ಶ್ರೀಶಿವಸಹಸ್ರನಾಮಸ್ತೋತ್ರಮ್ (ಮಹಾಭಾರತಮ್)
ಸಹಸ್ರನಾಮಗಳು (1000 ನಾಮಗಳು) · 184 ಶ್ಲೋಕಗಳು
॥ ಶ್ರೀಶಿವಸಹಸ್ರನಾಮಸ್ತೋತ್ರಮ್ ॥
ವಂದೇ ಶಂಭುಮುಮಾಪತಿಂ ಸುರಗುರುಂ ವಂದೇ ಜಗತ್ಕಾರಣಂ ವಂದೇ ಪನ್ನಗಭೂಷಣಂ ಮೃಗಧರಂ ವಂದೇ ಪಶೂನಾಂ ಪತಿಮ್ । ವಂದೇ ಸೂರ್ಯಶಶಾಂಕವಹ್ನಿನಯನಂ ವಂದೇ ಮುಕುಂದಪ್ರಿಯಂ ವಂದೇ ಭಕ್ತಜನಾಶ್ರಯಂ ಚ ವರದಂ ವಂದೇ ಶಿವಂ ಶಂಕರಮ್ ವಾಸುದೇವಃ- ತತಸ್ಸ ಪ್ರಯತೋ ಭೂತ್ವಾ ಮಮ ತಾತ ಯುಧಿಷ್ಠಿರ । ಪ್ರಾಂಜಲಿಃ ಪ್ರಾಹ ವಿಪ್ರರ್ಷಿನಾಮಸಂಗ್ರಹಮಾದಿತಃ ॥
ಉಪಮನ್ಯುಃ- ಬ್ರಹ್ಮಪ್ರೋಕ್ತೈರ್ಋಷಿಪ್ರೋಕ್ತೈರ್ವೇದವೇದಾಂಗಸಂಭವೈಃ। ಸರ್ವಲೋಕೇಷು ವಿಖ್ಯಾತಂ ಸ್ತುತ್ಯಂ ಸ್ತೋಷ್ಯಾಮಿ ನಾಮಭಿಃ॥
ಮಹದ್ಭಿರ್ವಿಹಿತೈಸ್ಸತ್ಯೈಸ್ಸಿದ್ಧೈಸ್ಸರ್ವಾರ್ಥಸಾಧಕೈಃ। ಋಷಿಣಾ ತಂಡಿನಾ ಭಕ್ತ್ಯಾ ಕೃತೈರ್ವೇದಕೃತಾತ್ಮನಾ ॥
ಯಥೋಕ್ತೈಸ್ಸಾಧುಭಿಃ ಖ್ಯಾತೈರ್ಮುನಿಭಿಸ್ತತ್ತ್ವದರ್ಶಿಭಿಃ । ಪ್ರವರಂ ಪ್ರಥಮ ಸ್ವರ್ಗ್ಯಂ ಸರ್ವಭೂತಹಿತಂ ಶುಭಮ್ ॥
ಶ್ರುತೈಸ್ಸರ್ವತ್ರ ಜಗತಿ ಬ್ರಹ್ಮಲೋಕಾವತಾರಿತೈಃ। ಸತ್ಯೈಸ್ತತ್ಪರಮಂ ಬ್ರಹ್ಮ ಬ್ರಹ್ಮಪ್ರೋಕ್ತೈಸ್ಸನಾತನಮ್ ॥೫
ವಕ್ಷ್ಯೇ ಯದುಕುಲಶ್ರೇಷ್ಠ ಶೃಣುಷ್ವಾವಹಿತೋ ಮಮ । ವರಯೈನಂ ಭವಂ ದೇವಂ ಭಕ್ತಸ್ವಂ ಪರಮೇಶ್ವರಮ್ ॥೬
ತೇನ ತೇ ಶ್ರಾವಯಿಷ್ಯಾಮಿ ಯತ್ತದ್ಬ್ರಹ್ಮ ಸನಾತನಮ್ । ನ ಶಕ್ಯಂ ವಿಸ್ತರಾತ್ಕೃತ್ಸ್ನಂ ವಕ್ತುಂ ಶರ್ವಸ್ಯ ಕೇನಚಿತ್ ॥ ೭
ಯುಕ್ತೇನಾಪಿ ವಿಭೂತೀನಾಮಪಿ ವರ್ಷಶತೈರಪಿ । ಯಸ್ಯಾದಿಮಧ್ಯಮಾಂತಾನಿ ಗಮ್ಯಂತೇ ನ ಸುರೈರಪಿ ॥೮
ಕಸ್ತಸ್ಯ ಶಕ್ನುಯಾದ್ವಕ್ತುಂ ಗುಣಾನ್ ಕಾರ್ತ್ಸ್ನ್ಯೇನ ಮಾಧವ । ಕಿಂತು ದೇವಸ್ಯ ಮಹತಸ್ಸಂಕ್ಷಿಪ್ತಾರ್ಥಪದಾಕ್ಷರಮ್ ॥೯
ಶಕ್ತಿತಶ್ಚರಿತಂ ವಕ್ಷ್ಯೇ ಪ್ರಸಾದಾತ್ತಸ್ಯ ಧೀಮತಃ। ಅಪ್ರಾಪ್ಯ ತು ತತೋಽನುಜ್ಞಾಂ ನ ಶಕ್ಯಃ ಸ್ತೋತುಮೀಶ್ವರಃ ॥೧೦
ಯದಾ ತೇನಾಭ್ಯನುಜ್ಞಾತಸ್ಸ್ತುತೋ ವೈ ಸ ತದಾ ಮಯಾ । ಅನಾದಿನಿಧನಸ್ಯಾಹಂ ಜಗದ್ಯೋನೇರ್ಮಹಾತ್ಮನಃ ॥೧೧
ನಾಮ್ನಾಂ ಕಿಂಚಿತ್ಸಮುದ್ದೇಶಂ ವಕ್ಷ್ಯಾಮ್ಯವ್ಯಕ್ತಯೋನಿನಃ । ವರದಸ್ಯ ವರೇಣ್ಯಸ್ಯ ವಿಶ್ವರೂಪಸ್ಯ ಧೀಮತಃ ॥ ೧೨
ಶೃಣು ನಾಮ್ನಾಂ ಚಯಂ ಕೃಷ್ಣ ಯದುಕ್ತಂ ಪದ್ಮಯೋನಿನಾ । ದಶನಾಮಸಹಸ್ರಾಣಿ ಯಾನ್ಯಾಹ ಪ್ರಪಿತಾಮಹಃ ॥ ೧೩
ತಾನಿ ನಿರ್ಮಥ್ಯ ಮನಸಾ ದಧ್ನೋ ಘೃತಮಿವೋದ್ಧೃತಮ್ । ಗಿರೇಸ್ಸಾರಂ ಯಥಾ ಹೇಮ ಪುಷ್ಪಸಾರಂ ಯಥಾ ಮಧು ॥ ೧೪
ಘೃತಾತ್ಸಾರಂ ಯಥಾ ಮಂಡಂ ತಥೈತಸ್ಸಾರಮುದ್ಧೃತಮ್ । ಸರ್ವಪಾಪಾಪಹಮಿದಂ ಚತುರ್ವೇದಸಮನ್ವಿತಮ್ ॥ ೧೫
ಪ್ರಯತ್ನೇನಾಧಿಗಂತವ್ಯಂ ಧಾರ್ಂಯ ಚ ಪ್ರಯತಾತ್ಮನಾ । ಮಾಂಗಳ್ಯಂ ಪೌಷ್ಟಿಕಂ ಚೈವ ರಕ್ಷೋಘ್ನಂ ಪಾವನಂ ಮಹತ್ ॥ ೧೬
ಇದಂ ಭಕ್ತಾಯ ದಾತವ್ಯಂ ಶ್ರದ್ಧಯಾಽನಾಸ್ತಿಕಾಯ ಚ । ನಾಶ್ರದ್ದಧಾನರೂಪಾಯ ನಾಸ್ತಿಕಾಯಾಜಿತಾತ್ಮನೇ ॥೧೭
ಯಶ್ಚಾಭ್ಯಸೂಯತೇ ದೇವಂ ಕಾರಣಾತ್ಮಾನಮೀಶ್ವರಮ್ । ಸ ಕೃಷ್ಣ ನರಕಂ ಯಾತಿ ಸಹ ಪೂರ್ವೈಸ್ಸಹಾತ್ಮಜಃ ॥ ೧೮
ಇದಂ ಧ್ಯಾನಮಿದಂ ಯೋಗಮಿದಂ ಧ್ಯೇಯಮನುತ್ತಮಮ್ । ಇದಂ ಜಪ್ಯಮಿದಂ ಜ್ಞಾನಂ ರಹಸ್ಯಮಿದಮುತ್ತಮಮ್ ॥೧೯
