ഹോം › വേദ മന്ത്രങ്ങൾ › ആദിത്യഹൃദയമ്

ആദിത്യഹൃദയമ്

സ്തോത്രങ്ങൾ · 37 ശ്ലോകങ്ങൾ

॥ ആദിത്യഹൃദയമ് ॥

തതോ യുദ്ധപരിശ്രാന്തം സമരേ ചിന്തയാ സ്ഥിതമ്। രാവണം ചാഗ്രതോ ദൃഷ്ട്വാ യുദ്ധായ സമുപസ്ഥിതമ്॥ ൧ ॥

ദൈവതൈശ്ച സമാഗമ്യ ദ്രഷ്ടുമഭ്യാഗതോ രണമ്। ഉപാഗമ്യാബ്രവീദ്രാമമഗസ്ത്യോ ഭഗവാന് ഋഷിഃ॥ ൨ ॥

രാമ രാമ മഹാബാഹോ ശൃണു ഗുഹ്യം സനാതനമ്। യേന സര്വാനരീന് വത്സ സമരേ വിജയിഷ്യസി॥ ൩ ॥

ആദിത്യഹൃദയം പുണ്യം സര്വശത്രുവിനാശനമ്। ജയാവഹം ജപേന്നിത്യമ് അക്ഷയ്യം പരമം ശിവമ്॥ ൪ ॥

സര്വമങ്ഗളമാങ്ഗല്യം സര്വപാപപ്രണാശനമ്। ചിന്താശോകപ്രശമനമ് ആയുര്വര്ധനമുത്തമമ്॥ ൫ ॥

രശ്മിമംതം സമുദ്യന്തം ദേവാസുരനമസ്കൃതമ്। പൂജയസ്വ വിവസ്വന്തം ഭാസ്കരം ഭുവനേശ്വരമ്॥ ൬ ॥

സര്വദേവാത്മകോ ഹ്യേഷ തേജസ്വീ രശ്മിഭാവനഃ। ഏഷ ദേവാസുരഗണാഁല്ലോകാന് പാതി ഗഭസ്തിഭിഃ॥ ൭ ॥

ഏഷ ബ്രഹ്മാ ച വിഷ്ണുശ്ച ശിവഃ സ്കന്ദഃ പ്രജാപതിഃ। മഹേന്ദ്രോ ധനദഃ കാലോ യമഃ സോമോ ഹ്യപാം പതിഃ॥ ൮ ॥

പിതരോ വസവഃ സാധ്യാ ഹ്യശ്വിനൌ മരുതോ മനുഃ। വായുര്വഹ്നിഃ പ്രജാപ്രാണ ഋതുകര്താ പ്രഭാകരഃ॥ ൯ ॥

ആദിത്യഃ സവിതാ സൂര്യഃ ഖഗഃ പൂഷാ ഗഭസ്തിമാന്। സുവര്ണസദൃശോ ഭാനുര്ഹിരണ്യരേതാ ദിവാകരഃ॥ ൧൦ ॥

ഹരിദശ്വഃ സഹസ്രാര്ചിഃ സപ്തസപ്തിര്മരീചിമാന്। തിമിരോന്മഥനഃ ശമ്ഭുസ്ത്വഷ്ടാ മാര്താണ്ഡ അംശുമാന്॥ ൧൧ ॥

ഹിരണ്യഗര്ഭഃ ശിശിരസ്തപനോ ഭാസ്കരോ രവിഃ। അഗ്നിഗര്ഭോഽദിതേഃ പുത്രഃ ശങ്ഖഃ ശിശിരനാശനഃ॥ ൧൨ ॥

വ്യോമനാഥസ്തമോഭേദീ ഋഗ്യജുഃസാമപാരഗഃ। ഘനവൃഷ്ടിരപാം മിത്രോ വിന്ധ്യവീഥീപ്ലവങ്ഗമഃ॥ ൧൩ ॥

ആതപീ മണ്ഡലീ മൃത്യുഃ പിങ്ഗലഃ സര്വതാപനഃ। കവിര്വിശ്വോ മഹാതേജാഃ രക്തഃ സര്വഭവോദ്ഭവഃ॥ ൧൪

നക്ഷത്രഗ്രഹതാരാണാമധിപോ വിശ്വഭാവനഃ। തേജസാമപി തേജസ്വീ ദ്വാദശാത്മന് നമോഽസ്തു തേ॥ ൧൫ ॥

