વાસર શુદ્ધિમારાત્ શેષાદ્રિશેખરવિભો તવ સુપ્રભાતમ્ ॥ ૬
ઈષત્પ્રફુલ્લસરસીરુહનારિકેલ પૂગદ્રુમાદિસુમનોહરપાલિકાનાં । આવાતિ મન્દમનિલસ્સહ દિવ્યગન્ધૈઃ શેષાદ્રિશેખરવિભો તવ સુપ્રભાતમ્ ॥ ૭
ઉન્મીલ્ય નેત્રયુગમુત્તમ પંજરસ્થાઃ પાત્રાવશિષ્ટકદલીફલપાયસાનિ । ભુક્ત્વા સલીલમથ કેલિશુકાઃ પઠન્તિ શેષાદ્રિશેખરવિભો તવ સુપ્રભાતમ્ ॥ ૮
તન્ત્રીપ્રકર્ષમધુરસ્વનયા વિપંચ્યા ગાયત્યનન્તિચરિતં તવ નારદોઽપિ । ભાષાસમગ્રમસકૃત્કરચારરમ્યં શેષાદ્રિશેખરવિભો તવ સુપ્રભાતમ્ ॥ ૯
ભૃંગાવલી ચ મકરન્દરસાનુવિદ્ધ ઝંકારગીત નિનદૈઃસહ સેવનાય । નિર્યાત્યુપાન્તસરસીકમલોદરેભ્યઃ શેષાદ્રિશેખરવિભો તવ સુપ્રભાતમ્ ॥ ૧૦
યોષાગણેન વરદધ્નિવિમથ્યમાને ઘોષાલયેષુ દધિમન્થનતીવ્રઘોષાઃ । રોષાત્કલિં વિદધતેકકુભશ્ચ કુમ્ભાઃ શેષાદ્રિશેખરવિભો તવ સુપ્રભાતમ્ ॥ ૧૧
પદ્મેશમિત્રશતપત્રગતાલિવર્ગાઃ હર્તું શ્રિયં કુવલયસ્ય નિજાંગલક્ષ્મ્યા । ભેરીનિનાદમિવ બિભ્રતિ તીવ્રનાદં શેષાદ્રિશેખરવિભો તવ સુપ્રભાતમ્ ॥ ૧૨
શ્રીમન્નભીષ્ટ વરદાખિલલોકબન્ધો શ્રીશ્રીનિવાસ જગદેકદયૈકસિન્ધો । શ્રીદેવતાગૃહભુજાન્તર દિવ્ય મૂર્તે શ્રીવેંકટાચલપતે તવ સુપ્રભાતમ્ ॥ ૧૩
શ્રીસ્વામિપુષ્કરિણિકાઽઽપ્લવનિર્મલાંગાઃ શ્રેયોઽર્થિનો હરવિરિંચસનન્દનાદ્યાઃ । દ્વારે વસન્તિ વરવેત્રહતોત્તમાંગાઃ શ્રીવેંકટાચલપતે તવ સુપ્રભાતમ્ ॥ ૧૪
શ્રી શેષશૈલ ગરુડાચલ વેંકટાદ્રિ નારાયણાદ્રિ વૃષભાદ્રિ વૃષાદ્રિ મુખ્યામ્ । આખ્યામ્ ત્વદીય વસતેરનિશં વદન્તિ શ્રીવેંકટાચલપતે તવ સુપ્રભાતમ્ ॥ ૧૫
સેવાપરાઃ શિવસુરેશકૃશાનુધર્મ રક્ષોઽમ્બુનાથ પવમાન ધનાધિનાથાઃ । બદ્ધાંજલિ પ્રવિલસન્નિજશીર્ષ દેશાઃ શ્રીવેંકટાચલપતે તવ સુપ્રભાતમ્ ॥ ૧૬
ઘાટીષુ તે વિહગરાજ મૃગાધિરાજ- નાગાધિરાજ ગજરાજ હયાધિરાજાઃ । સ્વસ્વાધિકાર મહિમાધિકમર્થયન્તે શ્રીવેંકટાચલપતે તવ સુપ્રભાતમ્ ॥ ૧૭
સૂર્યેન્દુ ભૌમ બુધ વાક્પતિ કાવ્ય સૌરિ સ્વર્ભાનુ કેતુ દિવિષત્પરિષત્પ્રધાનાઃ । ત્વદ્દાસ દાસ ચરમાવધિ દાસદાસાઃ શ્રીવેંકટાચલપતે તવ સુપ્રભાતમ્ ॥ ૧૮
