ହୋମ୍ › ବେଦ ମନ୍ତ୍ର › କନକଧାରାସ୍ତୋତ୍ରମ୍

କନକଧାରାସ୍ତୋତ୍ରମ୍

ସ୍ତୋତ୍ର · 24ଟି ଶ୍ଳୋକ

॥ ଶ୍ରୀକନକଧାରାସ୍ତୋତ୍ରମ୍ ॥

ଅଙ୍ଗଂ ହରେଃ ପୁଲକଭୂଷଣମାଶ୍ରଯନ୍ତୀ ଭୃଙ୍ଗାଙ୍ଗନେବ ମୁକୁଲାଭରଣଂ ତମାଲମ୍ । ଅଙ୍ଗୀକୃତାଖିଲବିଭୂତିରପାଙ୍ଗଲୀଲା ମାଙ୍ଗଲ୍ଯଦାଽସ୍ତୁ ମମ ମଙ୍ଗଲଦେବତାଯାଃ ॥ ୧ ॥

ମୁଗ୍ଧା ମୁହୁର୍ବିଦଧତୀ ବଦନେ ମୁରାରେଃ ପ୍ରେମତ୍ରପାପ୍ରଣିହିତାନି ଗତାଗତାନି । ମାଲା ଦୃଶୋର୍ମଧୁକରୀବ ମହୋତ୍ପଲେ ଯା ସା ମେ ଶ୍ରିଯଂ ଦିଶତୁ ସାଗରସମ୍ଭବାଯାଃ ॥ ୨ ॥

ଆମୀଲିତାକ୍ଷମଧିଗମ୍ଯ ମୁଦା ମୁକୁନ୍ଦମ୍– ଆନନ୍ଦକନ୍ଦମନିମେଷମନଙ୍ଗତନ୍ତ୍ରମ୍। ଆକେକରସ୍ଥିତକନୀନିକପକ୍ଷ୍ମନେତ୍ରଂ ଭୂତ୍ଯୈ ଭବେନ୍ମମ ଭୁଜଙ୍ଗଶଯାଙ୍ଗନାଯାଃ ॥ ୩ ॥

ବାହ୍ବନ୍ତରେ ମଧୁଜିତଃ ଶ୍ରିତକୌସ୍ତୁଭେ ଯା ହାରାବଲୀବ ହରିନୀଲମଯୀ ବିଭାତି । କାମପ୍ରଦା ଭଗବତୋଽପି କଟାକ୍ଷମାଲା କଲ୍ଯାଣମାବହତୁ ମେ କମଲାଲଯାଯାଃ ॥ ୪ ॥

କାଲାମ୍ବୁଦାଲିଲଲିତୋରସି କୈଟଭାରେର୍– ଧାରାଧରେ ସ୍ଫୁରତି ଯା ତଡିଦଙ୍ଗନେବ । ମାତୁଃ ସମସ୍ତଜଗତାଂ ମହନୀଯମୂର୍ତିର୍– ଭଦ୍ରାଣି ମେ ଦିଶତୁ ଭାର୍ଗବନନ୍ଦନାଯାଃ ॥ ୫ ॥

ପ୍ରାପ୍ତଂ ପଦଂ ପ୍ରଥମତଃ ଖଲୁ ଯତ୍ପ୍ରଭାବାନ୍– ମାଙ୍ଗଲ୍ଯଭାଜି ମଧୁମାଥିନି ମନ୍ମଥେନ । ମଯ୍ଯାପତେତ୍ତଦିହ ମନ୍ଥରମୀକ୍ଷଣାର୍ଧଂ ମନ୍ଦାଲସଂ ଚ ମକରାଲଯକନ୍ଯକାଯାଃ ॥ ୬ ॥

ବିଶ୍ବାମରେନ୍ଦ୍ରପଦବିଭ୍ରମଦାନଦକ୍ଷମ୍– ଆନନ୍ଦହେତୁରଧିକଂ ମୁରବିଦ୍ବିଷୋଽପି । ଈଷନ୍ନିଷୀଦତୁ ମଯି କ୍ଷଣମୀକ୍ଷଣାର୍ଧମ୍– ଇନ୍ଦୀବରୋଦରସହୋଦରମିନ୍ଦିରାଯାଃ ॥ ୭ ॥