ಯಂ ಜ್ಞಾತ್ವಾ ಹ್ಯಂತಕಾಲೇಽಪಿ ಗಚ್ಛೇತ ಪರಮಾಂ ಗತಿಮ್ । ಪವಿತ್ರಂ ಮಂಗಳಂ ಮೇಧ್ಯಂ ಕಲ್ಯಾಣಮಿದಮುತ್ತಮಮ್ ॥೨೦
ಇದಂ ಬ್ರಹ್ಮಾ ಪುರಾ ಕೃತ್ವಾ ಸರ್ವಲೋಕಪಿತಾಮಹಃ । ಸರ್ವಸ್ತವಾನಾಂ ರಾಜತ್ವೇ ದಿವ್ಯಾನಾಂ ಸಮಕಲ್ಪಯತ್ ॥ ೨೧
ತದಾಪ್ರಭೃತಿ ಚೈವಾಯಮೀಶ್ವರಸ್ಯ ಮಹಾತ್ಮನಃ । ಸ್ತವರಾಜ ಇತಿ ಖ್ಯಾತೋ ಜಗತ್ಯಮರಪೂಜಿತಃ ॥ ೨೨
ಬ್ರಹ್ಮಲೋಕಾದಯಂ ಸ್ವರ್ಗೇ ಸ್ತವರಾಜೋಽವತಾರಿತಃ। ಯತಸ್ತಂಡಿಃ ಪುರಾ ಪ್ರಾಪ ತೇನ ತಂಡಿಕೃತೋಽಭವತ್ ॥೨೩
ಸ್ವರ್ಗಾಶ್ಚೈವಾತ್ರ ಭೂಲೋಕಂ ತಂಡಿನಾ ಹ್ಯವತಾರಿತಃ । ಸರ್ವಮಂಗಳಮಾಂಗಲ್ಯಂ ಸರ್ವಪಾಪಪ್ರಣಾಶನಮ್ ॥೨೪
ನಿಗದಿಷ್ಯೇ ಮಹಾಬಾಹೋ ಸ್ತವಾನಾಮುತ್ತಮಂ ಸ್ತವಮ್ । ಬ್ರಹ್ಮಣಾಮಪಿ ಯದ್ಬ್ರಹ್ಮ ಪರಾಣಾಮಪಿ ಯತ್ಪರಮ್ ॥೨೫
ತೇಜಸಾಮಪಿ ಯತ್ತೇಜಸ್ತಪಸಾಮಪಿ ಯತ್ತಪಃ । ಶಾಂತಾನಾಮಪಿ ಯಶ್ಶಾಂತೋ ದ್ಯುತೀನಾಮಪಿ ಯಾ ದ್ಯುತಿಃ॥೨೬
ದಾಂತಾನಾಮಪಿ ಯೋ ದಾಂತೋ ಧೀಮತಾಮಪಿ ಯಾ ಚ ಧೀಃ । ದೇವಾನಾಮಪಿ ಯೋ ದೇವ ಋಷೀಣಾಮಪಿ ಯಸ್ತ್ವೃಷಿಃ ॥ ೨೭
ಯಜ್ಞಾನಾಮಪಿ ಯೋ ಯಜ್ಞಶಿಶವಾನಾಮಪಿ ಯಶ್ಶಿವಃ । ರುದ್ರಾಣಾಮಪಿ ಯೋ ರುದ್ರಃ ಪ್ರಭಾ ಪ್ರಭವತಾಮಪಿ ॥೨೮
ಯೋಗಿನಾಮಪಿ ಯೋ ಯೋಗೀ ಕಾರಣಾನಾಂ ಚ ಕಾರಣಮ್ । ಯತೋ ಲೋಕಾಸ್ಸಂಭವಂತಿ ನ ಭವಂತಿ ಯತಃ ಪುನಃ॥ ೨೯
ಸರ್ವಭೂತಾತ್ಮಭೂತಸ್ಯ ಹರಸ್ಯಾಮಿತತೇಜಸಃ । ಅಷ್ಟೋತ್ತರಸಹಸ್ರಂ ತು ನಾಮ್ನಾಂ ಸರ್ವಸ್ಯ ಮೇ ಶೃಣು ॥೩೦
ಯಚ್ಛ್ರುತ್ವಾ ಮನುಜವ್ಯಾಘ್ರ ಸರ್ವಾನ್ ಕಾಮಾನವಾಪ್ಸ್ಯಸಿ । ಸ್ಥಿರಃ ಸ್ಥಾಣುಃ ಪ್ರಭುರ್ಭೀಮಃ ಪ್ರವರೋ ವರದೋ ವರಃ ॥ ೩೧
ಸರ್ವಾತ್ಮಾ ಸರ್ವವಿಖ್ಯಾತಃ ಸರ್ವಸ್ಸರ್ವಕರೋ ಭವಃ । ಜಟೀ ಚರ್ಮೀ ಶಿಖಂಡೀ ಚ ಸರ್ವಾಂಗಸ್ಸರ್ವಭಾವನಃ ॥ ೩೨
ಹರಶ್ಚ ಹರಿಣಾಕ್ಷಶ್ವ ಸರ್ವಭೂತಹರಃ ಪ್ರಭುಃ। ಪ್ರವೃತ್ತಿಶ್ಚ ನಿವೃತ್ತಿಶ್ಚ ನಿಯತಶ್ಶಾಶ್ವತೋ ಧ್ರುವಃ ॥೩೩
ಶ್ಮಶಾನವಾಸೀ ಭಗವಾನ್ ಖಚರೋ ಗೋಚರೋಽರ್ದನಃ । ಅಭಿವಾದ್ಯೋ ಮಹಾಕರ್ಮಾ ತಪಸ್ವೀ ಭೂತಭಾವನಃ ॥೩೪
ಉನ್ಮತ್ತವೇಷಃ ಪ್ರಚ್ಛನ್ನಸ್ಸರ್ವಲೋಕಪ್ರಜಾಪತಿಃ। ಮಹಾರೂಪೋ ಮಹಾಕಾಯೋ ವೃಷರೂಪೋ ಮಹಾಯಶಾಃ ॥೩೫
ಮಹಾತ್ಮಾ ಸರ್ವಭೂತಾತ್ಮಾ ವಿಶ್ವರೂಪೋ ಮಹಾಹನು । ಲೋಕಪಾಲೋಽಂತರ್ಹಿತಾತ್ಮಾ ಪ್ರಸಾದೋ ನೀಲಲೋಹಿತಃ ॥೩೬
ಪವಿತ್ರಂ ಚ ಮಹಾಂಶ್ಚೈವ ನಿಯಮೋ ನಿಯಮಾಶ್ರಿತಃ। ಸರ್ವಕರ್ಮಾ ಸ್ವಯಂಭೂತ ಆದಿರಾದಿಕರೋ ನಿಧಿಃ ॥೩೭
ಸಹಸ್ರಾಕ್ಷೋ ವಿಶಾಲಾಕ್ಷಸ್ಸೋಮೋ ನಕ್ಷತ್ರಸಾಧಕಃ । ಚಂದ್ರಸ್ಸೂರ್ಯಶ್ಶನಿಃ ಕೇತುರ್ಗ್ರಹೋ ಗ್ರಹಪತಿರ್ವರಃ ॥೩೮
ಆದಿರಂತೋ ಲಯಃ ಕರ್ತಾ ಮೃಗಬಾಣಾರ್ಪಣೋಽನಘಃ । ಮಹಾತಪಾ ಘೋರತಪಾ ಅದೀನೋ ದೀನಸಾಧಕಃ ॥ ೩೯
ಸಂವತ್ಸರಕರೋ ಮಂತ್ರಃ ಪ್ರಮಾಣಂ ಪರಮಂ ತಪಃ। ಯೋಗೀ ಯೋಜ್ಯೋ ಮಹಾಬೀಜೋ ಮಹಾರೇತಾ ಮಹಾಬಲಃ ॥ ೪೦
ಸುವರ್ಣರೇತಾಸ್ಸರ್ವಜ್ಞಸ್ಸುಬೀಜೋ ಬೀಜವಾಹನಃ । ದಶಬಾಹುಸ್ಸ್ವನಿಮಿಷೋ ನೀಲಕಂಠ ಉಮಾಪತಿಃ॥೪೧
ವಿಶ್ವರೂಪಸ್ವಯಂಶ್ರೇಷ್ಠೋ ಬಲವೀರೋ ಬಲೋ ಗಣಃ । ಗಣಕರ್ತಾ ಗಣಪತಿರ್ದಿಗ್ವಾಸಾಃ ಕಾಮ ಏವ ಚ ॥ ೪೨
ಮಂತ್ರವಿತ್ಪರಮೋ ಮಂತ್ರಃ ಸರ್ವಭಾವಕರೋ ಹರಃ। ಕಮಂಡಲುಧರೋ ಧನ್ವೀ ಬಾಣಹಸ್ತಃ ಕಪಾಲವಾನ್ ॥ ೪೩
