॥ ଆଦିତ୍ଯହୃଦଯମ୍ ॥
ତତୋ ଯୁଦ୍ଧପରିଶ୍ରାନ୍ତଂ ସମରେ ଚିନ୍ତଯା ସ୍ଥିତମ୍। ରାବଣଂ ଚାଗ୍ରତୋ ଦୃଷ୍ଟ୍ବା ଯୁଦ୍ଧାଯ ସମୁପସ୍ଥିତମ୍॥ ୧ ॥
ଦୈବତୈଶ୍ଚ ସମାଗମ୍ଯ ଦ୍ରଷ୍ଟୁମଭ୍ଯାଗତୋ ରଣମ୍। ଉପାଗମ୍ଯାବ୍ରବୀଦ୍ରାମମଗସ୍ତ୍ଯୋ ଭଗବାନ୍ ଋଷିଃ॥ ୨ ॥
ରାମ ରାମ ମହାବାହୋ ଶୃଣୁ ଗୁହ୍ଯଂ ସନାତନମ୍। ଯେନ ସର୍ବାନରୀନ୍ ବତ୍ସ ସମରେ ବିଜଯିଷ୍ଯସି॥ ୩ ॥
ଆଦିତ୍ଯହୃଦଯଂ ପୁଣ୍ଯଂ ସର୍ବଶତ୍ରୁବିନାଶନମ୍। ଜଯାବହଂ ଜପେନ୍ନିତ୍ଯମ୍ ଅକ୍ଷଯ୍ଯଂ ପରମଂ ଶିବମ୍॥ ୪ ॥
ସର୍ବମଙ୍ଗଲମାଙ୍ଗଲ୍ଯଂ ସର୍ବପାପପ୍ରଣାଶନମ୍। ଚିନ୍ତାଶୋକପ୍ରଶମନମ୍ ଆଯୁର୍ବର୍ଧନମୁତ୍ତମମ୍॥ ୫ ॥
ରଶ୍ମିମଂତଂ ସମୁଦ୍ଯନ୍ତଂ ଦେବାସୁରନମସ୍କୃତମ୍। ପୂଜଯସ୍ବ ବିବସ୍ବନ୍ତଂ ଭାସ୍କରଂ ଭୁବନେଶ୍ବରମ୍॥ ୬ ॥
ସର୍ବଦେବାତ୍ମକୋ ହ୍ଯେଷ ତେଜସ୍ବୀ ରଶ୍ମିଭାବନଃ। ଏଷ ଦେବାସୁରଗଣାଁଲ୍ଲୋକାନ୍ ପାତି ଗଭସ୍ତିଭିଃ॥ ୭ ॥
ଏଷ ବ୍ରହ୍ମା ଚ ବିଷ୍ଣୁଶ୍ଚ ଶିବଃ ସ୍କନ୍ଦଃ ପ୍ରଜାପତିଃ। ମହେନ୍ଦ୍ରୋ ଧନଦଃ କାଲୋ ଯମଃ ସୋମୋ ହ୍ଯପାଂ ପତିଃ॥ ୮ ॥
ପିତରୋ ବସବଃ ସାଧ୍ଯା ହ୍ଯଶ୍ବିନୌ ମରୁତୋ ମନୁଃ। ବାଯୁର୍ବହ୍ନିଃ ପ୍ରଜାପ୍ରାଣ ଋତୁକର୍ତା ପ୍ରଭାକରଃ॥ ୯ ॥
ଆଦିତ୍ଯଃ ସବିତା ସୂର୍ଯଃ ଖଗଃ ପୂଷା ଗଭସ୍ତିମାନ୍। ସୁବର୍ଣସଦୃଶୋ ଭାନୁର୍ହିରଣ୍ଯରେତା ଦିବାକରଃ॥ ୧୦ ॥
