ഹോം › വേദ മന്ത്രങ്ങൾ › ശ്രീവേങ്കടേശസുപ്രഭാതമ്

ശ്രീവേങ്കടേശസുപ്രഭാതമ്

സ്തോത്രങ്ങൾ · 31 ശ്ലോകങ്ങൾ

॥ അഥ ശ്രീ വേങ്കടേശ സുപ്രഭാതമ് ॥

കൌസല്യാ സുപ്രജാ രാമ പൂര്വാ സന്ധ്യാ പ്രവര്തതേ ഉത്തിഷ്ഠ നരശാര്ദൂല കര്തവ്യം ദൈവമാഹ്നികമ് ॥ ൧

ഉത്തിഷ്ഠോത്തിഷ്ഠ ഗോവിന്ദ ഉത്തിഷ്ഠ ഗരുഡധ്വജ ഉത്തിഷ്ഠ കമലാകാന്ത ത്രൈലോക്യം മങ്ഗളം കുരു ॥ ൨

മാതസ്സമസ്തജഗതാം മധുകൈടഭാരേഃ വക്ഷോവിഹാരിണി മനോഹരദിവ്യമൂര്തേ । ശ്രീസ്വാമിനി ശ്രിതജനപ്രിയദാനശീലേ ശ്രീവേങ്കടേശദയിതേ തവ സുപ്രഭാതമ് ॥ ൩

തവ സുപ്രഭാതമരവിന്ദലോചനേ ഭവതു പ്രസന്നമുഖചന്ദ്രമണ്ഡലേ । വിധിശങ്കരേന്ദ്രവനിതാഭിരര്ചിതേ വൃഷശൈലനാഥദയിതേ ദയാനിധേ ॥ ൪

അത്ര്യാദിസപ്തഋഷയസ്സമുപാസ്യ സന്ധ്യാം ആകാശസിന്ധുകമലാനി മനോഹരാണി । ആദായ പാദയുഗമര്ചയിതും പ്രപന്നാഃ ശേഷാദ്രിശേഖരവിഭോ തവ സുപ്രഭാതമ് ॥ ൫

പഞ്ചാനനാബ്ജഭവഷണ്മുഖവാസവാദ്യാഃ ത്രൈവിക്രമാദിചരിതം വിബുധാഃ സ്തുവന്തി । ഭാഷാപതിഃ പഠതി വാസര ശുദ്ധിമാരാത് ശേഷാദ്രിശേഖരവിഭോ തവ സുപ്രഭാതമ് ॥ ൬

ഈഷത്പ്രഫുല്ലസരസീരുഹനാരികേല പൂഗദ്രുമാദിസുമനോഹരപാലികാനാം । ആവാതി മന്ദമനിലസ്സഹ ദിവ്യഗന്ധൈഃ ശേഷാദ്രിശേഖരവിഭോ തവ സുപ്രഭാതമ് ॥ ൭

ഉന്മീല്യ നേത്രയുഗമുത്തമ പംജരസ്ഥാഃ പാത്രാവശിഷ്ടകദലീഫലപായസാനി । ഭുക്ത്വാ സലീലമഥ കേലിശുകാഃ പഠന്തി ശേഷാദ്രിശേഖരവിഭോ തവ സുപ്രഭാതമ് ॥ ൮

തന്ത്രീപ്രകര്ഷമധുരസ്വനയാ വിപഞ്ച്യാ ഗായത്യനന്തിചരിതം തവ നാരദോഽപി । ഭാഷാസമഗ്രമസകൃത്കരചാരരമ്യം ശേഷാദ്രിശേഖരവിഭോ തവ സുപ്രഭാതമ് ॥ ൯

ഭൃങ്ഗാവലീ ച മകരന്ദരസാനുവിദ്ധ ഝങ്കാരഗീത നിനദൈഃസഹ സേവനായ । നിര്യാത്യുപാന്തസരസീകമലോദരേഭ്യഃ ശേഷാദ്രിശേഖരവിഭോ തവ സുപ്രഭാതമ് ॥ ൧൦

യോഷാഗണേന വരദധ്നിവിമഥ്യമാനേ ഘോഷാലയേഷു ദധിമന്ഥനതീവ്രഘോഷാഃ । രോഷാത്കലിം വിദധതേകകുഭശ്ച കുമ്ഭാഃ ശേഷാദ്രിശേഖരവിഭോ തവ സുപ്രഭാതമ് ॥ ൧൧

