॥ അന്നപൂര്ണാസ്തോത്രമ് ॥
നിത്യാനന്ദകരീ വരാഭയകരീ സൌന്ദര്യരത്നാകരീ നിര്ധൂതാഖിലഘോരപാവനകരീ പ്രത്യക്ഷമാഹേശ്വരീ । പ്രാലേയാചലവംശപാവനകരീ കാശീപുരാധീശ്വരീ ഭിക്ഷാം ദേഹി കൃപാവലമ്ബനകരീ മാതാന്നപൂര്ണേശ്വരീ ॥ ൧ ॥
നാനാരത്നവിചിത്രഭൂഷണകരീ ഹേമാമ്ബരാഡമ്ബരീ മുക്താഹാരവിലമ്ബമാനവിലസദ്വക്ഷോജകുമ്ഭാന്തരീ । കാശ്മീരാഗുരൂവാസിതാ രുചികരീ കാശീപുരാധീശ്വരീ ഭിക്ഷാം ദേഹി കൃപാവലമ്ബനകരീ മാതാന്നപൂര്ണേശ്വരീ ॥ ൨ ॥
യോഗാനന്ദകരീ രിപുക്ഷയകരീ ധര്മാഥനിഷ്ഠാകരീ ചന്ദ്രാര്കാനലഭാസമാനലഹരീ ത്രൈലോക്യരക്ഷാകരീ । സര്വൈശ്വര്യസമസ്തവാംഛനകരീ കാശീപുരാധീശ്വരീ ഭിക്ഷാം ദേഹി കൃപാവലമ്ബനകരീ മാതാന്നപൂര്ണേശ്വരീ ॥ ൩ ॥
കൈലാസാചലകന്ദരാലയകരീ ഗൌരീ ഉമാശങ്കരീ കൌമാരീ നിഗമാര്ഥഗോചരകരീ ഓംകാരബീജാക്ഷരീ । മോക്ഷദ്വാരകപാടപാടനകരീ കാശീപുരാധീശ്വരീ ഭിക്ഷാം ദേഹി കൃപാവലമ്ബനകരീ മാതാന്നപൂര്ണേശ്വരീ ॥ ൪ ॥
ദൃശ്യാദൃശ്യവിഭൂതവാഹനകരീ ബ്രഹ്മാണ്ഡഭാണ്ഡോദരീ ലീലാനാടകസൂത്രഭേദനകരീ വിജ്ഞാനദീപാങ്കുരീ । ശ്രീവിശ്വേശമനഃപ്രസാദനകരീ കാശീപുരാധീശ്വരീ ഭിക്ഷാം ദേഹി കൃപാവലമ്ബനകരീ മാതാന്നപൂര്ണേശ്വരീ ॥ ൫ ॥
ഉര്വീ സര്വജനേശ്വരീ ഭഗവതീ മാതാന്നപൂര്ണേശ്വരീ വേണീനീലസമാനകുന്തലഹരീ നിത്യാന്നദാനേശ്വരീ । സര്വാനന്ദകരീ സദാശുഭകരീ കാശീപുരാധീശ്വരീ ഭിക്ഷാം ദേഹി കൃപാവലമ്ബനകരീ മാതാന്നപൂര്ണേശ്വരീ ॥ ൬ ॥
ആദിക്ഷാന്തിസമസ്തവര്ണനകരീ ശമ്ഭോസ്ത്രിഭാവാകരീ കാശ്മീരാത്രിപുരേശ്വരീ ത്രിനയനീ നിത്യാങ്കുരാ ശര്വരീ । കാമാകാങ്ക്ഷകരീ ജനോദയകരീ കാശീപുരാധീശ്വരീ ഭിക്ഷാം ദേഹി കൃപാവലമ്ബനകരീ മാതാന്നപൂര്ണേശ്വരീ ॥ ൭ ॥
ദേവീ സര്വവിചിത്രരത്നരചിതാ ദാക്ഷായണീ സുന്ദരീ വാമാ സ്വാദുപയോഗധരപ്രിയകരീ സൌഭാഗ്യമാഹേശ്വരീ । ഭക്താഭീഷ്ടകരീ ദശാശുഭഹരീ കാശീപുരാധീശ്വരീ ഭിക്ഷാം ദേഹി കൃപാവലമ്ബനകരീ മാതാന്നപൂര്ണേശ്വരീ ॥ ൮ ॥
ചന്ദ്രാര്കാലയകോടികോടിസദൃശാ ചന്ദ്രാംശുബിമ്ബാധരീ ചന്ദ്രാര്കാഗ്നിസമാനകുംഡലധരീ ചന്ദ്രാര്കവര്ണേശ്വരീ । മാലാപുസ്തകപാശസാംകുശധരീ കാശീപുരാധീശ്വരീ ഭിക്ഷാം ദേഹി കൃപാവലമ്ബനകരീ മാതാന്നപൂര്ണേശ്വരീ ॥ ൯ ॥
ക്ഷത്രത്രാണകരീ മഹാഽഭയകരീ മാതാ കൃപാസാഗരീ സാക്ഷാന്മോക്ഷകരീ സദാ ശിവകരീ വിശ്വേശ്വരീ ശ്രീധരീ । ദക്ഷാക്രന്ദകരീ നിരാമയകരീ കാശീപുരാധീശ്വരീ ഭിക്ഷാം ദേഹി കൃപാവലമ്ബനകരീ മാതാന്നപൂര്ണേശ്വരീ ॥ ൧൦ ॥
ഭഗവതി ഭവരോഗാത്പീഡിതം ദുഷ്കൃതോത്ഥാത് സുതദുഹിതൃകലത്രോപദ്രവേണാനുയാതമ് । വിലസദമൃതദൃഷ്ട്യാ വീക്ഷ്യ വിഭ്രാന്തചിത്തം സകലഭുവനമാതസ്ത്രാഹി മാമോം നമസ്തേ ॥ ൧൧ ॥
മാഹേശ്വരീമാശ്രിതകല്പവല്ലീമഹമ്ഭവോച്ഛേദകരീം ഭവാനീംമ് । ക്ഷുധാര്തജായാതനയാദ്യുപേതസ്ത്വാമന്നപൂര്ണേ ശരണം പ്രപദ്യേ ॥ ൧൨ ॥
ദാരിദ്ര്യദാവാനലദഹ്യമാനം പാഹ്യന്നപൂര്ണേ ഗിരിരാജകന്യേ । കൃപാമ്ബുധൌ മജ്ജയ മാം ത്വദീയേ ത്വത്പാദപദ്മാര്പിതചിത്തവൃത്തിമ് ॥ ൧൩ ॥
അന്നപൂര്ണേ സദാ പൂര്ണേ ശങ്കരപ്രാണവല്ലഭേ । ജ്ഞാനവൈരാഗ്യസിദ്ധ്യര്ഥം ഭിക്ഷാം ദേഹി ച പാര്വതി ॥ ൧൪ ॥
മാതാ ച പാര്വതീ ദേവീ പിതാ ദേവോ മഹേശ്വരഃ । ബാന്ധവാഃ ശിവഭക്താശ്ച സ്വേദേശോ ഭുവനത്രയമ് ॥ ൧൫ ॥
ഇതി ശ്രീമച്ഛംകരാചാര്യവിരചിതമന്നപൂര്ണാസ്തോത്രം സംപൂര്ണമ് ।
ഉറവിടം: Wikisource · CC BY-SA 4.0