tridalaṃ triguṇākāraṃ trinetraṃ ca triyāyudham | trijanmapāpasaṃhāram ekabilvaṃ śivārpaṇam || 1 ||
triśākhairbilvapatraiśca acchidraiḥ komalaiśśubhaiḥ | tava pūjāṃ kariṣyāmi ekabilvaṃ śivārpaṇam || 2 ||
darśanaṃ bilvavṛkṣasya sparśanaṃ pāpanāśanam | aghorapāpasaṃhāram ekabilvaṃ śivārpaṇam || 3 ||
kāśīkṣetranivāsaṃ ca kālabhairavadarśanam | prayāge mādhavaṃ dṛṣṭvā ekabilvaṃ śivārpaṇam || 4 ||
tulasī bilvanirguṇḍī jaṃbīrāmalakaṃ tathā | pañcabilvamiti khyātā ekabilvaṃ śivārpaṇam || 5 ||
taṭākaṃ dhananikṣepaṃ brahmasthāpyaṃ śivālayam | koṭikanyāmahādānam ekabilvaṃ śivārpaṇam || 6 ||
dantyaśvakoṭidānāni aśvamedhaśatāni ca | koṭikanyāmahādānam ekabilvaṃ śivārpaṇam || 7 ||
sālagrāmasahasrāṇi viprānnaṃ śatakoṭikam | yajñakoṭisahasrāṇi ekabilvaṃ śivārpaṇam || 8 ||
ajñānena kṛtaṃ pāpaṃ jñānenāpi kṛtaṃ ca yat | tatsarvaṃ nāśamāyātu ekabilvaṃ śivārpaṇam || 9 ||
ekaikabilvapatreṇa koṭiyajñaphalaṃ labhet | mahādevasya pūjārtham ekabilvaṃ śivārpaṇam || 10 ||
amṛtodbhavavṛkṣasya mahādevapriyasya ca | mucyante kaṇṭakāghātā kaṇṭakebhyo hi mānavāḥ || 11 ||
|| oṃ tatsat ||
Source: Wikisource · CC BY-SA 4.0