പദ്മേശമിത്രശതപത്രഗതാലിവര്ഗാഃ ഹര്തും ശ്രിയം കുവലയസ്യ നിജാങ്ഗലക്ഷ്മ്യാ । ഭേരീനിനാദമിവ ബിഭ്രതി തീവ്രനാദം ശേഷാദ്രിശേഖരവിഭോ തവ സുപ്രഭാതമ് ॥ ൧൨

ശ്രീമന്നഭീഷ്ട വരദാഖിലലോകബന്ധോ ശ്രീശ്രീനിവാസ ജഗദേകദയൈകസിന്ധോ । ശ്രീദേവതാഗൃഹഭുജാന്തര ദിവ്യ മൂര്തേ ശ്രീവേങ്കടാചലപതേ തവ സുപ്രഭാതമ് ॥ ൧൩

ശ്രീസ്വാമിപുഷ്കരിണികാഽഽപ്ലവനിര്മലാങ്ഗാഃ ശ്രേയോഽര്ഥിനോ ഹരവിരിംചസനന്ദനാദ്യാഃ । ദ്വാരേ വസന്തി വരവേത്രഹതോത്തമാങ്ഗാഃ ശ്രീവേങ്കടാചലപതേ തവ സുപ്രഭാതമ് ॥ ൧൪

ശ്രീ ശേഷശൈല ഗരുഡാചല വേങ്കടാദ്രി നാരായണാദ്രി വൃഷഭാദ്രി വൃഷാദ്രി മുഖ്യാമ് । ആഖ്യാമ് ത്വദീയ വസതേരനിശം വദന്തി ശ്രീവേങ്കടാചലപതേ തവ സുപ്രഭാതമ് ॥ ൧൫

സേവാപരാഃ ശിവസുരേശകൃശാനുധര്മ രക്ഷോഽമ്ബുനാഥ പവമാന ധനാധിനാഥാഃ । ബദ്ധാംജലി പ്രവിലസന്നിജശീര്ഷ ദേശാഃ ശ്രീവേങ്കടാചലപതേ തവ സുപ്രഭാതമ് ॥ ൧൬

ഘാടീഷു തേ വിഹഗരാജ മൃഗാധിരാജ- നാഗാധിരാജ ഗജരാജ ഹയാധിരാജാഃ । സ്വസ്വാധികാര മഹിമാധികമര്ഥയന്തേ ശ്രീവേങ്കടാചലപതേ തവ സുപ്രഭാതമ് ॥ ൧൭

സൂര്യേന്ദു ഭൌമ ബുധ വാക്പതി കാവ്യ സൌരി സ്വര്ഭാനു കേതു ദിവിഷത്പരിഷത്പ്രധാനാഃ । ത്വദ്ദാസ ദാസ ചരമാവധി ദാസദാസാഃ ശ്രീവേങ്കടാചലപതേ തവ സുപ്രഭാതമ് ॥ ൧൮

ത്വത്പാദധൂലി ഭരിതസ്ഫുരിതോത്തമാങ്ഗാഃ സ്വര്ഗാപവര്ഗ നിരപേക്ഷ നിജാന്തരങ്ഗാഃ । കല്പാഗമാഽഽകലനയാഽഽകുലതാം ലഭന്തേ ശ്രീവേങ്കടാചലപതേ തവ സുപ്രഭാതമ് ॥ ൧൯

ത്വദ്ഗോപുരാഗ്രശിഖരാണി നിരീക്ഷമാണാഃ സ്വര്ഗാപവര്ഗപദവീം പരമാം ശ്രയന്തഃ । മര്ത്യാ മനുഷ്യഭുവനേ മതിമാശ്രയന്തേ ശ്രീവേങ്കടാചലപതേ തവ സുപ്രഭാതമ് ॥ ൨൦

ശ്രീഭൂമിനായക ദയാദിഗുണാമൃതാബ്ധേ ദേവാധിദേവ ജഗദേകശരണ്യമൂര്തേ । ശ്രീമന്നനന്ത ഗരുഡാദിഭിരര്ചിതാങ്ഘ്രേ ശ്രീവേങ്കടാചലപതേ തവ സുപ്രഭാതമ് ॥ ൨൧

