ମହିଷାସୁରମର୍ଦିନୀସ୍ତୋତ୍ରମ୍ (ଅଯି ଗିରିନନ୍ଦିନି)
ସ୍ତୋତ୍ର · 22ଟି ଶ୍ଳୋକ
ଅଯିଗିରିନନ୍ଦିନି ନନ୍ଦିତମେଦିନି ବିଶ୍ବବିନୋଦିନି ନନ୍ଦନୁତେ ଗିରିବରବିନ୍ଧ୍ଯ-ଶିରୋଧିନିବାସିନି ବିଷ୍ଣୁବିଲାସିନି ଜିଷ୍ଣୁନୁତେ। ଭଗବତି ହେ ଶିତିକଣ୍ଠକୁଟୁମ୍ବିନି ଭୂରିକୁଟୁମ୍ବିନି ଭୂରିକୃତେ ଜଯ ଜଯ ହେ ମହିଷାସୁରମର୍ଦିନି ରମ୍ଯ କପର୍ଦିନି ଶୈଲସୁତେ॥ ୧ ॥
ସୁରବରବର୍ଷିଣି ଦୁର୍ଧରଧର୍ଷିଣି ଦୁର୍ମୁଖମର୍ଷିଣୀ ହର୍ଷରତେ ତ୍ରିଭୁବନପୋଷିଣି ଶଂକରତୋଷିଣି କିଲ୍ବିଷମୋଷିଣି ଘୋଷରତେ। ଦନୁଜନିରୋଷିଣି ଦିତିସୁତରୋଷିଣି ଦୁର୍ମଦଶୋଷିଣି ସିନ୍ଧୁସୁତେ ଜଯ ଜଯ ହେ ମହିଷାସୁରମର୍ଦିନି ରମ୍ଯ କପର୍ଦିନି ଶୈଲସୁତେ॥ ୨ ॥
ଅଯି ଜଗଦମ୍ବ ମଦମ୍ବ କଦମ୍ବବନପ୍ରିଯବାସିନି ହାସରତେ ଶିଖରିଶିରୋମଣି ତୁଙ୍ଗହିମାଲଯଶୃଙ୍ଗନିଜାଲଯମଧ୍ଯଗତେ। ମଧୁମଧୁରେ ମଧୁକୈଟଭଗଞ୍ଜିନି କୈଟଭଭଞ୍ଜିନି ରାସରତେ ଜଯ ଜଯ ହେ ମହିଷାସୁରମର୍ଦିନି ରମ୍ଯ କପର୍ଦିନି ଶୈଲସୁତେ॥ ୩ ॥
ଅଯି ଶତଖଣ୍ଡବିଖଣ୍ଡିତରୁଣ୍ଡବିତୁଣ୍ଡିତଶୁଣ୍ଡଗଜାଧିପତେ ରିପୁଗଜଗଣ୍ଡବିଦାରଣଚଣ୍ଡପରାକ୍ରମଶୁଣ୍ଡମୃଗାଧିପତେ। ନିଜଭୁଜଦଣ୍ଡନିପାତିତଖଣ୍ଡବିପାତିତମୁଣ୍ଡଭଟାଧିପତେ ଜଯ ଜଯ ହେ ମହିଷାସୁରମର୍ଦିନି ରମ୍ଯ କପର୍ଦିନି ଶୈଲସୁତେ॥ ୪ ॥
ଅଯି ରଣଦୁର୍ମଦଶତ୍ରୁବଧୋଦ୍ଯତଦୁର୍ଧରନିର୍ଜରଶକ୍ତିଭୃତେ ଚତୁରବିଚାରଧୁରୀଣମହାଶିବଦୂତକୃତପ୍ରମଥାଧିପତେ। ଦୁରିତଦୁରୀହଦୁରାଶଯଦୁର୍ମତିଦାନବଦୂତକୃତାନ୍ତମତେ ଜଯ ଜଯ ହେ ମହିଷାସୁରମର୍ଦିନି ରମ୍ଯ କପର୍ଦିନି ଶୈଲସୁତେ॥ ୫ ॥
