ഹോം › വേദ മന്ത്രങ്ങൾ › ശ്രീരാമരക്ഷാസ്തോത്രമ്

ശ്രീരാമരക്ഷാസ്തോത്രമ്

സ്തോത്രങ്ങൾ · 45 ശ്ലോകങ്ങൾ

അസ്യ ശ്രീരാമരക്ഷാസ്തോത്രമന്ത്രസ്യ । ബുധകൌശികഋഷിഃ । ശ്രീസീതാരാമചന്ദ്രോ ദേവതാ । അനുഷ്ടുപ് ഛ്ന്ദഃ । സീതാ ശക്തിഃ । ശ്രീമദ് ഹനുമാന് കീലകമ് । ശ്രീരാമചന്ദ്രപ്രീത്യര്ഥേ ജപേ വിനിയോഗഃ । അഥ ധ്യാനമ് । ധ്യായേദാജാനുബാഹും ധൃതശരധനുഷം । ബദ്ധപദ്മാസനസ്ഥമ് । പീതം വാസോ വസാനം നവകമലദലസ്പര്ധിനേത്രം പ്രസന്നമ് । വാമാങ്കാരൂഢസീതാമുഖകമലമിലല്ലോചനം നീരദാഭമ് । നാനാലങ്കാരദീപ്തം ദധതമുരുജടാമണ്ഡനം രാമചന്ദ്രമ് ॥

ഇതി ധ്യാനമ് । ചരിതം രഘുനാഥസ്യ ശതകോടിപ്രവിസ്തരമ് । ഏകൈകമക്ഷരം പുംസാം മഹാപാതകനാശനമ് ॥ ൧ ॥

ധ്യാത്വാ നീലോത്പലശ്യാമം രാമം രാജീവലോചനമ് । ജാനകീലക്ഷ്മണോപേതം ജടാമുകുടമണ്ഡിതമ് ॥ ൨ ॥

സാസിതൂണധനുര്ബാണപാണിം നക്തംചരാന്തകമ് । സ്വലീലയാ ജഗത്ത്രാതുമാവിര്ഭൂതമജം വിഭുമ് ॥ ൩ ॥

രാമരക്ഷാമ് പഠേത് പ്രാജ്ഞഃ പാപഘ്നീം സര്വകാമദാമ് । ശിരോ മേ രാഘവഃ പാതു ഭാലം ദശരഥാത്മജഃ ॥ ൪ ॥

കൌസല്യേയോ ദൃശൌ പാതു വിശ്വാമിത്രപ്രിയഃ ശ്രുതീ । ഘ്രാണം പാതു മഖത്രാതാ മുഖം സൌമിത്രിവത്സലഃ ॥ ൫ ॥

ജിഹ്വാം വിദ്യാനിധിഃ പാതു കണ്ഠം ഭരതവന്ദിതഃ । സ്കന്ധൌ ദിവ്യായുധഃ പാതു ഭുജൌ ഭഗ്നേശകാര്മുകഃ ॥ ൬ ॥

കരൌ സീതാപതിഃ പാതു ഹൃദയം ജാമദഗ്ന്യജിത് । മധ്യം പാതു ഖരധ്വംസീ നാഭിം ജാമ്ബവദാശ്രയഃ ॥ ൭ ॥

സുഗ്രീവേശഃ കടീ പാതു സക്ഥിനീ ഹനുമത്പ്രഭുഃ । ഊരൂ രഘൂത്തമഃ പാതു രക്ഷഃകുലവിനാശകൃത് ॥ ൮ ॥

ജാനുനീ സേതുകൃത് പാതു ജങ്ഘേ ദശമുഖാന്തകഃ । പാദൌ വിഭീഷണശ്രീദഃ പാതു രാമോഽഖിലം വപുഃ ॥ ൯ ॥

ഏതാം രാമബലോപേതാം രക്ഷാം യഃ സുകൃതീ പഠേത് । സ ചിരായുഃ സുഖീ പുത്രീ വിജയീ വിനയീ ഭവേത് ॥ ൧൦ ॥

പാതാലഭൂതലവ്യോമ ചാരിണശ്ഛദ്മചാരിണഃ । ന ദ്രഷ്ടുമപി ശക്താസ്തേ രക്ഷിതം രാമനാമഭിഃ ॥ ൧൧ ॥

രാമേതി രാമഭദ്രേതി രാമചന്ദ്രേതി വാ സ്മരന് । നരോ ന ലിപ്യതേ പാപൈര്ഭുക്തിം മുക്തിം ച വിന്ദതി ॥ ൧൨ ॥

