മഹിഷാസുരമര്ദിനീസ്തോത്രമ് (അയി ഗിരിനന്ദിനി)
സ്തോത്രങ്ങൾ · 22 ശ്ലോകങ്ങൾ
അയിഗിരിനന്ദിനി നന്ദിതമേദിനി വിശ്വവിനോദിനി നന്ദനുതേ ഗിരിവരവിന്ധ്യ-ശിരോധിനിവാസിനി വിഷ്ണുവിലാസിനി ജിഷ്ണുനുതേ। ഭഗവതി ഹേ ശിതികണ്ഠകുടുമ്ബിനി ഭൂരികുടുമ്ബിനി ഭൂരികൃതേ ജയ ജയ ഹേ മഹിഷാസുരമര്ദിനി രമ്യ കപര്ദിനി ശൈലസുതേ॥ ൧ ॥
സുരവരവര്ഷിണി ദുര്ധരധര്ഷിണി ദുര്മുഖമര്ഷിണീ ഹര്ഷരതേ ത്രിഭുവനപോഷിണി ശംകരതോഷിണി കില്ബിഷമോഷിണി ഘോഷരതേ। ദനുജനിരോഷിണി ദിതിസുതരോഷിണി ദുര്മദശോഷിണി സിന്ധുസുതേ ജയ ജയ ഹേ മഹിഷാസുരമര്ദിനി രമ്യ കപര്ദിനി ശൈലസുതേ॥ ൨ ॥
അയി ജഗദമ്ബ മദമ്ബ കദമ്ബവനപ്രിയവാസിനി ഹാസരതേ ശിഖരിശിരോമണി തുങ്ഗഹിമാലയശൃങ്ഗനിജാലയമധ്യഗതേ। മധുമധുരേ മധുകൈടഭഗഞ്ജിനി കൈടഭഭഞ്ജിനി രാസരതേ ജയ ജയ ഹേ മഹിഷാസുരമര്ദിനി രമ്യ കപര്ദിനി ശൈലസുതേ॥ ൩ ॥
അയി ശതഖണ്ഡവിഖണ്ഡിതരുണ്ഡവിതുണ്ഡിതശുണ്ഡഗജാധിപതേ രിപുഗജഗണ്ഡവിദാരണചണ്ഡപരാക്രമശുണ്ഡമൃഗാധിപതേ। നിജഭുജദണ്ഡനിപാതിതഖണ്ഡവിപാതിതമുണ്ഡഭടാധിപതേ ജയ ജയ ഹേ മഹിഷാസുരമര്ദിനി രമ്യ കപര്ദിനി ശൈലസുതേ॥ ൪ ॥
അയി രണദുര്മദശത്രുവധോദ്യതദുര്ധരനിര്ജരശക്തിഭൃതേ ചതുരവിചാരധുരീണമഹാശിവദൂതകൃതപ്രമഥാധിപതേ। ദുരിതദുരീഹദുരാശയദുര്മതിദാനവദൂതകൃതാന്തമതേ ജയ ജയ ഹേ മഹിഷാസുരമര്ദിനി രമ്യ കപര്ദിനി ശൈലസുതേ॥ ൫ ॥
അയി ശരണാഗതവൈരിവധൂവരവീരവരാഭയദാനകരേ ത്രിഭുവനമസ്തകശൂലവിരോധിശിരോധികൃതാമലശൂലകരേ। ദുമിദുമിതാമരദുന്ദുഭിനാദമഹോ മുഖരീകൃതതിഗ്മകരേ ജയ ജയ ഹേ മഹിഷാസുരമര്ദിനി രമ്യ കപര്ദിനി ശൈലസുതേ॥ ൬ ॥
അയി നിജഹുങ്കൃതിമാത്രനിരാകൃതധൂമ്രവിലോചനധൂമ്രശതേ സമരവിശോഷിതശോണിതബീജസമുദ്ഭവശോണിതബീജലതേ। ശിവശിവശുമ്ഭനിശുമ്ഭമഹാഹവതര്പിതഭൂതപിശാചരതേ ജയ ജയ ഹേ മഹിഷാസുരമര്ദിനി രമ്യ കപര്ദിനി ശൈലസുതേ॥ ൭ ॥