ଇଷ୍ଟାବିଶିଷ୍ଟମତଯୋଽପି ଯଯା ଦଯାର୍ଦ୍ର– ଦୃଷ୍ଟ୍ଯା ତ୍ରିବିଷ୍ଟପପଦଂ ସୁଲଭଂ ଲଭନ୍ତେ । ଦୃଷ୍ଟିଃ ପ୍ରହୃଷ୍ଟକମଲୋଦରଦୀପ୍ତିରିଷ୍ଟାଂ ପୁଷ୍ଟିଂ କୃଷୀଷ୍ଟ ମମ ପୁଷ୍କରବିଷ୍ଟରାଯାଃ ॥ ୮ ॥

ଦଦ୍ଯାଦ୍ଦଯାନୁପବନୋ ଦ୍ରବିଣାମ୍ବୁଧାରାମ୍– ଅସ୍ମିନ୍ନକିଞ୍ଚନବିହଙ୍ଗଶିଶୌ ବିଷଣ୍ଣେ । ଦୁଷ୍କର୍ମଧର୍ମମପନୀଯ ଚିରାଯ ଦୂରଂ ନାରାଯଣପ୍ରଣଯିନୀନଯନାମ୍ବୁବାହଃ ॥ ୯ ॥

ଗୀର୍ଦେବତେତି ଗରୁଡ଼ଧ୍ବଜସୁନ୍ଦରୀତି ଶାକମ୍ଭରୀତି ଶଶିଶେଖରବଲ୍ଲଭେତି । ସୃଷ୍ଟିସ୍ଥିତିପ୍ରଲଯକେଲିଷୁ ସଂସ୍ଥିତାଯୈ ତସ୍ଯୈ ନମସ୍ତ୍ରିଭୁବନୈକଗୁରୋସ୍ତରୁଣ୍ଯୈ ॥ ୧୦ ॥

ଶ୍ରୁତ୍ଯୈ ନମୋଽସ୍ତୁ ଶୁଭକର୍ମଫଲପ୍ରସୂତ୍ଯୈ ରତ୍ଯୈ ନମୋଽସ୍ତୁ ରମଣୀଯଗୁଣାର୍ଣବାଯୈ । ଶକ୍ତ୍ଯୈ ନମୋଽସ୍ତୁ ଶତପତ୍ରନିକେତନାଯୈ ପୁଷ୍ଟ୍ଯୈ ନମୋଽସ୍ତୁ ପୁରୁଷୋତ୍ତମବଲ୍ଲଭାଯୈ ॥ ୧୧ ॥

ନମୋଽସ୍ତୁ ନାଲୀକନିଭାନନାଯୈ ନମୋଽସ୍ତୁ ଦୁଗ୍ଧୋଦଧିଜନ୍ମଭୂତ୍ଯୈ । ନମୋଽସ୍ତୁ ସୋମାମୃତସୋଦରାଯୈ ନମୋଽସ୍ତୁ ନାରାଯଣବଲ୍ଲଭାଯୈ ॥ ୧୨ ॥

ନମୋଽସ୍ତୁ ହେମାମ୍ବୁଜପୀଠିକାଯୈ ନମୋଽସ୍ତୁ ଭୂମଣ୍ଡଲନାଯିକାଯୈ । ନମୋଽସ୍ତୁ ଦେବାଦିଦଯାପରାଯୈ ନମୋଽସ୍ତୁ ଶାର୍ଙ୍ଗାଯୁଧବଲ୍ଲଭାଯୈ ॥ ୧୩ ॥

ନମୋଽସ୍ତୁ ଦେବ୍ଯୈ ଭୃଗୁନନ୍ଦନାଯୈ ନମୋଽସ୍ତୁ ବିଷ୍ଣୋରୁରସି ସ୍ଥିତାଯୈ । ନମୋଽସ୍ତୁ ଲକ୍ଷ୍ମ୍ଯୈ କମଲାଲଯାଯୈ ନମୋଽସ୍ତୁ ଦାମୋଦରବଲ୍ଲଭାଯୈ ॥ ୧୪ ॥

ନମୋଽସ୍ତୁ କାନ୍ତ୍ଯୈ କମଲେକ୍ଷଣାଯୈ ନମୋଽସ୍ତୁ ଭୂତ୍ଯୈ ଭୁବନପ୍ରସୂତ୍ଯୈ । ନମୋଽସ୍ତୁ ଦେବାଦିଭିରର୍ଚିତାଯୈ ନମୋଽସ୍ତୁ ନନ୍ଦାତ୍ମଜବଲ୍ଲଭାଯୈ ॥ ୧୫ ॥

