॥ശ്രീഗണേശപഞ്ചരത്നമ്॥
മുദാകരാത്തമോദകം സദാ വിമുക്തിസാധകം കലാധരാവതംസകം വിലാസലോകരക്ഷകമ്। അനായകൈകനായകം വിനാശിതേഭദൈത്യകം നതാശുഭാശുനാശകം നമാമി തം വിനായകമ്॥ ൧ ॥
നതേതരാതിഭീകരം നവോദിതാര്കഭാസ്വരം നമത്സുരാരിനിര്ജരം നതാധികാപദുദ്ധരമ്। സുരേശ്വരം നിധീശ്വരം ഗജേശ്വരം ഗണേശ്വരം മഹേശ്വരം തമാശ്രയേ പരാത്പരം നിരന്തരമ്॥ ൨ ॥
സമസ്തലോകശങ്കരം നിരസ്തദൈത്യകുഞ്ജരം ദരേതരോദരം വരം വരേഭവക്ത്രമക്ഷരമ്। കൃപാകരം ക്ഷമാകരം മുദാകരം യശസ്കരം മനസ്കരം നമസ്കൃതാം നമസ്കരോമി ഭാസ്വരമ്॥ ൩ ॥
അകിഞ്ചനാര്തിമാര്ജനം ചിരന്തനോക്തിഭാജനം പുരാരിപൂര്വനന്ദനം സുരാരിഗര്വചര്വണമ്। പ്രപഞ്ചനാശഭീഷണം ധനഞ്ജയാദിഭൂഷണം കപോലദാനവാരണം ഭജേ പുരാണവാരണമ്॥ ൪ ॥
നിതാന്തകാന്തദന്തകാന്തിമന്തകാന്തകാത്മജം അചിന്ത്യരൂപമന്തഹീനമന്തരായകൃന്തനമ്। ഹൃദന്തരേ നിരന്തരം വസന്തമേവ യോഗിനാം തമേകദന്തമേവ തം വിചിന്തയാമി സന്തതമ്॥ ൫ ॥
മഹാഗണേശപഞ്ചരത്നമാദരേണ യോഽന്വഹം പ്രജല്പതി പ്രഭാതകേ ഹൃദി സ്മരന് ഗണേശ്വരമ്। അരോഗതാം അദോഷതാം സുസാഹിതീം സുപുത്രതാം സമാഹിതായുരഷ്ടഭൂതിമഭ്യുപൈതി സോഽചിരാത്॥ ൬ ॥
ഉറവിടം: Wikisource · CC BY-SA 4.0