ധനുരനുസംഗരണക്ഷണസംഗപരിസ്ഫുരദങ്ഗനടത്കടകേ കനകപിശങ്ഗപൃഷത്കനിഷങ്ഗരസദ്ഭടശൃങ്ഗഹതാബടുകേ। കൃതചതുരംഗബലക്ഷിതിരങ്ഗഘടദ്ബഹുരങ്ഗരടദ്ബടുകേ ജയ ജയ ഹേ മഹിഷാസുരമര്ദിനി രമ്യ കപര്ദിനി ശൈലസുതേ॥ ൮ ॥
സുരലലനാ-തതഥേയി-തഥേയി-കൃതാഭിനയോദര-നൃത്യരതേ കൃതകുകുഥഃ കുകുഥോ ഗഡദാദിക-താല-കുതൂഹല-ഗാനരതേ। ധുധുകുട ധുക്കുട ധിംധിമിതധ്വനിധീരമൃദങ്ഗനിനാദരതേ ജയ ജയ ഹേ മഹിഷാസുരമര്ദിനി രമ്യകപര്ദിനി ശൈലസുതേ॥ ൯ ॥
ജയ-ജയ-ജപ്യ-ജയേജയശബ്ദ-പരസ്തുതി-തത്പരവിശ്വനുതേ ഝണ-ഝണ-ഝിഞ്ഝിമി ഝിങ്കൃത നൂപുരസിംജിതമോഹിത ഭൂതപതേ। നടിതനടാര്ധ നടീ നട നായക നാടിതനാട്യ സുഗാനരതേ ജയ ജയ ഹേ മഹിഷാസുരമര്ദിനി രമ്യ കപര്ദിനി ശൈലസുതേ॥ ൧൦ ॥
അയി സുമനഃ സുമനഃ സുമനഃ സുമനഃ സുമനോഹരകാംതിയുതേ ശ്രിതരജനീ-രജനീരജനീ-രജനീരജനീകര-വക്ത്രവൃതേ। സുനയനവിഭ്രമര-ഭ്രമരഭ്രമര-ഭ്രമരഭ്രമരാധിപതേ। ജയ ജയ ഹേ മഹിഷാസുരമര്ദിനി രമ്യ കപര്ദിനി ശൈലസുതേ॥ ൧൧ ॥
സഹിതമഹാഹവ-മല്ലമതല്ലിക-മല്ലിതരല്ലക-മല്ലരതേ വിരചിതവല്ലിക-പല്ലികമല്ലിക-ഭില്ലികഭില്ലിക-വര്ഗവൃതേ। സിത്കൃത്പുല്ലസമുല്ലസിതാരുണ-തല്ലജ-പല്ലവ-സല്ലലിതേ ജയ ജയ ഹേ മഹിഷാസുരമര്ദിനി രമ്യ കപര്ദിനി ശൈലസുതേ॥ ൧൨ ॥
അവിരലഗണ്ഡ-ഗലന്മദമേദുര-മത്തമത്തംഗജ-രാജപതേ ത്രിഭിവനഭൂഷണഭൂത-കലാനിധി-രൂപപയോനിധി-രാജസുതേ। അയി സുദതീജന-ലാലസമാനസ-മോഹനമന്മഥരാജസുതേ ജയ ജയ ഹേ മഹിഷാസുരമര്ദിനി രമ്യ കപര്ദിനി ശൈലസുതേ॥ ൧൩ ॥
കമലദലാമല-കോമലകാന്തി-കലാ-കലിതാമല-ഭാലലതേ സകലവിലാസ-കലാനിലയക്രമ-കേലിചലത്കല-ഹംസകുലേ। അലികുലസങ്കുല-കുവലയമണ്ഡല-മൌലിമിലദ്ബകുലാലികുലേ ജയ ജയ ഹേ മഹിഷാസുരമര്ദിനി രമ്യ കപര്ദിനി ശൈലസുതേ॥ ൧൪ ॥