ସମ୍ପତ୍କରାଣି ସକଲେନ୍ଦ୍ରିଯନନ୍ଦନାନି ସାମ୍ରାଜ୍ଯଦାନବିଭବାନି ସରୋରୁହାକ୍ଷି । ତ୍ବଦ୍ବନ୍ଦନାନି ଦୁରିତୋଦ୍ଧରଣୋଦ୍ଯତାନି ମାମେବ ମାତରନିଶଂ କଲଯନ୍ତୁ ମାନ୍ଯେ ॥ ୧୬ ॥

ଯତ୍କଟାକ୍ଷସମୁପାସନାବିଧିଃ ସେବକସ୍ଯ ସକଲାର୍ଥସମ୍ପଦଃ । ସନ୍ତନୋତି ବଚନାଙ୍ଗମାନସୈସ୍– ତ୍ବାଂ ମୁରାରିହୃଦଯେଶ୍ବରୀଂ ଭଜେ ॥ ୧୭ ॥

ସରସିଜନିଲଯେ ସରୋଜହସ୍ତେ ଧବଲତମାଂଶୁକଗନ୍ଧମାଲ୍ଯଶୋଭେ । ଭଗବତି ହରିବଲ୍ଲଭେ ମନୋଜ୍ଞେ ତ୍ରିଭୁବନଭୂତିକରି ପ୍ରସୀଦ ମହ୍ଯମ୍ ॥ ୧୮ ॥

ଦିଗ୍ଘସ୍ତିଭିଃ କନକକୁମ୍ଭମୁଖାବସୃଷ୍ଟ– ସ୍ବର୍ବାହିନୀବିମଲଚାରୁଜଲପ୍ଲୁତାଙ୍ଗୀମ୍ । ପ୍ରାତର୍ନମାମି ଜଗତାଂ ଜନନୀମଶେଷ– ଲୋକାଧିନାଥଗୃହିଣୀମମୃତାବ୍ଧିପୁତ୍ରୀମ୍ ॥ ୧୯ ॥

କମଲେ କମଲାକ୍ଷବଲ୍ଲଭେ ତ୍ବଂ କରୁଣାପୂରତରଙ୍ଗିତୈରପାଙ୍ଗୈଃ । ଅବଲୋକଯ ମାମକିଞ୍ଚନାନାଂ ପ୍ରଥମଂ ପାତ୍ରମକୃତ୍ରିମଂ ଦଯାଯାଃ ॥ ୨୦ ॥

ଦେବି ପ୍ରସୀଦ ଜଗଦୀଶ୍ବରି ଲୋକମାତଃ କଲ୍ଯାଣଗାତ୍ରି କମଲେକ୍ଷଣଜୀବନାଥେ । ଦାରିଦ୍ର୍ଯଭୀତିହୃଦଯଂ ଶରଣାଗତଂ ମାମ୍– ଆଲୋକଯ ପ୍ରତିଦିନଂ ସଦଯୈରପାଙ୍ଗୈଃ ॥ ୨୧ ॥

ସ୍ତୁବନ୍ତି ଯେ ସ୍ତୁତିଭିରମୂଭିରନ୍ବହଂ ତ୍ରଯୀମଯୀଂ ତ୍ରିଭୁବନମାତରଂ ରମାମ୍ । ଗୁଣାଧିକା ଗୁରୁତରଭାଗ୍ଯଭାଗିନୋ ଭବନ୍ତି ତେ ଭୁବି ବୁଧଭାବିତାଶଯାଃ ॥ ୨୨ ॥

॥ ଇତି ଶ୍ରୀମଚ୍ଛଙ୍କରାଚାର୍ଯକୃତଂ ଶ୍ରୀକନକଧାରାସ୍ତୋତ୍ରଂ ସମ୍ପୂର୍ଣମ୍ ॥

ଉତ୍ସ: Wikisource · CC BY-SA 4.0

ଆପଣଙ୍କ ମତାମତ ପଠାନ୍ତୁ

କଣ ଉନ୍ନତ କରିବା ଦରକାର, କଣ ଭୁଲ ଅଛି, କିମ୍ବା ଆପଣଙ୍କୁ କଣ ଭଲ ଲାଗିଲା ଜଣାନ୍ତୁ। ଆମେ ପ୍ରତ୍ୟେକ ବାର୍ତ୍ତା ପଢ଼ୁ।

କେଉଁ ବିଷୟରେ
ଶଙ୍ଖ ଆପଣଙ୍କ ପାଇଁ କେତେ ଉପଯୋଗୀ? (ଇଚ୍ଛାଧୀନ)