ଅଯି ଶରଣାଗତବୈରିବଧୂବରବୀରବରାଭଯଦାନକରେ ତ୍ରିଭୁବନମସ୍ତକଶୂଲବିରୋଧିଶିରୋଧିକୃତାମଲଶୂଲକରେ। ଦୁମିଦୁମିତାମରଦୁନ୍ଦୁଭିନାଦମହୋ ମୁଖରୀକୃତତିଗ୍ମକରେ ଜଯ ଜଯ ହେ ମହିଷାସୁରମର୍ଦିନି ରମ୍ଯ କପର୍ଦିନି ଶୈଲସୁତେ॥ ୬ ॥
ଅଯି ନିଜହୁଙ୍କୃତିମାତ୍ରନିରାକୃତଧୂମ୍ରବିଲୋଚନଧୂମ୍ରଶତେ ସମରବିଶୋଷିତଶୋଣିତବୀଜସମୁଦ୍ଭବଶୋଣିତବୀଜଲତେ। ଶିବଶିବଶୁମ୍ଭନିଶୁମ୍ଭମହାହବତର୍ପିତଭୂତପିଶାଚରତେ ଜଯ ଜଯ ହେ ମହିଷାସୁରମର୍ଦିନି ରମ୍ଯ କପର୍ଦିନି ଶୈଲସୁତେ॥ ୭ ॥
ଧନୁରନୁସଂଗରଣକ୍ଷଣସଂଗପରିସ୍ଫୁରଦଙ୍ଗନଟତ୍କଟକେ କନକପିଶଙ୍ଗପୃଷତ୍କନିଷଙ୍ଗରସଦ୍ଭଟଶୃଙ୍ଗହତାବଟୁକେ। କୃତଚତୁରଂଗବଲକ୍ଷିତିରଙ୍ଗଘଟଦ୍ବହୁରଙ୍ଗରଟଦ୍ବଟୁକେ ଜଯ ଜଯ ହେ ମହିଷାସୁରମର୍ଦିନି ରମ୍ଯ କପର୍ଦିନି ଶୈଲସୁତେ॥ ୮ ॥
ସୁରଲଲନା-ତତଥେଯି-ତଥେଯି-କୃତାଭିନଯୋଦର-ନୃତ୍ଯରତେ କୃତକୁକୁଥଃ କୁକୁଥୋ ଗଡଦାଦିକ-ତାଲ-କୁତୂହଲ-ଗାନରତେ। ଧୁଧୁକୁଟ ଧୁକ୍କୁଟ ଧିଂଧିମିତଧ୍ବନିଧୀରମୃଦଙ୍ଗନିନାଦରତେ ଜଯ ଜଯ ହେ ମହିଷାସୁରମର୍ଦିନି ରମ୍ଯକପର୍ଦିନି ଶୈଲସୁତେ॥ ୯ ॥
ଜଯ-ଜଯ-ଜପ୍ଯ-ଜଯେଜଯଶବ୍ଦ-ପରସ୍ତୁତି-ତତ୍ପରବିଶ୍ବନୁତେ ଝଣ-ଝଣ-ଝିଞ୍ଝିମି ଝିଙ୍କୃତ ନୂପୁରସିଂଜିତମୋହିତ ଭୂତପତେ। ନଟିତନଟାର୍ଧ ନଟୀ ନଟ ନାଯକ ନାଟିତନାଟ୍ଯ ସୁଗାନରତେ ଜଯ ଜଯ ହେ ମହିଷାସୁରମର୍ଦିନି ରମ୍ଯ କପର୍ଦିନି ଶୈଲସୁତେ॥ ୧୦ ॥
ଅଯି ସୁମନଃ ସୁମନଃ ସୁମନଃ ସୁମନଃ ସୁମନୋହରକାଂତିଯୁତେ ଶ୍ରିତରଜନୀ-ରଜନୀରଜନୀ-ରଜନୀରଜନୀକର-ବକ୍ତ୍ରବୃତେ। ସୁନଯନବିଭ୍ରମର-ଭ୍ରମରଭ୍ରମର-ଭ୍ରମରଭ୍ରମରାଧିପତେ। ଜଯ ଜଯ ହେ ମହିଷାସୁରମର୍ଦିନି ରମ୍ଯ କପର୍ଦିନି ଶୈଲସୁତେ॥ ୧୧ ॥