ಅಶನೀ ಶತಘ್ನೀ ಖಡ್ಗೀ ಪಟ್ಟಿಶೀ ಚಾಯುಧೀ ಮಹಾನ್ । ಸುವಹಸ್ತಸ್ಸುರೂಪಶ್ಚ ತೇಜಸ್ತೇಜಸ್ಕರೋ ನಿಧಿಃ ॥೪೪
ಉಷ್ಣೀಷೀ ವ ಸುವಕ್ತ್ರಶ್ಚ ಉದಗ್ರೋ ವಿನತಸ್ತಥಾ । ದೀರ್ಘಶ್ಚ ಹರಿಕೇಶಶ್ಚ ಸುತೀರ್ಥಃ ಕೃಷ್ಣ ಏವ ಚ ॥೪೫
ಸೃಗಾಲರೂಪಃ ಸಿದ್ಧಾರ್ಥೋ ಮುಂಡಸ್ಸರ್ವಶುಭಂಕರಃ । ಅಜಶ್ಚ ಬಹುರೂಪಶ್ಚ ಗಂಗಾಧಾರೀ ಕಪರ್ದ್ಯಪಿ ॥೪೬
ಊರ್ಧ್ವರೇತಾ ಊರ್ಧ್ವಲಿಂಗ ಊರ್ಧ್ವಶಾಯೀ ನಭಃ ಸ್ಥಲಃ । ತ್ರಿಜಟಶ್ಚೀರವಾಸಾಶ್ಚ ರುದ್ರಸ್ಸೇನಾಪತಿರ್ವಿಭುಃ ॥೪೭
ನಕ್ತಂಚರೋಽಹಶ್ಚರಶ್ಚ ತಿಗ್ಮಮನ್ಯುಸ್ಸುವರ್ಚಸಃ । ಗಜಹಾ ದೈತ್ಯಹಾ ಕಾಲೋ ಲೋಕಧಾತಾ ಗುಣಾಕರಃ॥ ೪೮
ಸಿಂಹಶಾರ್ದೂಲರೂಪಶ್ಚ ವ್ಯಾಘ್ರಚರ್ಮಾಂಬರಾವೃತಃ । ಕಾಲಯೋಗೀ ಮಹಾನಾಥಸ್ಸರ್ವಕಾಮಶ್ಚತುಷ್ಪಥಃ ॥೪೯
ನಿಶಾಚರಃ ಪ್ರೇತರಾಜೋ ಭೂತಚಾರೀ ಮಹೇಶ್ವರಃ। ಬಹುಭೂತೋ ಬಹುಧರಃ ಸ್ವರ್ಭಾನುರಮಿತೋ ಗತಿಃ ॥೫೦
ನೃತ್ಯಪ್ರಿಯೋ ನಿತ್ಯನರ್ತೋ ನರ್ತಕಸ್ಸವಲಾಲಸಃ। ಮಹಾಘೋರತಪಾಶ್ಶೂರೋ ನಿತ್ಯೋಽನೀಹೋ ನಿರಾಲಯಃ॥ ೫೧
ಸಹಸ್ರಹಸ್ತೋ ವಿಜಯೋ ವ್ಯವಸಾಯೋ ಹ್ಯತಂದ್ರಿತಃ । ಅಮರ್ಷಣೋಽಮರ್ಷಣಾತ್ಮಾ ಯಜ್ಞಹಾ ಕಾಮನಾಶಕಃ ॥ ೫೨
ದಕ್ಷಯಾಗಾಪಹಾರೀ ಚ ಸುಸಹೋ ಮಧ್ಯಮಸ್ತಥಾ । ತೇಜೋಪಹಾರೀ ಬಲಹಾ ಮುದಿತೋಽರ್ಥೋಽಜಿತಾ ವರಃ ॥ ೫೩
ಗಂಭೀರಘೋಷೋ ಗಂಭೀರೋ ಗಂಭೀರಬಲವಾಹನಃ । ನ್ಯಗ್ರೋಧರೂಪೋ ನ್ಯಗ್ರೋಧವೃಕ್ಷಕರ್ಣಸ್ಥಿತಿರ್ವಿಭುಃ ॥ ೫೪
ಸುತೀಕ್ಷ್ಣದಶನಶ್ಚೈವ ಮಹಾಕಾಯೋ ಮಹಾನನಃ । ವಿಷ್ವಕ್ಸೇನೋ ಹರಿಯಜ್ಞಸ್ಸಂಯುಗಾಪೀಡವಾಹನಃ ॥೫೫
ತೀಕ್ಷ್ಣತಾಪಶ್ಚ ಹರ್ಯಶ್ವಸ್ಸಹಾಯಃ ಕರ್ಮಕಾಲವಿತ್ । ವಿಷ್ಣುಪ್ರಸಾದಿತೋ ಯಜ್ಞಸ್ಸಮುದ್ರೋ ಬಡಬಾಮುಖಃ ॥೫೬
ಹುತಾಶನಸಹಾಯಶ್ಚ ಪ್ರಶಾಂತಾತ್ಮಾ ಹುತಾಶನಃ । ಉಗ್ರತೇಜಾ ಮಹಾತೇಜಾ ಜನ್ಯೋ ವಿಜಯಕಾಲವಿತ್ ॥೫೭
ಜ್ಯೋತಿಷಾಮಯನಂ ಸಿದ್ಧಿಸ್ಸರ್ವವಿಗ್ರಹ ಏವ ಚ । ಶಿಖೀ ಮುಂಡೀ ಜಟೀ ಜ್ವಾಲೀ ಮೂರ್ತಿಜೋ ಮೂರ್ಧಗೋ ಬಲೀ ॥೫೮
ವೈಷ್ಣವಃ ಪ್ರಜವೀ ತಾಳೀ ಖೇಲೀ ಕಾಲಕಟಂಕಟಃ। ನಕ್ಷತ್ರವಿಗ್ರಹಮತಿರ್ಗುಣಬುದ್ಧಿರ್ಲಯೋಽಗಮಃ ॥ ೫೯
ಪ್ರಜಾಪತಿರ್ವಿಶ್ವಬಾಹುರ್ವಿಭಾಗಃ ಸರ್ವತೋಮುಖಃ। ವಿಮೋಚನಸ್ಸುಮರಣೋ ಹಿರಣ್ಯಕವಚೋದ್ಭವಃ ॥೬೦
ಮೇಘಜೋ ಬಲಚಾರೀಚ ಮಹೀಚಾರೀ ಸ್ತುತಸ್ತಥಾ । ಸರ್ವತೂರ್ಯವಿನೋದೀ ಚ ಸರ್ವವಾದ್ಯಪರಿಗ್ರಹಃ ॥ ೬೧
ವ್ಯಾಳರೂಪೋ ಗುಹಾವಾಸೀ ಗ್ರಹಮಾಲೀ ತರಂಗವಿತ್ । ತ್ರಿದಶಃ ಕಾಲದೃಕ್ಕರ್ಮಸರ್ವಬಂಧವಿಮೋಚನಃ ॥ ೬೨
ಬಂಧನಸ್ತ್ವಸುರೇಂದ್ರಾಣಾಂ ಯುಧಿ ಶತ್ರುವಿನಾಶನಃ। ಸಾಂಖ್ಯಪ್ರಸಾದೋ ದುರ್ವಾಸಾಸ್ಸರ್ವಸಾಧುನಿಷೇವಿತಃ ॥೬೩
ಪ್ರಸ್ಕಂದನೋ ವಿಭಾಗಜ್ಞೋ ಹ್ಯತುಲ್ಯೋ ಯಜ್ಞಭಾಗವಿತ್ । ಸರ್ವವಾಸಸ್ಸರ್ವಚಾರೀ ದುರ್ವಾಸಾ ವಾಸವೋಽಮರಃ ॥ ೬೪
ಹೈಮೋ ಹೇಮಕರೋ ಯಜ್ಞಸ್ಸರ್ವಧಾರೀ ಧರೋತ್ತಮಃ । ಲೋಹಿತಾಕ್ಷೋ ಮಹಾಕ್ಷಶ್ವ ವಿಜಯಾಕ್ಷೋ ವಿಶಾರದಃ ॥ ೬೫
ಸಂಗ್ರಹೋ ನಿಗ್ರಹಃ ಕರ್ತಾ ಸರ್ಪಚೀರನಿವಾಸನಃ । ಮುಖ್ಯೋಽಮುಖ್ಯಶ್ಚ ದೇಹಶ್ಚ ಕಾಹಳಿಸ್ಸರ್ವಕಾಮದಃ ॥ ೬೬
ಸರ್ವಕಾಲಪ್ರಸಾದಶ್ಚ ಸುಬಲೋ ಬಲರೂಪಭೃತ್ । ಸರ್ವಕಾಮಪ್ರದಶ್ಚೈವ ಸರ್ವದಸ್ಸರ್ವತೋಮುಖಃ ॥೬೭
