Home › Veda Mantras › acyutāṣṭakam

acyutāṣṭakam

Stotrams · 10 verses

acyutaṃ keśavaṃ rāmanārāyaṇaṃ kṛṣṇadāmodaraṃ vāsudevaṃ harim || śrīdharaṃ mādhavaṃ gopikāvallabhaṃ jānakīnāyakaṃ rāmacandraṃ bhaje || 1 ||

acyutaṃ keśavaṃ satyabhāmādhavaṃ mādhavaṃ śrīdharaṃ rādhikārādhitam || indirāmandiraṃ cetasā sundaraṃ devakīnandanaṃ nandanaṃ saṃdadhe || 2 ||

viṣṇave jiṣṇave śaṅkhine cakriṇe rukmiṇīrāgiṇe jānakījānaye || vallavīvallabhāyā'rcitāyātmane kaṃsavidhvaṃsine vaṃśine te namaḥ || 3 ||

kṛṣṇa govinda he rāma nārāyaṇa śrīpate vāsudevājita śrīnidhe || acyutānanta he mādhavādhokṣaja dvārakānāyaka draupadīrakṣaka || 4 ||

rākṣasakṣobhitaḥ sītayā śobhito daṇḍakāraṇyabhūpuṇyatākāraṇaḥ || lakṣmaṇenānvito vānaraiḥ sevito' gastyasaṃpūjito rāghavaḥ pātu mām || 5 ||

dhenukāriṣṭako'niṣṭakṛddveṣiṇāṃ keśihā kaṃsahṛdvaṃśikāvādakaḥ || pūtanākopakaḥ sūrajākhelano bālagopālakaḥ pātu mām sarvadā || 6 ||

vidyududyotavānaprasphuradvāsasaṃ prāvṛḍambhodavatprollasadvigraham || vanyayā mālayā śobhitoraḥsthalaṃ lohitāṃghridvayaṃ vārijākṣaṃ bhaje || 7 ||

kuñcitaiḥ kuntalairbhrājamānānanaṃ ratnamauliṃ lasat kuṇḍalaṃ gaṇḍayoḥ || hārakeyūrakaṃ kaṅkaṇaprojjvalaṃ kiṅkiṇīmañjulaṃ śyāmalaṃ taṃ bhaje || 8 ||

acyutasyāṣṭakaṃ yaḥ paṭhediṣṭadaṃ premataḥ pratyahaṃ pūruṣaḥ saspṛham | vṛttataḥ suṃdaraṃ kartṛ viśvaṃbharaṃ tasya vaśyo harirjāyate satvaram || 9 ||

|| iti śrīśaṃkarācāryaviracitamacyutāṣṭakaṃ saṃpūrṇam ||

Source: Wikisource · CC BY-SA 4.0

Send us your feedback

Tell us what to improve, what is wrong, or what you liked. We read every message.

About
How useful is Sankh for you? (optional)