॥ അഥ നവഗ്രഹസ്തോത്രമ് ॥
॥ രവിഃ ॥
ജപാകുസുമസങ്കാശം കാശ്യപേയം മഹാദ്യുതിമ്। തമോഽരിം സര്വപാപഘ്നം പ്രണതോഽസ്മി ദിവാകരമ്॥ ൧ ॥
॥ സോമഃ ॥
ദധിശങ്ഖതുഷാരാഭം ക്ഷീരോദാര്ണവസമ്ഭവമ്। നമാമി ശശിനം സോമം ശമ്ഭോര്മുകുടഭൂഷണമ്॥ ൨ ॥
॥ മങ്ഗളഃ ॥
ധരണീഗര്ഭസമ്ഭൂതം വിദ്യുത്കാന്തിസമപ്രഭമ്। കുമാരം ശക്തിഹസ്തം തം മങ്ഗളം പ്രണമാമ്യഹമ്॥ ൩ ॥
॥ ബുധഃ ॥
പ്രിയങ്ഗുകലികാശ്യാമം രൂപേണാപ്രതിമം ബുധമ്। സൌമ്യം സൌമ്യഗുണോപേതം തം ബുധം പ്രണമാമ്യഹമ്॥ ൪ ॥
॥ ഗുരുഃ ॥
ദേവാനാം ച ഋഷീണാം ച ഗുരും കാഞ്ചനസന്നിഭമ്। ബുദ്ധിഭൂതം ത്രിലോകേശം തം നമാമി ബൃഹസ്പതിമ്॥ ൫ ॥
॥ ശുക്രഃ ॥
ഹിമകുന്ദമൃണാലാഭം ദൈത്യാനാം പരമം ഗുരുമ്। സര്വശാസ്ത്രപ്രവക്താരം ഭാര്ഗവം പ്രണമാമ്യഹമ്॥ ൬ ॥
॥ ശനിഃ ॥
നീലാഞ്ജനസമാഭാസം രവിപുത്രം യമാഗ്രജമ്। ഛായാമാര്തണ്ഡസമ്ഭൂതം തം നമാമി ശനൈശ്ചരമ്॥ ൭ ॥
॥ രാഹുഃ ॥
അര്ധകായം മഹാവീര്യം ചന്ദ്രാദിത്യവിമര്ദനമ്। സിംഹികാഗര്ഭസംഭൂതം തം രാഹും പ്രണമാമ്യഹമ്॥ ൮ ॥
॥ കേതുഃ ॥
പലാശപുഷ്പസങ്കാശം താരകാഗ്രഹമസ്തകമ്। രൌദ്രം രൌദ്രാത്മകം ഘോരം തം കേതും പ്രണമാമ്യഹമ്॥ ൯ ॥
॥ ഫലശ്രുതിഃ ॥
ഇതി വ്യാസമുഖോദ്ഗീതം യഃ പഠേത്സുസമാഹിതഃ। ദിവാ വാ യദി വാ രാത്രൌ വിഘ്നശാന്തിര്ഭവിഷ്യതി॥
നരനാരീനൃപാണാം ച ഭവേദ്ദുഃസ്വപ്നനാശനമ്। ഐശ്വര്യമതുലം തേഷാമാരോഗ്യം പുഷ്ടിവര്ധനമ്॥
ഗ്രഹനക്ഷത്രജാഃ പീഡാസ്തസ്കരാഗ്നിസമുദ്ഭവാഃ। താഃ സര്വാഃ പ്രശമം യാന്തി വ്യാസോ ബ്രൂതേ ന സംശയഃ॥
॥ ഇതി ശ്രീവ്യാസവിരചിതമ് ആദിത്യാദിനവഗ്രഹസ്തോത്രം സമ്പൂര്ണമ് ॥
ഉറവിടം: Wikisource · CC BY-SA 4.0