ಆಕಾಶನಿರ್ವಿರೂಪಶ್ಚ ನಿಪಾತೋ ಹ್ಯವಶಃ ಖಗಃ । ರೌದ್ರರೂಪೋಂಽಶುರಾದಿತ್ಯೋ ಬಹುರಶ್ಮಿಸ್ಸುವರ್ಚಸೀ ॥ ೬೮
ವಸುವೇಗೋ ಮಹಾವೇಗೋ ಮನೋವೇಗೋ ನಿಶಾಚರಃ। ಸರ್ವವಾಸೀ ಶ್ರಿಯಾವಾಸೀ ಉಪದೇಶಕರೋಽಕರಃ ॥ ೬೯
ಮುನಿರಾತ್ಮಾ ನಿರಾಲೋಕಸ್ಸಂಭಗ್ನಶ್ಚ ಸಹಸ್ರದಃ । ಪಕ್ಷೀ ಚ ಪ್ಲಕ್ಷರೂಪಶ್ಚ ಅತಿದೀಪ್ತೋ ವಿಶಾಂ ಪತಿಃ॥೭೦
ಉನ್ಮಾದೋ ಮದನಃ ಕಾಮೋ ಹ್ಯಶ್ವತ್ಥೋಽರ್ಥಕರೋ ಯಶಃ। ವಾಮದೇವಶ್ಚ ವಾಮಶ್ಚ ಪ್ರಾಗ್ದಕ್ಷಿಣ ಉದಙ್ಮುಖಃ ॥೭೧
ಸಿದ್ಧಯೋಗೀ ಮಹರ್ಷಿಶ್ಚ ಸಿದ್ಧಾರ್ಥಸ್ಸಿದ್ಧಸಾಧಕಃ। ಭಿಕ್ಷುಶ್ಚ ಭಿಕ್ಷುರೂಪಶ್ಚ ವಿಪಗೋ ಮೃದುರವ್ಯಯಃ ॥೭೨
ಮಹಾಸೇನೋ ವಿಶಾಖಶ್ಚ ಷಷ್ಟಿಭಾಗೋ ಗವಾಂ ಪತಿಃ । ವಜ್ರಹಸ್ತಶ್ವ ವಿಷ್ಕಂಭೀ ಚಮೂಸ್ತಂಭನ ಏವ ಚ ॥೭೩
ವೃತ್ತವೃತ್ತಕರಸ್ತಾಲೋ ಮಧುರ್ಮಧುಕಲೋಚನಃ । ವಾಚಸ್ಪತ್ಯೋ ವಾಜಸನೋ ನಿತ್ಯಮಾಶ್ರಿತಪೂಜಿತಃ ॥೭೪
ಬ್ರಹ್ಮಚಾರೀ ಲೋಕಚಾರೀ ಸರ್ವಚಾರೀ ವಿಚಾರವಿತ್ । ಈಶಾನ ಈಶ್ವರಃ ಕಾಲೋ ನಿಶಾಚಾರೀ ಪಿನಾಕಭೃತ್ ॥ ೭೫
ನಿಮಿತ್ತಸ್ಥೋ ನಿಮಿತ್ತಂ ಚ ನಂದಿರ್ನಂದಿಕರೋ ಹರಿಃ। ನಂದೀಶ್ವರಶ್ಚ ನಂದೀ ಚ ನಂದನೋ ನಂದಿವರ್ಧನಃ ॥ ೭೬
ಭಗಹಾರೀ ನಿಹಂತಾ ಚ ಕಾಲೋ ಬ್ರಹ್ಮಾ ಪಿತಾಮಹಃ । ಚತುರ್ಮುಖೋ ಮಹಾಲಿಂಗಶ್ಚಾರುಲಿಂಗಸ್ತಥೈವ ಚ ॥೭೭
ಲಿಂಗಾಧ್ಯಕ್ಷಸ್ಸುರಾಧ್ಯಕ್ಷೋ ಯೋಗಾಧ್ಯಕ್ಷೋ ರುಗಾವಹಃ । ಬೀಜಾಧ್ಯಕ್ಷೋ ಬೀಜಕರ್ತಾ ಅಧ್ಯಾತ್ಮಾನುಗತೋ ಬಲಃ ॥೭೮
ಇತಿಹಾಸಸ್ಸಕಲ್ಪಶ್ಚ ಗೌತಮೋಽಥ ನಿಶಾಕರಃ । ದನ್ಭೋ ಹ್ಯದಂಭೋ ವೈದಂಭೋ ವಶ್ಯೋ ವಶಕರಃ ಕಲಿಃ॥೭೯
ಲೋಕಕರ್ತಾ ಪಶುಪತಿರ್ಮಹಾಕರ್ತಾ ಹ್ಯನೌಷಧಃ । ಅಕ್ಷರಂ ಪರಮಂ ಬ್ರಹ್ಮ ಬಲವಾನ್ ಶಕ್ತ ಏವ ಚ ॥೮೦
ನೀತಿರ್ಹ್ಯನೀತಿಶ್ಶುದ್ಧಾಮಾ ಶುದ್ಧೋ ಮಾನ್ಯೋ ಗತಾಗತಃ । ಬಹುಪ್ರಸಾದಸ್ಸುಸ್ವಪ್ನೋ ದರ್ಪಣೋಽಥ ತ್ವಮಿತ್ರಜಿತ್ ॥೮೧
ವೇದಕಾರೋ ಮಂತ್ರಕಾರೋ ವಿದ್ಧಾನ್ಸಮರಮರ್ದನಃ। ಮಹಾಮೇಘನಿವಾಸೀ ಚ ಮಹಾಘೋರೋ ವಶೀಕರಃ ॥ ೮೨
ಅಗ್ನಿಜ್ವಾಲೋ ಮಹಾಜ್ವಾಲೋ ಹ್ಯತಿಧೂಮ್ರೋ ಹುತೋ ಹವಿಃ । ವೃಷಭಶ್ಶಂಕರೋ ನಿತ್ಯಂ ವರ್ಚಸ್ವೀ ಧೂಮಕೇತನಃ ॥ ೮೩
ನೀಲಸ್ತಥಾಂಗಲುಬ್ಧಶ್ಚ ಶೋಭನೋ ನಿರವಗ್ರಹಃ। ಸ್ವಸ್ತಿದಸ್ಸ್ವಸ್ತಿಭಾಗಶ್ಚ ಭಾಗೀ ಭಾಗಕರೋ ಲಘುಃ॥ ೮೪
ಉತ್ಸಂಗಶ್ಚ ಮಹಾಂಗಶ್ಚ ಮಹಾಗರ್ಭಪರಾಯಣಃ । ಕೃಷ್ಣವರ್ಣಸ್ಸುವರ್ಣಶ್ಚ ಇಂದ್ರಿಯಂ ಸರ್ವದೇಹಿನಾಮ್ ॥೮೫
ಮಹಾಪಾದೋ ಮಹಾಹಸ್ತೋ ಮಹಾಕಾಯೋ ಮಹಾಯಶಾಃ । ಮಹಾಮೂರ್ಧೀ ಮಹಾಮಾತ್ರೋ ಮಹಾನೇತ್ರೀ ನಿಶಾಲಯಃ ॥೮೬
ಮಹಾಂತಕೋ ಮಹಾಕರ್ಣೋ ಮಹೋಷ್ಠಶ್ಚ ಮಹಾಹನುಃ । ಮಹಾನಾಸೋ ಮಹಾಕಂಬುರ್ಮಹಾಗ್ರೀವಶ್ಶ್ಮಶಾನಭಾಕ್ ॥೮೭
ಮಹಾವಕ್ಷಾ ಮಹೋರಸ್ಕೋ ಹ್ಯಂತರಾತ್ಮಾ ಮೃಗಾಲಯಃ । ಲಂಬನೋ ಲಂಬಿತೋಷ್ಠಶ್ಚ ಮಹಾಮಾಯಃ ಪಯೋನಿಧಿಃ॥ ೮೮
ಮಹಾದಂತೋ ಮಹಾದಂಷ್ಟ್ರೋ ಮಹಾಜಿಹ್ವೋ ಮಹಾಮುಖಃ । ಮಹಾನಖೋ ಮಹಾರೋಮಾ ಮಹಾಕೇಶೋ ಮಹಾಜಟಃ ॥೮೯
ಪ್ರಸನ್ನಶ್ಚ ಪ್ರಸಾದಶ್ಚ ಪ್ರತ್ಯಯೋ ಗಿರಿಸಾಧನಃ । ಸ್ನೇಹನೋಽಸ್ನೇಹನಶ್ಚೈವ ಅಜಿತಶ್ಚ ಮಹಾಮುನಿಃ ॥ ೯೦
ವೃಕ್ಷಾಕಾರೋ ವೃಕ್ಷಕೇತುರನಲೋ ವಾಯುವಾಹನಃ । ಗಂಡಲೀ ಮೇರುಧಾಮಾ ಚ ದೇವಾಧಿಪತಿರೇವ ಚ ॥೯೧