ജഗജ്ജൈത്രേകമന്ത്രേണ രാമനാമ്നാഭിരക്ഷിതമ് । യഃ കന്ഠേ ധാരയേത്തസ്യ കരസ്ഥാഃ സര്വസിധ്ദയഃ ॥ ൧൩ ॥

വജ്രപഞ്ജരനാമേദമം യോ രാമകവചം സ്മരേത് । അവ്യാഹതാജ്ഞഃ സര്വത്ര ലഭതേ ജയമങ്ഗളമ് ॥ ൧൪ ॥

ആദിഷ്ടവാന് യഥാ സ്വപ്നേ രാമരക്ഷാമിമാം ഹരഃ । തഥാ ലിഖിതവാന് പ്രാതഃ പ്രബുദ്ധോ ബുധകൌശികഃ ॥ ൧൫ ॥

ആരാമഃ കല്പവൃക്ഷാണാം വിരാമഃ സകലാപദാമ് । അഭിരാമസ്ത്രിലോകാനാം രാമഃ ശ്രീമാന് സ നഃ പ്രഭുഃ ॥ ൧൬ ॥

തരുണൌ രൂപസംപന്നൌ സുകുമാരൌ മഹാബലൌ । പുണ്ഡരീക വിശാലാക്ഷൌ ചീരകൃഷ്ണാജിനാമ്ബരൌ ॥ ൧൭ ॥

ഫലമൂലാശിനൌ ദാന്തൌ താപസൌ ബ്രഹ്മചാരിണൌ । പുത്രൌ ദശരഥസ്യൈതൌ ഭ്രാതരൌ രാമലക്ഷ്മണൌ ॥ ൧൮ ॥

ശരണ്യൌ സര്വസത്വാനാം ശ്രേഷ്ഠൌ സര്വധനുഷ്മതാമ് । രക്ഷഃ കുലനിഹന്താരൌ ത്രായേതാം നോ രഘൂത്തമൌ ॥ ൧൯ ॥

ആത്തസജ്ജധനുഷാവിഷുസ്പൃശാവക്ഷയാശുഗനിഷങ്ഗസങ്ഗിനൌ । രക്ഷണായ മമ് രാമലക്ഷ്മണാവഗ്രതഃ പഥി സദൈവ ഗച്ഛതാമ് ॥ ൨൦ ॥

സംനദ്ധഃ കവചീ ഖഡ്ഗീ ചാപബാണധരോ യുവാ । ഗച്ഛന് മനോരഥോഽസ്മാകം രാമഃ പാതു സലക്ഷ്മണഃ ॥ ൨൧ ॥

രാമോ ദാശരഥിഃ ശൂരോ ലക്ഷ്മണാനുചരോ ബലീ । കാകുത്സ്ഥഃ പുരുഷഃ പൂര്ണഃ കൌസല്യേയോ രഘൂത്തമഃ ॥ ൨൨ ॥

വേദാന്തവേദ്യോ യജ്ഞേശഃ പുരാണപുരുഷോത്തമഃ । ജാനകീവല്ലഭഃ ശ്രീമാനപ്രമേയപരാക്രമഃ ॥ ൨൩ ॥

ഇത്യേതാനി ജപേന്നിത്യം മദ്ഭക്തഃ ശ്രദ്ധയാന്വിതഃ । അശ്വമേധാധികം പുണ്യം സമ്പ്രാപ്നോതി ന സംശയഃ ॥ ൨൪ ॥

രാമംദൂര്വാദലശ്യാമം പദ്മാക്ഷം പീതവാസസമ് । സ്തുവന്തി നാമഭിര്ദിവ്യൈര്ന തേ സംസാരിണോ നരഃ ॥ ൨൫ ॥

രാമം ലക്ഷ്മണപൂര്വജമ് രഘുവരം സീതാപതിം സുന്ദരമ് । കാകുത്സ്ഥം കരുണാര്ണവം ഗുണനിധിം വിപ്രപ്രിയം ധാര്മികമ് ॥

രാജേന്ദ്രം സത്യസന്ധം ദശരഥതനയം ശ്യാമലം ശാന്തമൂര്തിമ് । വന്ദേ ലോകാഭിരാമം രഘുകുലതിലകമ് രാഘവം രാവണാരിമ് ॥ ൨൬ ॥