ହରିଦଶ୍ବଃ ସହସ୍ରାର୍ଚିଃ ସପ୍ତସପ୍ତିର୍ମରୀଚିମାନ୍। ତିମିରୋନ୍ମଥନଃ ଶମ୍ଭୁସ୍ତ୍ବଷ୍ଟା ମାର୍ତାଣ୍ଡ ଅଂଶୁମାନ୍॥ ୧୧ ॥
ହିରଣ୍ଯଗର୍ଭଃ ଶିଶିରସ୍ତପନୋ ଭାସ୍କରୋ ରବିଃ। ଅଗ୍ନିଗର୍ଭୋଽଦିତେଃ ପୁତ୍ରଃ ଶଙ୍ଖଃ ଶିଶିରନାଶନଃ॥ ୧୨ ॥
ବ୍ଯୋମନାଥସ୍ତମୋଭେଦୀ ଋଗ୍ଯଜୁଃସାମପାରଗଃ। ଘନବୃଷ୍ଟିରପାଂ ମିତ୍ରୋ ବିନ୍ଧ୍ଯବୀଥୀପ୍ଲବଙ୍ଗମଃ॥ ୧୩ ॥
ଆତପୀ ମଣ୍ଡଲୀ ମୃତ୍ଯୁଃ ପିଙ୍ଗଲଃ ସର୍ବତାପନଃ। କବିର୍ବିଶ୍ବୋ ମହାତେଜାଃ ରକ୍ତଃ ସର୍ବଭବୋଦ୍ଭବଃ॥ ୧୪
ନକ୍ଷତ୍ରଗ୍ରହତାରାଣାମଧିପୋ ବିଶ୍ବଭାବନଃ। ତେଜସାମପି ତେଜସ୍ବୀ ଦ୍ବାଦଶାତ୍ମନ୍ ନମୋଽସ୍ତୁ ତେ॥ ୧୫ ॥
ନମଃ ପୂର୍ବାଯ ଗିରଯେ ପଶ୍ଚିମାଯାଦ୍ରଯେ ନମଃ।
ଜ୍ଯୋତିର୍ଗଣାନାଂ ପତଯେ ଦିନାଧିପତଯେ ନମଃ॥ ୧୬ ॥
ଜଯାଯ ଜଯଭଦ୍ରାଯ ହର୍ଯଶ୍ବାଯ ନମୋ ନମଃ।
ନମୋ ନମଃ ସହସ୍ରାଂଶୋ ଆଦିତ୍ଯାଯ ନମୋ ନମଃ॥ ୧୭ ॥
ନମ ଉଗ୍ରାଯ ବୀରାଯ ସାରଙ୍ଗାଯ ନମୋ ନମଃ।
ନମଃ ପଦ୍ମପ୍ରବୋଧାଯ ମାର୍ତାଣ୍ଡାଯ ନମୋ ନମଃ॥ ୧୮ ॥
ବ୍ରହ୍ମେଶାନାଚ୍ଯୁତେଶାଯ ସୂର୍ଯାଯାଦିତ୍ଯବର୍ଚସେ। ଭାସ୍ବତେ ସର୍ବଭକ୍ଷାଯ ରୌଦ୍ରାଯ ବପୁଷେ ନମଃ॥ ୧୯ ॥
ତମୋଘ୍ନାଯ ହିମଘ୍ନାଯ ଶତ୍ରୁଘ୍ନାଯାମିତାତ୍ମନେ। କୃତଘ୍ନଘ୍ନାଯ ଦେବାଯ ଜ୍ଯୋତିଷାଂ ପତଯେ ନମଃ॥ ୨୦ ॥
ତପ୍ତଚାମୀକରାଭାଯ ବହ୍ନଯେ ବିଶ୍ବକର୍ମଣେ। ନମସ୍ତମୋଽଭିନିଘ୍ନାଯ ରୁଚଯେ ଲୋକସାକ୍ଷିଣେ॥ ୨୧ ॥
ନାଶଯତ୍ଯେଷ ବୈ ଭୂତଂ ତଦେବ ସୃଜତି ପ୍ରଭୁଃ। ପାଯତ୍ଯେଷ ତପତ୍ଯେଷ ବର୍ଷତ୍ଯେଷ ଗଭସ୍ତିଭିଃ॥ ୨୨ ॥