ସହିତମହାହବ-ମଲ୍ଲମତଲ୍ଲିକ-ମଲ୍ଲିତରଲ୍ଲକ-ମଲ୍ଲରତେ ବିରଚିତବଲ୍ଲିକ-ପଲ୍ଲିକମଲ୍ଲିକ-ଭିଲ୍ଲିକଭିଲ୍ଲିକ-ବର୍ଗବୃତେ। ସିତ୍କୃତ୍ପୁଲ୍ଲସମୁଲ୍ଲସିତାରୁଣ-ତଲ୍ଲଜ-ପଲ୍ଲବ-ସଲ୍ଲଲିତେ ଜଯ ଜଯ ହେ ମହିଷାସୁରମର୍ଦିନି ରମ୍ଯ କପର୍ଦିନି ଶୈଲସୁତେ॥ ୧୨ ॥
ଅବିରଲଗଣ୍ଡ-ଗଲନ୍ମଦମେଦୁର-ମତ୍ତମତ୍ତଂଗଜ-ରାଜପତେ ତ୍ରିଭିବନଭୂଷଣଭୂତ-କଲାନିଧି-ରୂପପଯୋନିଧି-ରାଜସୁତେ। ଅଯି ସୁଦତୀଜନ-ଲାଲସମାନସ-ମୋହନମନ୍ମଥରାଜସୁତେ ଜଯ ଜଯ ହେ ମହିଷାସୁରମର୍ଦିନି ରମ୍ଯ କପର୍ଦିନି ଶୈଲସୁତେ॥ ୧୩ ॥
କମଲଦଲାମଲ-କୋମଲକାନ୍ତି-କଲା-କଲିତାମଲ-ଭାଲଲତେ ସକଲବିଲାସ-କଲାନିଲଯକ୍ରମ-କେଲିଚଲତ୍କଲ-ହଂସକୁଲେ। ଅଲିକୁଲସଙ୍କୁଲ-କୁବଲଯମଣ୍ଡଲ-ମୌଲିମିଲଦ୍ବକୁଲାଲିକୁଲେ ଜଯ ଜଯ ହେ ମହିଷାସୁରମର୍ଦିନି ରମ୍ଯ କପର୍ଦିନି ଶୈଲସୁତେ॥ ୧୪ ॥
କରମୁରଲୀରବ-ବୀଜିତକୂଜିତ-ଲଜ୍ଜିତକୋକିଲ-ମଞ୍ଜୁମତେ ମିଲିତପୁଲିନ୍ଦ-ମନୋହରଗୁଂଜିତ-ରଂଜିତଶୈଲ-ନିକୁଞ୍ଜଗତେ। ନିଜଗୁଣଭୂତ-ମହାଶବରୀଗଣ-ସଦ୍ଗୁଣସମ୍ଭୃତ-କେଲିତଲେ ଜଯ ଜଯ ହେ ମହିଷାସୁରମର୍ଦିନି ରମ୍ଯ କପର୍ଦିନି ଶୈଲସୁତେ॥ ୧୫ ॥
କଟିତଟପୀତ-ଦୁକୂଲବିଚିତ୍ର-ମଯୂଖତିରସ୍କୃତ-ଚନ୍ଦ୍ରରୁଚେ ପ୍ରଣତସୁରାସୁର-ମୌଲିମଣିସ୍ଫୁରଦଂଶୁଲ-ସନ୍ନଖ-ଚନ୍ଦ୍ରରୁଚେ। ଜିତକନକାଚଲ-ମୌଲିପଦୋର୍ଜିତ-ନିର୍ଭରକୁଂଜର-କୁମ୍ଭକୁଚେ ଜଯ ଜଯ ହେ ମହିଷାସୁରମର୍ଦିନି ରମ୍ଯ କପର୍ଦିନି ଶୈଲସୁତେ॥ ୧୬ ॥