ಅಥರ್ವಶೀರ್ಷಸ್ಸಾಮಾಸ್ಯ ಋಕ್ಸಹಸ್ರಾಮಿತೇಕ್ಷಣಃ । ಯಜುಃಪಾದಭುಜೋ ಗುಹ್ಯಃ ಪ್ರಕಾಶೋ ಜಂಗಮಸ್ತಥಾ ॥ ೯೨
ಅಮೋಘಾರ್ಥಃ ಪ್ರಸಾದಶ್ಚ ಅಭಿಗಮ್ಯಸ್ಸುದರ್ಶನಃ । ಉಪಕಾರಃ ಪ್ರಿಯಸ್ಸರ್ವಃ ಕನಕಃ ಕಾಂಚನಚ್ಛವಿಃ ॥ ೯೩
ನಾಭಿರ್ನಂದಿಕರೋ ಭಾವಃ ಪುಷ್ಕರಸ್ಥಪತಿಃ ಸ್ಥಿರಃ । ದ್ವಾದಶಸ್ತ್ರಾಸನಶ್ಚಾದ್ಯೋ ಯಜ್ಞೋ ಯಜ್ಞಸಮಾಹಿತಃ ॥೯೪
ನಕ್ತಂ ಕಲಿಶ್ಚ ಕಾಲಶ್ಚ ಮಕರಃ ಕಾಲಪೂಜಿತಃ। ಸಗಣೋ ಗಣಕಾರಶ್ಚ ಭೂತವಾಹನಸಾರಥಿಃ ॥ ೯೫
ಭಸ್ಮಾಶಯೋ ಭಸ್ಮಗೋಪ್ತಾ ಭಸ್ಮಭೂತಸ್ತರುರ್ಗಣಃ । ಲೋಕಪಾಲಸ್ತಥಾ ಲೋಕೋ ಮಹಾತ್ಮಾ ಸರ್ವಪೂಜಿತಃ ॥ ೯೬
ಶುಕ್ಲಸ್ತ್ರಿಶುಕ್ಲಸಂಪನ್ನಶ್ಶುಚಿರ್ಭೂತನಿಷೇವಿತಃ । ಆಶ್ರಮಸ್ಥಃ ಕ್ರಿಯಾವಸ್ಥೋ ವಿಶ್ವಕರ್ಮಮತಿರ್ವರಃ ॥೯೭
ವಿಶಾಲಶಾಖಸ್ತಾಮ್ರೋಷ್ಠೋಹ್ಯಂಬುಜಾಲಸ್ಸುನಿಶ್ಚಲಃ । ಕಪಿಲಾ ಕಪಿಶಶ್ಶುಕ್ಲ ಆಯುಶ್ಚೈವ ಪರೋಽಪರಃ ॥೯೮
ಗಂಧರ್ವೋ ಹ್ಯದಿತಿಸ್ತಾರ್ಕ್ಷ್ಯಸ್ಸುವಿಜ್ಞೇಯಸ್ಸುಶಾರದಃ । ಪರಶ್ವಧಾಯುಧೋ ದೇವೋ ಹ್ಯನುಕಾರೀ ಸುಬಾಂಧವಃ ॥೯೯
ತುಂಬವೀಣೋ ಮಹಾಕ್ರೋಧೋ ಊರ್ಧ್ವರೇತಾ ಜಲೇಶಯಃ। ಉಗ್ರೋ ವಶಂಕರೋ ವಂಶೋ ವಂಶನಾದೋ ಹ್ಯನಿಂದಿತಃ ॥ ೧೦೦
ಸರ್ವಾಂಗರೂಪೋ ಮಾಯಾವೀ ಸುಹೃದೋ ಹ್ಯನಿಲೋಽನಲಃ । ಬಂಧನೋ ಬಂಧಕರ್ತಾ ಚ ಸುಬಂಧನವಿಮೋಚನಃ ॥ ೧೦೧
ಸ ಯಜ್ಞಾರಿಸ್ಸ ಕಾಮಾರಿರ್ಮಹಾದಂಷ್ಟ್ರೋ ಮಹಾಯುಧಃ । ಬಹುಧಾಽನಿಂದಿತಸ್ಸರ್ವಶ್ಶಂಕರಶ್ಚಂದ್ರಶೇಖರಃ ॥೧೦೨
ಅಮರೇಶೋ ಮಹಾದೇವೋ ವಿಶ್ವದೇವಸ್ಸುರಾರಿಹಾ । ಅಹಿರ್ಬುಧ್ನ್ಯೋಽನಿಲಾಭಶ್ಚ ಚೇಕಿತಾನೋ ಹರಿಸ್ತಥಾ ॥೧೦೩
ಅಜೈಕಪಾಚ್ಚ ಕಾಪಾಲೀ ತ್ರಿಶಂಕುರಜಿತಶಿಶವಃ । ಧನ್ವಂತರಿರ್ಧೂಮಕೇತುಸ್ಸ್ಕಂದೋ ವೈಶ್ರವಣಸ್ತಥಾ ॥೧೦೪
ಧಾತಾ ಶಕ್ರಶ್ಚ ವಿಷ್ಣುಶ್ಚ ಮಿತ್ರಸ್ತ್ವಷ್ಟಾ ಧ್ರುವೋ ಧರಃ । ಪ್ರಭಾವಸ್ಸರ್ವಗೋ ವಾಯುರರ್ಯಮಾ ಸವಿತಾ ರವಿಃ ॥ ೧೦೫
ಉಷಂಗುಶ್ಚ ವಿಧಾತಾ ಚ ಮಾಂಧಾತಾ ಭೂತಭಾವನಃ । ವಿಭುರ್ವರ್ಣವಿಭಾವೀ ಚ ಸರ್ವಕಾಮಗುಣಾವಹಃ ॥ ೧೦೬
ಪದ್ಮನಾಭೋ ಮಹಾಗರ್ಭಶ್ಚಂದ್ರವಕ್ತ್ರೋಽನಿಲೋಽನಲಃ। ಬಲವಾಂಶ್ಚೋಪಶಾಂತಶ್ಚ ಪುರಾಣಃ ಪುಣ್ಯಚಂಚುರೀ ॥ ೧೦೭
ಕುರುಕರ್ತಾ ಕುರುವಾಸೀ ಕುರುಭೂತೋ ಗುಣೌಷಧಃ । ಸರ್ವಾಶಯೋ ದರ್ಭಚಾರೀ ಸರ್ವೇಷಾಂ ಪ್ರಾಣಿನಾಂ ಪತಿಃ ॥ ೧೦೮
ದೇವದೇವಸ್ಸುಖಾಸಕ್ತಸ್ಸದಸತ್ಸರ್ವರತ್ನವಿತ್ । ಕೈಲಾಸಗಿರಿವಾಸೀ ಚ ಹಿಮವದ್ಭಿರಿಸಂಶ್ರಯಃ ॥೧೦೯
ಕೂಲಹಾರೀ ಕೂಲಕರ್ತಾ ಬಹುವಿದ್ಯೋ ಬಹುದಃ। ವಣಿಜೋ ವರ್ಧಕೀ ವೃಕ್ಷೋ ವಕುಳಶ್ಚಂದನಚ್ಛದಃ ॥ ೧೧೦
ಸಾರಗ್ರೀಚೋ ಮಹಾಜತ್ರುರಲೋಲಶ್ಚ ಮಹೌಷಧಃ । ಸಿದ್ಧಾರ್ಥಕಾರೀ ಸಿದ್ಧಾರ್ಥಶ್ಛಂದೋವ್ಯಾಕರಣೋತ್ತರಃ ॥ ೧೧೧
ಸಿಂಹನಾದಸ್ಸಿಂಹದಂಷ್ಟ್ರಸ್ಸಿಂಹಗಸ್ಸಿಂಹವಾಹನಃ । ಪ್ರಭಾವಾತ್ಮಾ ಜಗತ್ಕಾಲಃ ಕಾಲೋ ಲೋಕಹಿತಸ್ತರಃ॥೧೧೨
ಸಾರಾಂಗೋ ನವಚಕ್ರಾಂಗಃ ಕೇತುಮಾಲೀ ಸಭಾವನಃ । ಭೂತಾಲಯೋ ಭೂತಪತಿರಹೋರಾತ್ರಮನಿಂದಿತಃ ॥೧೧೩
ವರ್ಧಿತಸ್ಸರ್ವಭೂತಾನಾಂ ನಿಲಯಶ್ಚ ವಿಭುರ್ಭವಃ । ಅಮೋಘಸ್ಸಂಯತೋ ಹ್ಯಶ್ವೋ ಭೋಜನಃ ಪ್ರಾಣಧಾರಣಃ ॥೧೧೪
ಧೃತಿಮಾನ್ ಮತಿಮಾನ್ ದಕ್ಷಃ ಸತ್ಕೃತಶ್ಚ ಯುಗಾಧಿಪಃ । ಗೋಪಾಲೀ ಗೋಪತಿರ್ಗ್ರಾಮೋ ಗೋಚರ್ಮವಸನೋ ಹರಿಃ ॥ ೧೧೫
