ഹോം › വേദ മന്ത്രങ്ങൾ › കനകധാരാസ്തോത്രമ്

കനകധാരാസ്തോത്രമ്

സ്തോത്രങ്ങൾ · 24 ശ്ലോകങ്ങൾ

॥ ശ്രീകനകധാരാസ്തോത്രമ് ॥

അങ്ഗം ഹരേഃ പുലകഭൂഷണമാശ്രയന്തീ ഭൃങ്ഗാങ്ഗനേവ മുകുലാഭരണം തമാലമ് । അങ്ഗീകൃതാഖിലവിഭൂതിരപാങ്ഗലീലാ മാങ്ഗല്യദാഽസ്തു മമ മങ്ഗളദേവതായാഃ ॥ ൧ ॥

മുഗ്ധാ മുഹുര്വിദധതീ വദനേ മുരാരേഃ പ്രേമത്രപാപ്രണിഹിതാനി ഗതാഗതാനി । മാലാ ദൃശോര്മധുകരീവ മഹോത്പലേ യാ സാ മേ ശ്രിയം ദിശതു സാഗരസമ്ഭവായാഃ ॥ ൨ ॥

ആമീലിതാക്ഷമധിഗമ്യ മുദാ മുകുന്ദമ്– ആനന്ദകന്ദമനിമേഷമനങ്ഗതന്ത്രമ്। ആകേകരസ്ഥിതകനീനികപക്ഷ്മനേത്രം ഭൂത്യൈ ഭവേന്മമ ഭുജങ്ഗശയാങ്ഗനായാഃ ॥ ൩ ॥

ബാഹ്വന്തരേ മധുജിതഃ ശ്രിതകൌസ്തുഭേ യാ ഹാരാവലീവ ഹരിനീലമയീ വിഭാതി । കാമപ്രദാ ഭഗവതോഽപി കടാക്ഷമാലാ കല്യാണമാവഹതു മേ കമലാലയായാഃ ॥ ൪ ॥

കാലാമ്ബുദാലിലലിതോരസി കൈടഭാരേര്– ധാരാധരേ സ്ഫുരതി യാ തഡിദങ്ഗനേവ । മാതുഃ സമസ്തജഗതാം മഹനീയമൂര്തിര്– ഭദ്രാണി മേ ദിശതു ഭാര്ഗവനന്ദനായാഃ ॥ ൫ ॥

പ്രാപ്തം പദം പ്രഥമതഃ ഖലു യത്പ്രഭാവാന്– മാങ്ഗല്യഭാജി മധുമാഥിനി മന്മഥേന । മയ്യാപതേത്തദിഹ മന്ഥരമീക്ഷണാര്ധം മന്ദാലസം ച മകരാലയകന്യകായാഃ ॥ ൬ ॥

വിശ്വാമരേന്ദ്രപദവിഭ്രമദാനദക്ഷമ്– ആനന്ദഹേതുരധികം മുരവിദ്വിഷോഽപി । ഈഷന്നിഷീദതു മയി ക്ഷണമീക്ഷണാര്ധമ്– ഇന്ദീവരോദരസഹോദരമിന്ദിരായാഃ ॥ ൭ ॥

ഇഷ്ടാവിശിഷ്ടമതയോഽപി യയാ ദയാര്ദ്ര– ദൃഷ്ട്യാ ത്രിവിഷ്ടപപദം സുലഭം ലഭന്തേ । ദൃഷ്ടിഃ പ്രഹൃഷ്ടകമലോദരദീപ്തിരിഷ്ടാം പുഷ്ടിം കൃഷീഷ്ട മമ പുഷ്കരവിഷ്ടരായാഃ ॥ ൮ ॥

ദദ്യാദ്ദയാനുപവനോ ദ്രവിണാമ്ബുധാരാമ്– അസ്മിന്നകിഞ്ചനവിഹങ്ഗശിശൌ വിഷണ്ണേ । ദുഷ്കര്മധര്മമപനീയ ചിരായ ദൂരം നാരായണപ്രണയിനീനയനാമ്ബുവാഹഃ ॥ ൯ ॥

ഗീര്ദേവതേതി ഗരുഡ഼ധ്വജസുന്ദരീതി ശാകമ്ഭരീതി ശശിശേഖരവല്ലഭേതി । സൃഷ്ടിസ്ഥിതിപ്രലയകേലിഷു സംസ്ഥിതായൈ തസ്യൈ നമസ്ത്രിഭുവനൈകഗുരോസ്തരുണ്യൈ ॥ ൧൦ ॥

ശ്രുത്യൈ നമോഽസ്തു ശുഭകര്മഫലപ്രസൂത്യൈ രത്യൈ നമോഽസ്തു രമണീയഗുണാര്ണവായൈ । ശക്ത്യൈ നമോഽസ്തു ശതപത്രനികേതനായൈ പുഷ്ട്യൈ നമോഽസ്തു പുരുഷോത്തമവല്ലഭായൈ ॥ ൧൧ ॥