കരമുരലീരവ-വീജിതകൂജിത-ലജ്ജിതകോകില-മഞ്ജുമതേ മിലിതപുലിന്ദ-മനോഹരഗുംജിത-രംജിതശൈല-നികുഞ്ജഗതേ। നിജഗുണഭൂത-മഹാശബരീഗണ-സദ്ഗുണസമ്ഭൃത-കേലിതലേ ജയ ജയ ഹേ മഹിഷാസുരമര്ദിനി രമ്യ കപര്ദിനി ശൈലസുതേ॥ ൧൫ ॥
കടിതടപീത-ദുകൂലവിചിത്ര-മയൂഖതിരസ്കൃത-ചന്ദ്രരുചേ പ്രണതസുരാസുര-മൌലിമണിസ്ഫുരദംശുല-സന്നഖ-ചന്ദ്രരുചേ। ജിതകനകാചല-മൌലിപദോര്ജിത-നിര്ഭരകുംജര-കുമ്ഭകുചേ ജയ ജയ ഹേ മഹിഷാസുരമര്ദിനി രമ്യ കപര്ദിനി ശൈലസുതേ॥ ൧൬ ॥
വിജിതസഹസ്ര-കരൈക-സഹസ്ര-കരൈക-സഹസ്ര-കരൈകനുതേ കൃതസുരതാരക-സങ്ഗരതാരക-സങ്ഗരതാരക-സുനൂസുതേ। സുരഥസമാധി-സമാനസമാധി-സമാധി-സമാധി-സുജാതരതേ ജയ ജയ ഹേ മഹിഷാസുരമര്ദിനി രമ്യ കപര്ദിനി ശൈലസുതേ॥ ൧൭ ॥
പദകമലം കരുണാനിലയേ വരിവസ്യതി യോനുദിനമ് സ ശിവേ അയി കമലേ കമലാനിലയേ കമലാനിലയഃ സ കഥം ന ഭവേത്। തവ പദമേവ പരമ്പദമിത്യനുശീലയതോ മമ കിം ന ശിവേ ജയ ജയ ഹേ മഹിഷാസുരമര്ദിനി രമ്യ കപര്ദിനി ശൈലസുതേ॥ ൧൮ ॥
കനകലസത്കലസിന്ധു-ജലൈരനു-സിഞ്ചിനുതേ ഗുണരങ്ഗഭുവമ് ഭജതി സ കിം ന ശചീകുചകുമ്ഭതടീപരിരമ്ഭ-സുഖാനുഭവമ്। തവചരണം ശരണങ്കരവാണി നതാമരവാണിനിവാസിശിവമ് ജയ ജയ ഹേ മഹിഷാസുരമര്ദിനി രമ്യ കപര്ദിനി ശൈലസുതേ॥ ൧൯ ॥
തവ വിമലേന്ദുകുലം വദനേന്ദുമലം സകലം നനുകൂലയതേ കിമു പുരുഹൂതപുരീന്ദു-മുഖീ-സുമുഖീഭിരസൌ വിമുഖീക്രിയതേ। മമ തു മതം ശിവനാമധനേ ഭവതീ കൃപയാ കിമുത ക്രിയതേ ജയ ജയ ഹേ മഹിഷാസുരമര്ദിനി രമ്യ കപര്ദിനി ശൈലസുതേ॥ ൨൦ ॥
അയി മയി ദീന ദയാലുതയാ കൃപയൈവ ത്വയാ ഭവിതവ്യമുമേ അയി ജഗതോ ജനനീ കൃപയാസി യഥാസി തഥാനുമിതാസിരതേ। യദുചിതമത്ര ഭവത്യുരരീ-കുരുതാദുരുതാപമപാകുരുതേ ജയ ജയ ഹേ മഹിഷാസുരമര്ദിനി രമ്യ കപര്ദിനി ശൈലസുതേ॥ ൨൧ ॥
സ്തുതിമിമാം സ്തിമിതഃ സുസമാധിനാ നിയമതോ യമതോനുദിനം പഠേത്। പരമയാ രമയാ സ നിഷേവ്യതേ പരിജനോഽരിജനോഽപി ച തം ഭജേത് ॥
ഉറവിടം: Wikisource · CC BY-SA 4.0