ଅଚ୍ଯୁତଂ କେଶବଂ ରାମନାରାଯଣଂ କୃଷ୍ଣଦାମୋଦରଂ ବାସୁଦେବଂ ହରିମ୍ ॥ ଶ୍ରୀଧରଂ ମାଧବଂ ଗୋପିକାବଲ୍ଲଭଂ ଜାନକୀନାଯକଂ ରାମଚନ୍ଦ୍ରଂ ଭଜେ ॥ ୧ ॥
ଅଚ୍ଯୁତଂ କେଶବଂ ସତ୍ଯଭାମାଧବଂ ମାଧବଂ ଶ୍ରୀଧରଂ ରାଧିକାରାଧିତମ୍ ॥ ଇନ୍ଦିରାମନ୍ଦିରଂ ଚେତସା ସୁନ୍ଦରଂ ଦେବକୀନନ୍ଦନଂ ନନ୍ଦନଂ ସଂଦଧେ ॥ ୨ ॥
ବିଷ୍ଣବେ ଜିଷ୍ଣବେ ଶଙ୍ଖିନେ ଚକ୍ରିଣେ ରୁକ୍ମିଣୀରାଗିଣେ ଜାନକୀଜାନଯେ ॥ ବଲ୍ଲବୀବଲ୍ଲଭାଯାଽର୍ଚିତାଯାତ୍ମନେ କଂସବିଧ୍ବଂସିନେ ବଂଶିନେ ତେ ନମଃ ॥ ୩ ॥
କୃଷ୍ଣ ଗୋବିନ୍ଦ ହେ ରାମ ନାରାଯଣ ଶ୍ରୀପତେ ବାସୁଦେବାଜିତ ଶ୍ରୀନିଧେ ॥ ଅଚ୍ଯୁତାନନ୍ତ ହେ ମାଧବାଧୋକ୍ଷଜ ଦ୍ବାରକାନାଯକ ଦ୍ରୌପଦୀରକ୍ଷକ ॥ ୪ ॥
ରାକ୍ଷସକ୍ଷୋଭିତଃ ସୀତଯା ଶୋଭିତୋ ଦଣ୍ଡକାରଣ୍ଯଭୂପୁଣ୍ଯତାକାରଣଃ ॥ ଲକ୍ଷ୍ମଣେନାନ୍ବିତୋ ବାନରୈଃ ସେବିତୋଽ ଗସ୍ତ୍ଯସଂପୂଜିତୋ ରାଘବଃ ପାତୁ ମାମ୍ ॥ ୫ ॥
ଧେନୁକାରିଷ୍ଟକୋଽନିଷ୍ଟକୃଦ୍ଦ୍ବେଷିଣାଂ କେଶିହା କଂସହୃଦ୍ବଂଶିକାବାଦକଃ ॥ ପୂତନାକୋପକଃ ସୂରଜାଖେଲନୋ ବାଲଗୋପାଲକଃ ପାତୁ ମାମ୍ ସର୍ବଦା ॥ ୬ ॥
ବିଦ୍ଯୁଦୁଦ୍ଯୋତବାନପ୍ରସ୍ଫୁରଦ୍ବାସସଂ ପ୍ରାବୃଡମ୍ଭୋଦବତ୍ପ୍ରୋଲ୍ଲସଦ୍ବିଗ୍ରହମ୍ ॥ ବନ୍ଯଯା ମାଲଯା ଶୋଭିତୋରଃସ୍ଥଲଂ ଲୋହିତାଂଘ୍ରିଦ୍ବଯଂ ବାରିଜାକ୍ଷଂ ଭଜେ ॥ ୭ ॥
କୁଞ୍ଚିତୈଃ କୁନ୍ତଲୈର୍ଭ୍ରାଜମାନାନନଂ ରତ୍ନମୌଲିଂ ଲସତ୍ କୁଣ୍ଡଲଂ ଗଣ୍ଡଯୋଃ ॥ ହାରକେଯୂରକଂ କଙ୍କଣପ୍ରୋଜ୍ଜ୍ବଲଂ କିଙ୍କିଣୀମଞ୍ଜୁଲଂ ଶ୍ଯାମଲଂ ତଂ ଭଜେ ॥ ୮ ॥
ଅଚ୍ଯୁତସ୍ଯାଷ୍ଟକଂ ଯଃ ପଠେଦିଷ୍ଟଦଂ ପ୍ରେମତଃ ପ୍ରତ୍ଯହଂ ପୂରୁଷଃ ସସ୍ପୃହମ୍ । ବୃତ୍ତତଃ ସୁଂଦରଂ କର୍ତୃ ବିଶ୍ବଂଭରଂ ତସ୍ଯ ବଶ୍ଯୋ ହରିର୍ଜାଯତେ ସତ୍ବରମ୍ ॥ ୯ ॥
॥ ଇତି ଶ୍ରୀଶଂକରାଚାର୍ଯବିରଚିତମଚ୍ଯୁତାଷ୍ଟକଂ ସଂପୂର୍ଣମ୍ ॥
ଉତ୍ସ: Wikisource · CC BY-SA 4.0