ಹಿರಣ್ಯಬಾಹುಶ್ಚ ತಥಾ ಗುಹಾಪಾಲಃ ಪ್ರವೇಶಕಃ । ಪ್ರಕೃಷ್ಟಾರಿರ್ಮಹಾಹರ್ಷೋ ಜಿತಕಾಮೋ ಜಿತೇಂದ್ರಿಯಃ ॥ ೧೧೬
ಗಾಂಧಾರಶ್ಚ ಸುವಾಸಶ್ಚ ತಪಸ್ಸಕ್ತೋ ರತಿರ್ನರಃ । ಮಹಾಗೀತೋ ಮಹಾನೃತ್ಯೋ ಹ್ಯ್ಪ್ಸರೋಗಣಸೇವಿತಃ ॥ ೧೧೭
ಮಹಾಕೇತುರ್ಮಹಾಧಾತುರ್ನೈಕಸಾನುಚರಶ್ಚಲಃ । ಆವೇದನೀಯ ಆವೇಶಃ ಸರ್ವಗಂಧಸುಖಾವಹಃ ॥ ೧೧೮
ತೋರಣಸ್ತಾರಣೋ ವಾತಃ ಪರಿಧೀಪತಿಖೇಚರಃ। ಸಂಯೋಗೋ ವರ್ಧನೋ ವೃದ್ಧೋ ಹ್ಯತಿವೃದ್ಧೋ ಗುಣಾಧಿಕಃ ॥೧೧೯
ನಿತ್ಯ ಆತ್ಮಾ ಸಹಾಯಶ್ಚ ದೇವಾಸುರಪತಿಃ ಪತಿಃ । ಯುಕ್ತಶ್ಚ ಯುಕ್ತಬಾಹುಶ್ಚ ದೇವೋ ದಿವಿ ಸುಪರ್ವಣಃ ॥೧೨೦
ಆಷಾಢಶ್ಚ ಸುಷಾಢಶ್ಚ ಧ್ರುವೋಽಥ ಹರಿಣೋ ಹರಃ। ವಪುರಾವರ್ತಮಾನೇಭ್ಯೋ ವಸುಶ್ರೇಷ್ಠೋ ಮಹಾಪಥಃ ॥೧೨೧
ಶಿರೋಹಾರೀ ವಿಮರ್ಶಶ್ಚ ಸರ್ವಲಕ್ಷಣಲಕ್ಷಿತಃ। ಅಕ್ಷಶ್ಚ ರಥಯೋಗೀ ಚ ಸರ್ವಯೋಗೀ ಮಹಾಬಲಃ ॥ ೧೨೨
ಸಮಾಮ್ನಾಯೋಽಸಮಾಮ್ನಾಯಸ್ತೀರ್ಥದೇವೋ ಮಹಾರಥಃ। ನಿರ್ಜೀವೋ ಜೀವನೋ ಮಂತ್ರಶ್ಶುಭಾಕ್ಷೋ ಬಹುಕರ್ಕಶಃ ॥೧೨೩
ರತ್ನಪ್ರಭೂತೋ ರಕ್ತಾಂಗೋ ಮಹಾರ್ಣವನಿಪಾನವಿತ್ । ಮೂಲಂ ವಿಶಾಲೋ ಹ್ಯಮೃತೋ ವ್ಯಕ್ತಾವ್ಯಕ್ತಸ್ತಪೋನಿಧಿಃ ॥೧೨೪
ಆರೋಹಣೋಽಧಿರೋಹಶ್ವ ಶೀಲಧಾರೀ ಮಹಾಯಶಾಃ। ಸೇನಾಕಲ್ಪೇ ಮಹಾಕಲ್ಪೇ ಯೋಗೋ ಯೋಗಕರೋ ಹರಿಃ ॥ ೧೨೫
ಯುಗರೂಪೋ ಮಹಾರೂಪೋ ಮಹಾನಾಗಹನೋ ವಧಃ । ನ್ಯಾಯನಿರ್ವಪಣಃ ಪಾದಃ ಪಂಡಿತೋ ಹ್ಯಚಲೋಪಮಃ ॥೧೨೬
ಬಹುಮಾಲೋ ಮಹಾಮಾಲಶ್ಶಶೀ ಹರಿಸುಲೋಚನಃ । ವಿಸ್ತಾರೋ ಲವಣಃ ಕೂಪಸ್ತ್ರಿಯುಗಃ ಸಫಲೋದಯಃ ॥ ೧೨೭
ತ್ರಿಲೋಚನೋ ವಿಷಣ್ಣಾಂಗೋ ಮಣಿವಿದ್ಧೌ ಜಟಾಧರಃ । ಬಿಂದುರ್ವಿಸರ್ಗಸ್ಸುಮುಖಃ ಶರಸ್ಸರ್ವಾಯುಧಸ್ಸಹಃ ॥ ೧೨೮
ನಿವೇದನಸ್ಸುಖಾಜಾತಃ ಸುಗಂಧಾರೋ ಮಹಾಧನುಃ । ಗಂಧಪಾಲೀ ಚ ಭಗವಾನುತ್ಥಾನಸ್ಸರ್ವಕರ್ಮಣಾಮ್ ॥ ೧೨೯
ಮಂಥಾನೋ ಬಹುಳೋ ವಾಯುಃ ಸಕಲಸ್ಸರ್ವಲೋಚನಃ । ತಲಸ್ತಾಲ ಕರಸ್ಥಾಲೀ ಊರ್ಧ್ವಸಂಹನನೋ ಮಹಾನ್ ॥ ೧೩೦
ಛತ್ರಂ ಸುಛತ್ರೋ ವಿಖ್ಯಾತೋ ಲೋಕಸ್ಸರ್ವಾಶ್ರಯಃ ಕ್ರಮಃ । ಮುಂಡೋ ವಿರೂಪೋ ವಿಕೃತೋ ದಂಡೀ ಕುಂಡೀ ವಿಕುರ್ವಣಃ ॥೧೩೧
ಹರ್ಯಕ್ಷಃ ಕಕುಭೋ ವಜ್ರೀ ಶತಜಿಹ್ವಸ್ಸಹಸ್ರಪಾತ್ । ಸಹಸ್ರಮೂರ್ಧಾ ದೇವೇಂದ್ರಸ್ಸರ್ವದೇವಮಯೋ ಗುರುಃ ॥೧೩೨
ಸಹಸ್ರಬಾಹುಸ್ಸರ್ವಾಂಗಃ ಶರಣ್ಯಸ್ಸರ್ವಲೋಕಕೃತ್ । ಪವಿತ್ರಂ ತ್ರಿಕಕುನ್ಮಂತ್ರಃ ಕನಿಷ್ಠಃ ಕೃಷ್ಣಪಿಂಗಳಃ ॥೧೩೩
ಬ್ರಹ್ಮದಂಡವಿನಿರ್ಮಾತಾ ಶತಘ್ನೀಪಾಶಶಕ್ತಿಮಾನ್ । ಪದ್ಮಗರ್ಭೋ ಮಹಾಗರ್ಭೋ ಬ್ರಹ್ಮಗರ್ಭೋ ಜಲೋದ್ಭವಃ ॥ ೧೩೪
ಗಭಸ್ತಿರ್ಬ್ರಹ್ಮಕೃದ್ಬ್ರಹ್ಮ ಬ್ರಹ್ಮವಿದ್ಬ್ರಾಹ್ಮಣೋ ಗತಿಃ। ಅನಂತರೂಪಶ್ಚೈಕಾತ್ಮಾ ತಿಗ್ಮತೇಜಾಸ್ಸ್ವಯಂಭುವಃ ॥ ೧೩೫
ಊರ್ಧ್ವಗಾತ್ಮಾ ಪಶುಪತಿರ್ವಾತರಂಹಾ ಮನೋಜವಃ । ಚಂದನೀ ಪದ್ಮನಾಳಾಗ್ರಸ್ಸುರಭ್ಯುತ್ತರಣೋ ನರಃ ॥೧೩೬
ಕರ್ಣಿಕಾರಮಹಾಸ್ರಗ್ವೀ ನೀಲಮೌಳಿಃ ಪಿನಾಕಭೃತ್ । ಉಮಾಪತಿರುಮಾಕಾಂತೋ ಜಾಹ್ನವೀಭೃದುಮಾಧವಃ ॥೧೩೭
ವರೋ ವರಾಹೋ ವರದೋ ವರೇಣ್ಯಸ್ಸುಮಹಾಸ್ವನಃ । ಮಹಾಪ್ರಸಾದೋ ದಮನಃ ಶತ್ರುಹಾ ಶ್ವೇತಪಿಂಗಳಃ ॥೧೩೮
ಪ್ರೀತಾತ್ಮಾ ಪರಮಾತ್ಮಾ ಚ ಪ್ರಯತಾತ್ಮಾ ಪ್ರಧಾನಧೃತ್ । ಸರ್ವಪಾರ್ಶ್ವಸುಖಸ್ತ್ರ್ಯಕ್ಷೋ ಧರ್ಮಸಾಧಾರಣೋ ವರಃ॥೧೩೯