ଏଷ ସୁପ୍ତେଷୁ ଜାଗର୍ତି ଭୂତେଷୁ ପରିନିଷ୍ଠିତଃ। ଏଷ ଏବାଗ୍ନିହୋତ୍ରଂ ଚ ଫଲଂ ଚୈବାଗ୍ନିହୋତ୍ରିଣାମ୍॥ ୨୩ ॥
ବେଦାଶ୍ଚ କ୍ରତବଶ୍ଚୈବ କ୍ରତୂନାଂ ଫଲମେବ ଚ। ଯାନି କୃତ୍ଯାନି ଲୋକେଷୁ ସର୍ବ ଏଷ ରବିଃ ପ୍ରଭୁଃ॥ ୨୪ ॥
॥ ଫଲଶ୍ରୁତିଃ॥
ଏନମାପତ୍ସୁ କୃଚ୍ଛ୍ରେଷୁ କାନ୍ତାରେଷୁ ଭଯେଷୁ ଚ। କୀର୍ତଯନ୍ ପୁରୁଷଃ କଶ୍ଚିନ୍ନାବସୀଦତି ରାଘବ॥ ୨୫ ॥
ପୂଜଯସ୍ବୈନମେକାଗ୍ରୋ ଦେବଦେବଂ ଜଗତ୍ପତିମ୍। ଏତତ୍ ତ୍ରିଗୁଣିତଂ ଜପ୍ତ୍ବା ଯୁଦ୍ଧେଷୁ ବିଜଯିଷ୍ଯସି॥ ୨୬ ॥
ଅସ୍ମିନ୍ କ୍ଷଣେ ମହାବାହୋ ରାବଣଂ ତ୍ବଂ ବଧିଷ୍ଯସି। ଏବମୁକ୍ତ୍ବା ତଦାଗସ୍ତ୍ଯୋ ଜଗାମ ଚ ଯଥାଗତମ୍॥ ୨୭ ॥
ଏତଚ୍ଛ୍ରୁତ୍ବା ମହାତେଜା ନଷ୍ଟଶୋକୋଽଭବତ୍ତଦା। ଧାରଯାମାସ ସୁପ୍ରୀତୋ ରାଘବଃ ପ୍ରଯତାତ୍ମବାନ୍॥ ୨୮ ॥
ଆଦିତ୍ଯଂ ପ୍ରେକ୍ଷ୍ଯ ଜପ୍ତ୍ବା ତୁ ପରଂ ହର୍ଷମବାପ୍ତବାନ୍। ତ୍ରିରାଚମ୍ଯ ଶୁଚିର୍ଭୂତ୍ବା ଧନୁରାଦାଯ ବୀର୍ଯବାନ୍॥ ୨୯ ॥
ରାବଣଂ ପ୍ରେକ୍ଷ୍ଯ ହୃଷ୍ଟାତ୍ମା ଯୁଦ୍ଧାଯ ସମୁପାଗମତ୍। ସର୍ବଯତ୍ନେନ ମହତା ବଧେ ତସ୍ଯ ଧୃତୋଽଭବତ୍॥ ୩୦ ॥
ଅଥ ରବିରବଦନ୍ନିରୀକ୍ଷ୍ଯ ରାମଂ ମୁଦିତମନାଃ ପରମଂ ପ୍ରହୃଷ୍ଯମାଣଃ। ନିଶିଚରପତିସଂକ୍ଷଯଂ ବିଦିତ୍ବା ସୁରଗଣମଧ୍ଯଗତୋ ବଚସ୍ତ୍ବରେତି॥ ୩୧ ॥
॥ ଇତି ଆଦିତ୍ଯହୃଦଯମ୍ ମନ୍ତ୍ରସ୍ଯ ॥
ଉତ୍ସ: Wikisource · CC BY-SA 4.0