രാമായ രാമഭദ്രായ രാമചന്ദ്രായ വേധസേ । രഘുനാഥായ നാഥായ സീതായാഃ പതയേ നമഃ ॥ ൨൭ ॥

ശ്രീരാമ രാമ രഘുനന്ദന രാമ രാമ । ശ്രീരാമ രാമ ഭരതാഗ്രജ രാമ രാമ ॥

ശ്രീരാമ രാമ രണകര്കശ രാമ രാമ । ശ്രീരാമ രാമ ശരണം ഭവ രാമ രാമ ॥ ൨൮ ॥

ശ്രീരാമചന്ദ്രചരണൌ മനസാ സ്മരാമി । ശ്രീരാമചന്ദ്രചരണൌ വചസാ ഗൃണാമി ॥

ശ്രീരാമചന്ദ്രചരണൌ ശിരസാ നമാമി । ശ്രീരാമചന്ദ്രചരണൌ ശരണം പ്രപദ്യേ ॥ ൨൯ ॥

മാതാ രാമോ മത്പിതാ രാമചന്ദ്രഃ । സ്വാമീ രാമോ മത്സഖാ രാമചന്ദ്രഃ ॥

സര്വസ്വം മേ രാമചന്ദ്രോ ദയാലുഃ । നാന്യം ജാനേ നൈവ ജാനേ ന ജാനേ ॥ ൩൦ ॥

ദക്ഷിണേ ലക്ഷ്മണോ യസ്യ വാമേ തു ജനകാത്മജാ । പുരതോ മാരുതിര്യസ്യ തം വന്ദേ രഘുനന്ദനമ് ॥ ൩൧ ॥

ലോകാഭിരാമം രണരങ്ഗധീരം രാജീവനേത്രം രഘുവംശനാഥമ് । കാരുണ്യരൂപം കരുണാകരം തം ശ്രീരാമചന്ദ്രം ശരണം പ്രപദ്യേ ॥ ൩൨ ॥

മനോജവം മാരുതതുല്യവേഗം ജിതേന്ദ്രിയം ബുദ്ധിമതാം വരിഷ്ഠമ് । വാതാത്മജം വാനരയൂഥമുഖ്യം ശ്രീരാമദൂതം ശരണം പ്രപദ്യേ ॥ ൩൩ ॥

കൂജന്തം രാമരാമേതി മധുരം മധുരാക്ഷരമ് । ആരുഹ്യ കവിതാശാഖാം വന്ദേ വാല്മീകികോകിലമ് ॥ ൩൪ ॥

ആപദാമപഹര്താരം ദാതാരം സര്വസംപദാമ് । ലോകാഭിരാമം ശ്രീരാമം ഭൂയോ ഭൂയോ നമാമ്യഹമ് ॥ ൩൫ ॥

ഭര്ജനം ഭവബീജാനാമര്ജനം സുഖസംപദാമ് । തര്ജനം യമദൂതാനാം രാമരാമേതി ഗര്ജനമ് ॥ ൩൬ ॥

രാമോ രാജമണിഃ സദാ വിജയതേ രാമം രമേശം ഭജേ । രാമേണാഭിഹതാ നിശാചരചമൂ രാമായ തസ്മൈ നമഃ ॥

രാമാന്നാസ്തി പരായണം പരതരം രാമസ്യ ദാസോഽസ്മ്യഹമ് । രാമേ ചിത്തലയഃ സദാ ഭവതു മേ ഭോ രാമ മാമുദ്ധര ॥ ൩൭ ॥

രാമരാമേതി രാമേതി രമേ രാമേ മനോരമേ । സഹസ്ത്രനാമതത്തുല്യം രാമനാമ വരാനനേ ॥ ൩൮ ॥

ഇതി ശ്രീബുധകൌശികവിരചിതം ശ്രീരാമരക്ഷാസ്ത്രോത്രം സമ്പൂര്ണമ് ।

ഉറവിടം: Wikisource · CC BY-SA 4.0

നിങ്ങളുടെ അഭിപ്രായം അയയ്ക്കൂ

എന്ത് മെച്ചപ്പെടുത്തണം, എന്താണ് തെറ്റ്, അല്ലെങ്കിൽ നിങ്ങൾക്ക് എന്താണ് ഇഷ്ടപ്പെട്ടത് എന്ന് പറയൂ. ഓരോ സന്ദേശവും ഞങ്ങൾ വായിക്കുന്നു.

എന്തിനെക്കുറിച്ച്
ശംഖ് നിങ്ങൾക്ക് എത്രത്തോളം ഉപകാരപ്രദമാണ്? (ഐച്ഛികം)