ત્વત્પાદધૂલિ ભરિતસ્ફુરિતોત્તમાંગાઃ સ્વર્ગાપવર્ગ નિરપેક્ષ નિજાન્તરંગાઃ । કલ્પાગમાઽઽકલનયાઽઽકુલતાં લભન્તે શ્રીવેંકટાચલપતે તવ સુપ્રભાતમ્ ॥ ૧૯
ત્વદ્ગોપુરાગ્રશિખરાણિ નિરીક્ષમાણાઃ સ્વર્ગાપવર્ગપદવીં પરમાં શ્રયન્તઃ । મર્ત્યા મનુષ્યભુવને મતિમાશ્રયન્તે શ્રીવેંકટાચલપતે તવ સુપ્રભાતમ્ ॥ ૨૦
શ્રીભૂમિનાયક દયાદિગુણામૃતાબ્ધે દેવાધિદેવ જગદેકશરણ્યમૂર્તે । શ્રીમન્નનન્ત ગરુડાદિભિરર્ચિતાંઘ્રે શ્રીવેંકટાચલપતે તવ સુપ્રભાતમ્ ॥ ૨૧
શ્રીપદ્મનાભ પુરુષોત્તમ વાસુદેવ વૈકુણ્ઠ માધવ જનાર્દન ચક્રપાણે । શ્રીવત્સચિન્હ શરણાગતપારિજાત શ્રીવેંકટાચલપતે તવ સુપ્રભાતમ્ ॥ ૨૨
કન્દર્પદર્પ હરસુન્દર દિવ્યમૂર્તે કાન્તાકુચામ્બુરુહ કુટ્મલ લોલદૃષ્ટે । કલ્યાણનિર્મલગુણાકર દિવ્યકીર્તે શ્રીવેંકટાચલપતે તવ સુપ્રભાતમ્ ॥ ૨૩
મીનાકૃતે કમઠ કોલ નૃસિંહ વર્ણિન્ સ્વામિન્ પરશ્વથતપોધન રામચન્દ્ર । શેષાંશરામ યદુનન્દન કલ્કિરૂપ શ્રીવેંકટાચલપતે તવ સુપ્રભાતમ્ ॥ ૨૪
એલા લવંગ ઘનસાર સુગન્ધિ તીર્થં દિવ્યં વિયત્સરિતિ હેમઘટેષુ પૂર્ણમ્ । ધૃત્વાઽઽદ્ય વૈદિક શિખામણયઃ પ્રહૃષ્ટાઃ તિષ્ઠન્તિ વેંકટપતે તવ સુપ્રભાતમ્ ॥ ૨૫
ભાસ્વાનુદેતિ વિકચાનિ સરોરુહાણિ સંપૂરયન્તિ નિનદૈઃ કકુભો વિહંગાઃ । શ્રીવૈષ્ણવાસ્સતતમર્થિત મંગલાસ્તે ધામાઽઽશ્રયન્તિ તવ વેંકટ સુપ્રભાતમ્ ॥ ૨૬
બ્રહ્માદયઃ સુરવરાસ્સમહર્ષયસ્તે સન્તસ્સનન્દન મુખાસ્ત્વથ યોગિવર્યાઃ । ધામાન્તિકે તવ હિ મંગલવસ્તુ હસ્તાઃ શ્રીવેંકટાચલપતે તવ સુપ્રભાતમ્ ॥ ૨૭
લક્ષ્મીનિવાસ નિરવદ્યગુણૈકસિન્ધો સંસાર સાગર સમુત્તરણૈકસેતો । વેદાન્તવેદ્યનિજવૈભવ ભક્તભોગ્ય શ્રીવેંકટાચલપતે તવ સુપ્રભાતમ્ ॥ ૨૮
ઇત્થં વૃષાચલપતેરિહ સુપ્રભાતમ્ યે માનવાઃ પ્રતિદિનં પઠિતું પ્રવૃત્તાઃ । તેષાં પ્રભાતસમયે સ્મૃતિરંગભાજાં પ્રજ્ઞાં પરાર્થસુલભાં પરમાં પ્રસૂતે ॥ ૨૯
॥ ઇતિ વેંકટેશ સુપ્રભાતમ્ ॥
સ્રોત: Wikisource · CC BY-SA 4.0