നമഃ പൂര്വായ ഗിരയേ പശ്ചിമായാദ്രയേ നമഃ।

ജ്യോതിര്ഗണാനാം പതയേ ദിനാധിപതയേ നമഃ॥ ൧൬ ॥

ജയായ ജയഭദ്രായ ഹര്യശ്വായ നമോ നമഃ।

നമോ നമഃ സഹസ്രാംശോ ആദിത്യായ നമോ നമഃ॥ ൧൭ ॥

നമ ഉഗ്രായ വീരായ സാരങ്ഗായ നമോ നമഃ।

നമഃ പദ്മപ്രബോധായ മാര്താണ്ഡായ നമോ നമഃ॥ ൧൮ ॥

ബ്രഹ്മേശാനാച്യുതേശായ സൂര്യായാദിത്യവര്ചസേ। ഭാസ്വതേ സര്വഭക്ഷായ രൌദ്രായ വപുഷേ നമഃ॥ ൧൯ ॥

തമോഘ്നായ ഹിമഘ്നായ ശത്രുഘ്നായാമിതാത്മനേ। കൃതഘ്നഘ്നായ ദേവായ ജ്യോതിഷാം പതയേ നമഃ॥ ൨൦ ॥

തപ്തചാമീകരാഭായ വഹ്നയേ വിശ്വകര്മണേ। നമസ്തമോഽഭിനിഘ്നായ രുചയേ ലോകസാക്ഷിണേ॥ ൨൧ ॥

നാശയത്യേഷ വൈ ഭൂതം തദേവ സൃജതി പ്രഭുഃ। പായത്യേഷ തപത്യേഷ വര്ഷത്യേഷ ഗഭസ്തിഭിഃ॥ ൨൨ ॥

ഏഷ സുപ്തേഷു ജാഗര്തി ഭൂതേഷു പരിനിഷ്ഠിതഃ। ഏഷ ഏവാഗ്നിഹോത്രം ച ഫലം ചൈവാഗ്നിഹോത്രിണാമ്॥ ൨൩ ॥

വേദാശ്ച ക്രതവശ്ചൈവ ക്രതൂനാം ഫലമേവ ച। യാനി കൃത്യാനി ലോകേഷു സര്വ ഏഷ രവിഃ പ്രഭുഃ॥ ൨൪ ॥

॥ ഫലശ്രുതിഃ॥

ഏനമാപത്സു കൃച്ഛ്രേഷു കാന്താരേഷു ഭയേഷു ച। കീര്തയന് പുരുഷഃ കശ്ചിന്നാവസീദതി രാഘവ॥ ൨൫ ॥

പൂജയസ്വൈനമേകാഗ്രോ ദേവദേവം ജഗത്പതിമ്। ഏതത് ത്രിഗുണിതം ജപ്ത്വാ യുദ്ധേഷു വിജയിഷ്യസി॥ ൨൬ ॥

അസ്മിന് ക്ഷണേ മഹാബാഹോ രാവണം ത്വം വധിഷ്യസി। ഏവമുക്ത്വാ തദാഗസ്ത്യോ ജഗാമ ച യഥാഗതമ്॥ ൨൭ ॥

ഏതച്ഛ്രുത്വാ മഹാതേജാ നഷ്ടശോകോഽഭവത്തദാ। ധാരയാമാസ സുപ്രീതോ രാഘവഃ പ്രയതാത്മവാന്॥ ൨൮ ॥

ആദിത്യം പ്രേക്ഷ്യ ജപ്ത്വാ തു പരം ഹര്ഷമവാപ്തവാന്। ത്രിരാചമ്യ ശുചിര്ഭൂത്വാ ധനുരാദായ വീര്യവാന്॥ ൨൯ ॥

രാവണം പ്രേക്ഷ്യ ഹൃഷ്ടാത്മാ യുദ്ധായ സമുപാഗമത്। സര്വയത്നേന മഹതാ വധേ തസ്യ ധൃതോഽഭവത്॥ ൩൦ ॥

അഥ രവിരവദന്നിരീക്ഷ്യ രാമം മുദിതമനാഃ പരമം പ്രഹൃഷ്യമാണഃ। നിശിചരപതിസംക്ഷയം വിദിത്വാ സുരഗണമധ്യഗതോ വചസ്ത്വരേതി॥ ൩൧ ॥

॥ ഇതി ആദിത്യഹൃദയമ് മന്ത്രസ്യ ॥

ഉറവിടം: Wikisource · CC BY-SA 4.0

നിങ്ങളുടെ അഭിപ്രായം അയയ്ക്കൂ

എന്ത് മെച്ചപ്പെടുത്തണം, എന്താണ് തെറ്റ്, അല്ലെങ്കിൽ നിങ്ങൾക്ക് എന്താണ് ഇഷ്ടപ്പെട്ടത് എന്ന് പറയൂ. ഓരോ സന്ദേശവും ഞങ്ങൾ വായിക്കുന്നു.

എന്തിനെക്കുറിച്ച്
ശംഖ് നിങ്ങൾക്ക് എത്രത്തോളം ഉപകാരപ്രദമാണ്? (ഐച്ഛികം)