ବିଜିତସହସ୍ର-କରୈକ-ସହସ୍ର-କରୈକ-ସହସ୍ର-କରୈକନୁତେ କୃତସୁରତାରକ-ସଙ୍ଗରତାରକ-ସଙ୍ଗରତାରକ-ସୁନୂସୁତେ। ସୁରଥସମାଧି-ସମାନସମାଧି-ସମାଧି-ସମାଧି-ସୁଜାତରତେ ଜଯ ଜଯ ହେ ମହିଷାସୁରମର୍ଦିନି ରମ୍ଯ କପର୍ଦିନି ଶୈଲସୁତେ॥ ୧୭ ॥
ପଦକମଲଂ କରୁଣାନିଲଯେ ବରିବସ୍ଯତି ଯୋନୁଦିନମ୍ ସ ଶିବେ ଅଯି କମଲେ କମଲାନିଲଯେ କମଲାନିଲଯଃ ସ କଥଂ ନ ଭବେତ୍। ତବ ପଦମେବ ପରମ୍ପଦମିତ୍ଯନୁଶୀଲଯତୋ ମମ କିଂ ନ ଶିବେ ଜଯ ଜଯ ହେ ମହିଷାସୁରମର୍ଦିନି ରମ୍ଯ କପର୍ଦିନି ଶୈଲସୁତେ॥ ୧୮ ॥
କନକଲସତ୍କଲସିନ୍ଧୁ-ଜଲୈରନୁ-ସିଞ୍ଚିନୁତେ ଗୁଣରଙ୍ଗଭୁବମ୍ ଭଜତି ସ କିଂ ନ ଶଚୀକୁଚକୁମ୍ଭତଟୀପରିରମ୍ଭ-ସୁଖାନୁଭବମ୍। ତବଚରଣଂ ଶରଣଙ୍କରବାଣି ନତାମରବାଣିନିବାସିଶିବମ୍ ଜଯ ଜଯ ହେ ମହିଷାସୁରମର୍ଦିନି ରମ୍ଯ କପର୍ଦିନି ଶୈଲସୁତେ॥ ୧୯ ॥
ତବ ବିମଲେନ୍ଦୁକୁଲଂ ବଦନେନ୍ଦୁମଲଂ ସକଲଂ ନନୁକୂଲଯତେ କିମୁ ପୁରୁହୂତପୁରୀନ୍ଦୁ-ମୁଖୀ-ସୁମୁଖୀଭିରସୌ ବିମୁଖୀକ୍ରିଯତେ। ମମ ତୁ ମତଂ ଶିବନାମଧନେ ଭବତୀ କୃପଯା କିମୁତ କ୍ରିଯତେ ଜଯ ଜଯ ହେ ମହିଷାସୁରମର୍ଦିନି ରମ୍ଯ କପର୍ଦିନି ଶୈଲସୁତେ॥ ୨୦ ॥
ଅଯି ମଯି ଦୀନ ଦଯାଲୁତଯା କୃପଯୈବ ତ୍ବଯା ଭବିତବ୍ଯମୁମେ ଅଯି ଜଗତୋ ଜନନୀ କୃପଯାସି ଯଥାସି ତଥାନୁମିତାସିରତେ। ଯଦୁଚିତମତ୍ର ଭବତ୍ଯୁରରୀ-କୁରୁତାଦୁରୁତାପମପାକୁରୁତେ ଜଯ ଜଯ ହେ ମହିଷାସୁରମର୍ଦିନି ରମ୍ଯ କପର୍ଦିନି ଶୈଲସୁତେ॥ ୨୧ ॥
ସ୍ତୁତିମିମାଂ ସ୍ତିମିତଃ ସୁସମାଧିନା ନିଯମତୋ ଯମତୋନୁଦିନଂ ପଠେତ୍। ପରମଯା ରମଯା ସ ନିଷେବ୍ଯତେ ପରିଜନୋଽରିଜନୋଽପି ଚ ତଂ ଭଜେତ୍ ॥
ଉତ୍ସ: Wikisource · CC BY-SA 4.0