ಚರಾಚರಾತ್ಮಾ ಸೂಕ್ಷ್ಮಾತ್ಮಾ ಅಮೃತೋ ಗೋವೃಷೇಶ್ವರಃ । ಸಾಧ್ಯರ್ಷಿರ್ವಸುರಾದಿತ್ಯೋ ವಿವಸ್ವಾನ್ ಸವಿತಾಽಮೃತಃ ॥೧೪೦
ವ್ಯಾಸಸ್ಸರ್ಗಸ್ಸುಸಂಕ್ಷೇಪೋ ವಿಸ್ತರಃ ಪರ್ಯಯೋ ನರಃ । ಋತುಸ್ಸಂವತ್ಸರೋ ಮಾಸಃ ಪಕ್ಷಸ್ಸಂಖ್ಯಾಸಮಾಪನಃ ॥೧೪೧
ಕಳಾ ಕಾಷ್ಠಾ ಲವಾ ಮಾತ್ರಾ ಮುಹೂರ್ತಾಹಃಕ್ಷಪಾಕ್ಷಣಾಃ । ವಿಶ್ವಕ್ಷೇತ್ರಂ ಪ್ರಜಾಬೀಜ ಲಿಂಗಮಾದ್ಯಸ್ಸುನಿರ್ಗಮಃ ॥೧೪೨
ಸದಸದ್ವ್ಯಕ್ತಮವ್ಯಕ್ತಂ ಪಿತಾ ಮಾತಾ ಪಿತಾಮಹಃ । ಸ್ವರ್ಗದ್ವಾರಂ ಪ್ರಜಾದ್ವಾರಂ ಮೋಕ್ಷದ್ವಾರಂ ತ್ರಿವಿಷ್ಟಪಮ್ ॥೧೪೩
ನಿರ್ವಾಣಂ ಹ್ಲಾದನಶ್ಚೈವ ಬ್ರಹ್ಮಲೋಕಃ ಪರಾ ಗತಿಃ । ದೇವಾಸುರವಿನಿರ್ಮಾತಾ ದೇವಾಸುರಪರಾಯಣಃ ॥೧೪೪
ದೇವಾಸುರಗುರುರ್ದೇವೋ ದೇವಾಸುರನಮಸ್ಕೃತಃ । ದೇವಾಸುರಮಹಾಮಾತ್ರೋ ದೇವಾಸುರಗಣಾಶ್ರಯಃ ॥೧೪೫
ದೇವಾಸುರಗಣಾಧ್ಯಕ್ಷೋ ದೇವಾಸುರಗಣಾಗ್ರಣೀಃ । ದೇವಾದಿದೇವೋ ದೇವರ್ಷಿರ್ದೇವಾಸುರವರಪ್ರದಃ ॥೧೪೬
ದೇವಾಸುರೇಶ್ವರೋ ವಿಶ್ವೋ ದೇವಾಸುರಮಹೇಶ್ವರಃ । ಸರ್ವದೇವಮಯೋಽಚಿಂತ್ಯೋ ದೇವತಾತ್ಮಾತ್ಮಸಂಭವಃ ॥ ೧೪೭
ಊದ್ಭಿತ್ತ್ರಿವಿಕ್ರಮೋ ವೈದ್ಯೋ ವಿರಜೋ ನೀರಜೋಽಮರಃ । ಈಡ್ಯೋ ಹಸ್ತೀಶ್ವರೋ ವ್ಯಾಘ್ರೋ ದೇವಸಿಂಹೋ ನರರ್ಷಭಃ॥೧೪೮
ವಿಬುಧೋಽಗ್ರವರಸ್ಸೂಕ್ಷ್ಮಸ್ಸರ್ವದೇವಸ್ತಪೋಮಯಃ । ಸುಯುಕ್ತಶ್ಶೋಭನೋ ವಜ್ರೀ ಪ್ರಾಸಾನಾಂ ಪ್ರಭವೋಽವ್ಯಯಃ ॥೧೪೯
ಗುಹಃ ಕಾಂತೋ ನಿಜಸ್ಸರ್ಗಃ ಪವಿತ್ರಂ ಸರ್ವಪಾವನಃ । ಶೃಂಗೀ ಶೃಂಗಪ್ರಿಯೋ ಬಭ್ರೂ ರಾಜರಾಜೋ ನಿರಾಮಯಃ ॥ ೧೫೦
ಅಭಿರಾಮಸ್ಸುರಗಣೋ ವಿರಾಮಸ್ಸರ್ವಸಾಧನಃ । ಲಲಾಟಾಕ್ಷೋ ವಿಶ್ವದೇವೋ ಹರಿಣೋ ಬ್ರಹ್ಮವರ್ಚಸಃ ॥ ೧೧೧
ಸ್ಥಾವರಾಣಾಂ ಪತಿಶ್ಚೈವ ನಿಯಮೇಂದ್ರಿಯವರ್ಧನಃ । ಸಿದ್ಧಾರ್ಥಸ್ಸಿದ್ಧಭೂತಾರ್ಥೋಽಚಿಂತ್ಯಸ್ಸತ್ಯವ್ರತಶ್ಶುಚಿಃ॥೧೫೨
ವ್ರತಧಿಪಃ ಪರಂ ಬ್ರಹ್ಮ ಭಕ್ತಾನುಗ್ರಹಕಾರಕಃ । ವಿಮುಕ್ತೋ ಮುಕ್ತತೇಜಾಶ್ಚ ಶ್ರೀಮಾನ್ ಶ್ರೀವರ್ಧನೋ ಜಗತ್ ॥೧೫೩
ಯಥಾಪ್ರಧಾನಂ ಭಗವಾನಿತಿ ಭಕ್ತ್ತ್ಯಾ ಸ್ತುತೋ ಮಯಾ । ಯಂ ನ ಬ್ರಹ್ಮಾದಯೋ ದೇವಾ ವಿದುಸ್ತತ್ವೇನ ನರ್ಷಯಃ॥ ೧೫೪
ಸ್ತೋತವ್ಯಮರ್ಚ್ಯಂ ವಂದ್ಯಂ ಚ ಕಃ ಸ್ತೋಷ್ಯತಿ ಜಗತ್ಪತಿಮ್ । ಭಕ್ತ್ತ್ಯಾ ತ್ವೇವಂ ಪುರಸ್ಕೃತ್ಯ ಮಯಾ ಯಜ್ಞಪತಿರ್ವಿಭುಃ ॥೧೫೫
ತತೋಽಭ್ಯನುಜ್ಞಾ ಸಂಪ್ರಾಪ್ಯ ಸ್ತುತೋ ಮತಿಮತಾಂ ವರಃ। ಶಿವಮೇಭಿಃ ಸ್ತುವನ್ ದೇವಂ ನಾಮಭಿಃ ಪುಷ್ಟಿವರ್ಧನೈಃ ॥೧೫೬
ನಿತ್ಯಯುಕ್ತಶ್ಶುಚಿರ್ಭೂತಃ ಪ್ರಾಪ್ನೋತ್ಯಾತ್ಮಾನಮಾತ್ಮನಾ । ಏತದ್ಧಿ ಪರಮಂ ಬ್ರಹ್ಮ ಪರಂ ಬ್ರಹ್ಮಾಧಿಗಚ್ಛತಿ ॥೧೫೭
ಋಷಯಶ್ಚೈವ ದೇವಾಶ್ಚ ಸ್ತುವಂತ್ಯೇತೇನ ತತ್ಪರಾಃ । ಸ್ತೂಯಮಾನೋ ಮಹಾದೇವಸ್ತುಷ್ಯತೇ ನಿಯತಾತ್ಮಭಿಃ ॥ ೧೫೮
ಭಕ್ತಾನುಕಂಪೀ ಭಗವಾನಾತ್ಮಸಂಸ್ಥಾಕರೋ ವಿಭುಃ। ತಥೈವ ಚ ಮನುಷ್ಯೇಷು ಯೇ ಮನುಷ್ಯಾಃ ಪ್ರಧಾನತಃ ॥ ೧೫೯
ಆಸ್ತಿಕಾಶ್ಶ್ರದ್ದಧಾನಾಶ್ಚ ಬಹುಭಿರ್ಜನ್ಮಭಿಸ್ಸ್ತವೈಃ। ಭಕ್ತ್ಯಾ ಹ್ಯನನ್ಯಮೀಶಾನಂ ಪರಂ ದೇವಂ ಸನಾತನಮ್ ॥ ೧೬೦
ಕರ್ಮಣಾ ಮನಸಾ ವಾಚಾ ಭಾವೇನಾಮಿತತೇಜಸಃ । ಶಯಾನಾ ಜಾಗ್ರಮಾಣಾಶ್ಚ ವ್ರಜನ್ನುಪವಿಶಂಸ್ತಥಾ ॥೧೬೧