ശ്രീപദ്മനാഭ പുരുഷോത്തമ വാസുദേവ വൈകുണ്ഠ മാധവ ജനാര്ദന ചക്രപാണേ । ശ്രീവത്സചിന്ഹ ശരണാഗതപാരിജാത ശ്രീവേങ്കടാചലപതേ തവ സുപ്രഭാതമ് ॥ ൨൨

കന്ദര്പദര്പ ഹരസുന്ദര ദിവ്യമൂര്തേ കാന്താകുചാമ്ബുരുഹ കുട്മല ലോലദൃഷ്ടേ । കല്യാണനിര്മലഗുണാകര ദിവ്യകീര്തേ ശ്രീവേങ്കടാചലപതേ തവ സുപ്രഭാതമ് ॥ ൨൩

മീനാകൃതേ കമഠ കോല നൃസിംഹ വര്ണിന് സ്വാമിന് പരശ്വഥതപോധന രാമചന്ദ്ര । ശേഷാംശരാമ യദുനന്ദന കല്കിരൂപ ശ്രീവേങ്കടാചലപതേ തവ സുപ്രഭാതമ് ॥ ൨൪

ഏലാ ലവങ്ഗ ഘനസാര സുഗന്ധി തീര്ഥം ദിവ്യം വിയത്സരിതി ഹേമഘടേഷു പൂര്ണമ് । ധൃത്വാഽഽദ്യ വൈദിക ശിഖാമണയഃ പ്രഹൃഷ്ടാഃ തിഷ്ഠന്തി വേങ്കടപതേ തവ സുപ്രഭാതമ് ॥ ൨൫

ഭാസ്വാനുദേതി വികചാനി സരോരുഹാണി സംപൂരയന്തി നിനദൈഃ കകുഭോ വിഹങ്ഗാഃ । ശ്രീവൈഷ്ണവാസ്സതതമര്ഥിത മങ്ഗളാസ്തേ ധാമാഽഽശ്രയന്തി തവ വേങ്കട സുപ്രഭാതമ് ॥ ൨൬

ബ്രഹ്മാദയഃ സുരവരാസ്സമഹര്ഷയസ്തേ സന്തസ്സനന്ദന മുഖാസ്ത്വഥ യോഗിവര്യാഃ । ധാമാന്തികേ തവ ഹി മങ്ഗളവസ്തു ഹസ്താഃ ശ്രീവേങ്കടാചലപതേ തവ സുപ്രഭാതമ് ॥ ൨൭

ലക്ഷ്മീനിവാസ നിരവദ്യഗുണൈകസിന്ധോ സംസാര സാഗര സമുത്തരണൈകസേതോ । വേദാന്തവേദ്യനിജവൈഭവ ഭക്തഭോഗ്യ ശ്രീവേങ്കടാചലപതേ തവ സുപ്രഭാതമ് ॥ ൨൮

ഇത്ഥം വൃഷാചലപതേരിഹ സുപ്രഭാതമ് യേ മാനവാഃ പ്രതിദിനം പഠിതും പ്രവൃത്താഃ । തേഷാം പ്രഭാതസമയേ സ്മൃതിരങ്ഗഭാജാം പ്രജ്ഞാം പരാര്ഥസുലഭാം പരമാം പ്രസൂതേ ॥ ൨൯

॥ ഇതി വേങ്കടേശ സുപ്രഭാതമ് ॥

ഉറവിടം: Wikisource · CC BY-SA 4.0

നിങ്ങളുടെ അഭിപ്രായം അയയ്ക്കൂ

എന്ത് മെച്ചപ്പെടുത്തണം, എന്താണ് തെറ്റ്, അല്ലെങ്കിൽ നിങ്ങൾക്ക് എന്താണ് ഇഷ്ടപ്പെട്ടത് എന്ന് പറയൂ. ഓരോ സന്ദേശവും ഞങ്ങൾ വായിക്കുന്നു.

എന്തിനെക്കുറിച്ച്
ശംഖ് നിങ്ങൾക്ക് എത്രത്തോളം ഉപകാരപ്രദമാണ്? (ഐച്ഛികം)