നമോഽസ്തു നാലീകനിഭാനനായൈ നമോഽസ്തു ദുഗ്ധോദധിജന്മഭൂത്യൈ । നമോഽസ്തു സോമാമൃതസോദരായൈ നമോഽസ്തു നാരായണവല്ലഭായൈ ॥ ൧൨ ॥

നമോഽസ്തു ഹേമാമ്ബുജപീഠികായൈ നമോഽസ്തു ഭൂമണ്ഡലനായികായൈ । നമോഽസ്തു ദേവാദിദയാപരായൈ നമോഽസ്തു ശാര്ങ്ഗായുധവല്ലഭായൈ ॥ ൧൩ ॥

നമോഽസ്തു ദേവ്യൈ ഭൃഗുനന്ദനായൈ നമോഽസ്തു വിഷ്ണോരുരസി സ്ഥിതായൈ । നമോഽസ്തു ലക്ഷ്മ്യൈ കമലാലയായൈ നമോഽസ്തു ദാമോദരവല്ലഭായൈ ॥ ൧൪ ॥

നമോഽസ്തു കാന്ത്യൈ കമലേക്ഷണായൈ നമോഽസ്തു ഭൂത്യൈ ഭുവനപ്രസൂത്യൈ । നമോഽസ്തു ദേവാദിഭിരര്ചിതായൈ നമോഽസ്തു നന്ദാത്മജവല്ലഭായൈ ॥ ൧൫ ॥

സമ്പത്കരാണി സകലേന്ദ്രിയനന്ദനാനി സാമ്രാജ്യദാനവിഭവാനി സരോരുഹാക്ഷി । ത്വദ്വന്ദനാനി ദുരിതോദ്ധരണോദ്യതാനി മാമേവ മാതരനിശം കലയന്തു മാന്യേ ॥ ൧൬ ॥

യത്കടാക്ഷസമുപാസനാവിധിഃ സേവകസ്യ സകലാര്ഥസമ്പദഃ । സന്തനോതി വചനാങ്ഗമാനസൈസ്– ത്വാം മുരാരിഹൃദയേശ്വരീം ഭജേ ॥ ൧൭ ॥

സരസിജനിലയേ സരോജഹസ്തേ ധവലതമാംശുകഗന്ധമാല്യശോഭേ । ഭഗവതി ഹരിവല്ലഭേ മനോജ്ഞേ ത്രിഭുവനഭൂതികരി പ്രസീദ മഹ്യമ് ॥ ൧൮ ॥

ദിഗ്ഘസ്തിഭിഃ കനകകുമ്ഭമുഖാവസൃഷ്ട– സ്വര്വാഹിനീവിമലചാരുജലപ്ലുതാങ്ഗീമ് । പ്രാതര്നമാമി ജഗതാം ജനനീമശേഷ– ലോകാധിനാഥഗൃഹിണീമമൃതാബ്ധിപുത്രീമ് ॥ ൧൯ ॥

കമലേ കമലാക്ഷവല്ലഭേ ത്വം കരുണാപൂരതരങ്ഗിതൈരപാങ്ഗൈഃ । അവലോകയ മാമകിഞ്ചനാനാം പ്രഥമം പാത്രമകൃത്രിമം ദയായാഃ ॥ ൨൦ ॥

ദേവി പ്രസീദ ജഗദീശ്വരി ലോകമാതഃ കല്യാണഗാത്രി കമലേക്ഷണജീവനാഥേ । ദാരിദ്ര്യഭീതിഹൃദയം ശരണാഗതം മാമ്– ആലോകയ പ്രതിദിനം സദയൈരപാങ്ഗൈഃ ॥ ൨൧ ॥

സ്തുവന്തി യേ സ്തുതിഭിരമൂഭിരന്വഹം ത്രയീമയീം ത്രിഭുവനമാതരം രമാമ് । ഗുണാധികാ ഗുരുതരഭാഗ്യഭാഗിനോ ഭവന്തി തേ ഭുവി ബുധഭാവിതാശയാഃ ॥ ൨൨ ॥

॥ ഇതി ശ്രീമച്ഛങ്കരാചാര്യകൃതം ശ്രീകനകധാരാസ്തോത്രം സമ്പൂര്ണമ് ॥

ഉറവിടം: Wikisource · CC BY-SA 4.0

നിങ്ങളുടെ അഭിപ്രായം അയയ്ക്കൂ

എന്ത് മെച്ചപ്പെടുത്തണം, എന്താണ് തെറ്റ്, അല്ലെങ്കിൽ നിങ്ങൾക്ക് എന്താണ് ഇഷ്ടപ്പെട്ടത് എന്ന് പറയൂ. ഓരോ സന്ദേശവും ഞങ്ങൾ വായിക്കുന്നു.

എന്തിനെക്കുറിച്ച്
ശംഖ് നിങ്ങൾക്ക് എത്രത്തോളം ഉപകാരപ്രദമാണ്? (ഐച്ഛികം)