ಉನ್ಮಿಷನ್ನಿಮಿಷಂಶ್ಚೈವ ಚಿಂತಯಂತಃ ಪುನಃ ಪುನಃ । ಶೃಣ್ವಂತಶ್ಶ್ರಾವಯಂತಶ್ಚ ಕಥಯಂತಶ್ಚ ತೇ ಭವಮ್ ॥ ೧೬೨
ಸ್ತುವಂತಸ್ಸ್ತೂಯಮಾನಾಶ್ಚ ತುಷ್ಯಂತಿ ಚ ರಮಂತಿ ಚ । ಜನ್ಮಕೋಟಿಸಹಸ್ರೇಷು ನಾನಾಸಂಸಾರಯೋನಿಷು ॥ ೧೬೩
ಜಂತೋರ್ವಿಗತಪಾಪಸ್ಯ ಭವೇ ಭಕ್ತಿಃ ಪ್ರಜಾಯತೇ । ಉತ್ಪನ್ನಾ ಚ ಭವೇ ಭಕ್ತಿರನನ್ಯಾ ಸರ್ವಭಾವತಃ ॥ ೧೬೪
ಭಾವಿನಃ ಕಾರಣಂ ಚಾಸ್ಯ ಸರ್ವಮುಕ್ತಸ್ಯ ಸರ್ವದಾ । ಏತದ್ದೇವೇಷು ದುಷ್ಪಾಪಂ ಮನುಷ್ಯೇಷು ನ ಲಭ್ಯತೇ ॥೧೬೫
ನಿರ್ವಿಘ್ನಾ ನಿರ್ಮಲಾ ರುದ್ರೇ ಭಕ್ತಿರವ್ಯಭಿಚಾರಿಣೀ। ತಸ್ಯೈವ ಚ ಪ್ರಸಾದೇನ ಭಕ್ತಿರುತ್ಪದ್ಯತೇ ನೃಣಾಮ್ ॥ ೧೬೬
ಯೇನ ಯಾಂತಿ ಪರಾಂ ಸಿದ್ಧಿಂ ತದ್ಭಾವಗತಚೇತಸಃ । ಯಂ ಸರ್ವಭಾವಾನುಗತಾಃ ಪ್ರಪದ್ಯಂತೇ ಮಹೇಶ್ವರಮ್ ॥೧೬೭
ಪ್ರಪನ್ನವತ್ಸಲೋ ದೇವಸಂಸಾರಾತ್ತಾನ್ ಸಮುದ್ಧರೇತ್ । ಏವಮನ್ಯೇ ನ ಕುರ್ವಂತಿ ದೇವಾಸ್ಸಂಸಾರಮೋಚನಮ್ ॥ ೧೬೮
ಮನುಷ್ಯಾಣಾಮೃತೇ ದೇವಂ ನಾನ್ಯಾ ಶಕ್ತಿಸ್ತಪೋಬಲಮ್ । ಇತಿ ತೇನೇಂದ್ರಕಲ್ಪೇನ ಭಗವಾನ್ ಸದಸತ್ಪತಿಃ ॥ ೧೬೯
ಕೃತ್ತಿವಾಸಾಸ್ಸ್ತುತಃ ಕೃಷ್ಣ ತಂಡಿನಾ ಶುಭಬುದ್ಧಿನಾ। ಸ್ತವಮೇತಂ ಭಗವತೋ ಬ್ರಹ್ಮಾ ಸ್ವಯಮಧಾರಯತ್ ॥೧೭೦
ಗೀಯತೇ ಚ ಸ ಬುಧ್ಯೇತ ಬ್ರಹ್ಮಶಂಕರಸನ್ನಿಧೌ । ಇದಂ ಪುಣ್ಯಂ ಪವಿತ್ರಂ ಚ ಸರ್ವದಾ ಪಾಪನಾಶನಮ್ ॥ ೧೭೧
ಯೋಗದಂ ಮೋಕ್ಷದಂ ಚೈವ ಸ್ವರ್ಗದಂ ತೋಷದಂ ತಥಾ । ಏವಮೇತತ್ಪಠಂತೇ ಯ ಏಕಭಕ್ತ್ಯಾ ತು ಶಂಕರಮ್ ॥ ೧೭೨
ಯಾ ಗತಿಸ್ಸಾಂಖ್ಯಯೋಗಾನಾಂ ವ್ರಜಂತೇ ತಾಂ ಗತಿಂ ತಥಾ । ಸ್ತವಮೇನಂ ಪ್ರಯತ್ನೇನ ಸದಾ ರುದ್ರಸ್ಯ ಸನ್ನಿಧೌ ॥೧೭೩
ಅಬ್ದಮೇಕಂ ಚರೇದ್ಭಕ್ತಃ ಪ್ರಾಪ್ನುಯಾದೀಪ್ಸಿತಂ ಫಲಮ್ । ಏತದ್ರಹಸ್ಯಂ ಪರಮಂ ಬ್ರಹ್ಮಣೋ ಹೃದಿ ಸಂಸ್ಥಿತಮ್ ॥೧೭೪
ಬ್ರಹ್ಮಾ ಪ್ರೋವಾಚ ಶಕ್ರಾಯ ಶಕ್ರಃ ಪ್ರೋವಾಚ ಮೃತ್ಯವೇ। ಮೃತ್ಯುಃ ಪ್ರೋವಾಚ ರುದ್ರೇಭ್ಯೋ ರುದ್ರೇಭ್ಯಸ್ತಂಡಿಮಾಗಮತ್॥೧೭೫
ಮಹತಾ ತಪಸಾ ಪ್ರಾಪ್ತಂ ತಂಡಿನಾ ಬ್ರಹ್ಮಸದ್ಮನಿ । ತಂಡಿಃ ಪ್ರೋವಾಚ ಶುಕ್ರಾಯ ಗೌತಮಾಯ ಚ ಭಾರ್ಗವಃ॥೧೭೬
ವೈವಸ್ವತಾಯ ಮನವೇ ಗೌತಮಃ ಪ್ರಾಹ ಮಾಧವ । ನಾರಾಯಣಾಯ ಸಾಧ್ಯಾಯ ಮನುರಿಷ್ಟಾಯ ಧೀಮತೇ ॥ ೧೭೭
ಯಮಾಯ ಪ್ರಾಹ ಭಗವಾನ್ ಸಾಧ್ಯೋ ನಾರಾಯಣೋಽಚ್ಯುತಃ। ನಾಚಿಕೇತಾಯ ಭಗವಾನಾಹ ವೈವಸ್ವತೋ ಯಮಃ॥ ೧೭೮
ಮಾರ್ಕಂಡೇಯಾಯ ವಾರ್ಷ್ಣೇಯ ನಾಚಿಕೇತೋಽಭ್ಯಭಾಷತ । ಮಾರ್ಕಂಡೇಯಾನ್ಮಯಾ ಪ್ರಾಪ್ತೋ ನಿಯಮೇನ ಜನಾರ್ದನ ॥೧೭೯
ತವಾಪ್ಯಹಮಮಿತ್ರನಘ್ನ ಸ್ತವಂ ದದ್ಯಾಂ ಹ್ಯವಿಶ್ರುತಮ್ । ಸ್ವರ್ಯಮಾರೋಗ್ಯಮಾಯುಷ್ಯಂ ಧನ್ಯಂ ವೇದೇನ ಸಮ್ಮಿತಮ್ ॥ ೧೮೦
ನಾಸ್ಯ ವಿಘ್ನಂ ವಿಕುರ್ವಂತಿ ದಾನವಾ ಯಕ್ಷರಾಕ್ಷಸಾಃ । ಪಿಶಾಚಾ ಯಾತುಧಾನಾ ವಾ ಗುಹ್ಯಕಾ ಭುಜಗಾ ಅಪಿ ॥
ಯಃ ಪಠೇತ ಶುಚಿಃ ಪಾರ್ಥ ಬ್ರಹ್ಮಚಾರೀ ಜಿತೇಂದ್ರಿಯಃ। ಅಭಗ್ನಯೋಗೋ ವರ್ಷಂ ತು ಸೋಽಶ್ವಮೇಧಫಲಂ ಲಭೇತ್ ॥ ೧೮೨
ಇತಿ ಶ್ರೀಮನ್ಮಹಾಭಾರತೇ ಆನುಶಾಸನಿಕಪರ್ವಣಿ ದಾನಧರ್ಮಪರ್ವಣಿ ಶ್ರೀಶಿವಸಹಸ್ರನಾಮಸ್ತೋತ್ರರತ್ನಕಥನಂ ನಾಮ ಸಪ್ತದಶೋಽಧ್ಯಾಯಃ ಶ್ರೀಶಿವಸಹಸ್ರನಾಮಸ್ತೋತ್ರರತ್ನಂ ಸಮಾಪ್ತಮ್ ॥
ಮೂಲ: Wikisource · CC BY-SA 4.0