ଅସ୍ଯ ଶ୍ରୀରାମରକ୍ଷାସ୍ତୋତ୍ରମନ୍ତ୍ରସ୍ଯ । ବୁଧକୌଶିକଋଷିଃ । ଶ୍ରୀସୀତାରାମଚନ୍ଦ୍ରୋ ଦେବତା । ଅନୁଷ୍ଟୁପ୍ ଛ୍ନ୍ଦଃ । ସୀତା ଶକ୍ତିଃ । ଶ୍ରୀମଦ୍ ହନୁମାନ୍ କୀଲକମ୍ । ଶ୍ରୀରାମଚନ୍ଦ୍ରପ୍ରୀତ୍ଯର୍ଥେ ଜପେ ବିନିଯୋଗଃ । ଅଥ ଧ୍ଯାନମ୍ । ଧ୍ଯାଯେଦାଜାନୁବାହୁଂ ଧୃତଶରଧନୁଷଂ । ବଦ୍ଧପଦ୍ମାସନସ୍ଥମ୍ । ପୀତଂ ବାସୋ ବସାନଂ ନବକମଲଦଲସ୍ପର୍ଧିନେତ୍ରଂ ପ୍ରସନ୍ନମ୍ । ବାମାଙ୍କାରୂଢସୀତାମୁଖକମଲମିଲଲ୍ଲୋଚନଂ ନୀରଦାଭମ୍ । ନାନାଲଙ୍କାରଦୀପ୍ତଂ ଦଧତମୁରୁଜଟାମଣ୍ଡନଂ ରାମଚନ୍ଦ୍ରମ୍ ॥
ଇତି ଧ୍ଯାନମ୍ । ଚରିତଂ ରଘୁନାଥସ୍ଯ ଶତକୋଟିପ୍ରବିସ୍ତରମ୍ । ଏକୈକମକ୍ଷରଂ ପୁଂସାଂ ମହାପାତକନାଶନମ୍ ॥ ୧ ॥
ଧ୍ଯାତ୍ବା ନୀଲୋତ୍ପଲଶ୍ଯାମଂ ରାମଂ ରାଜୀବଲୋଚନମ୍ । ଜାନକୀଲକ୍ଷ୍ମଣୋପେତଂ ଜଟାମୁକୁଟମଣ୍ଡିତମ୍ ॥ ୨ ॥
ସାସିତୂଣଧନୁର୍ବାଣପାଣିଂ ନକ୍ତଂଚରାନ୍ତକମ୍ । ସ୍ବଲୀଲଯା ଜଗତ୍ତ୍ରାତୁମାବିର୍ଭୂତମଜଂ ବିଭୁମ୍ ॥ ୩ ॥
ରାମରକ୍ଷାମ୍ ପଠେତ୍ ପ୍ରାଜ୍ଞଃ ପାପଘ୍ନୀଂ ସର୍ବକାମଦାମ୍ । ଶିରୋ ମେ ରାଘବଃ ପାତୁ ଭାଲଂ ଦଶରଥାତ୍ମଜଃ ॥ ୪ ॥
କୌସଲ୍ଯେଯୋ ଦୃଶୌ ପାତୁ ବିଶ୍ବାମିତ୍ରପ୍ରିଯଃ ଶ୍ରୁତୀ । ଘ୍ରାଣଂ ପାତୁ ମଖତ୍ରାତା ମୁଖଂ ସୌମିତ୍ରିବତ୍ସଲଃ ॥ ୫ ॥
ଜିହ୍ବାଂ ବିଦ୍ଯାନିଧିଃ ପାତୁ କଣ୍ଠଂ ଭରତବନ୍ଦିତଃ । ସ୍କନ୍ଧୌ ଦିବ୍ଯାଯୁଧଃ ପାତୁ ଭୁଜୌ ଭଗ୍ନେଶକାର୍ମୁକଃ ॥ ୬ ॥
କରୌ ସୀତାପତିଃ ପାତୁ ହୃଦଯଂ ଜାମଦଗ୍ନ୍ଯଜିତ୍ । ମଧ୍ଯଂ ପାତୁ ଖରଧ୍ବଂସୀ ନାଭିଂ ଜାମ୍ବବଦାଶ୍ରଯଃ ॥ ୭ ॥
ସୁଗ୍ରୀବେଶଃ କଟୀ ପାତୁ ସକ୍ଥିନୀ ହନୁମତ୍ପ୍ରଭୁଃ । ଊରୂ ରଘୂତ୍ତମଃ ପାତୁ ରକ୍ଷଃକୁଲବିନାଶକୃତ୍ ॥ ୮ ॥
ଜାନୁନୀ ସେତୁକୃତ୍ ପାତୁ ଜଙ୍ଘେ ଦଶମୁଖାନ୍ତକଃ । ପାଦୌ ବିଭୀଷଣଶ୍ରୀଦଃ ପାତୁ ରାମୋଽଖିଲଂ ବପୁଃ ॥ ୯ ॥
ଏତାଂ ରାମବଲୋପେତାଂ ରକ୍ଷାଂ ଯଃ ସୁକୃତୀ ପଠେତ୍ । ସ ଚିରାଯୁଃ ସୁଖୀ ପୁତ୍ରୀ ବିଜଯୀ ବିନଯୀ ଭବେତ୍ ॥ ୧୦ ॥
ପାତାଲଭୂତଲବ୍ଯୋମ ଚାରିଣଶ୍ଛଦ୍ମଚାରିଣଃ । ନ ଦ୍ରଷ୍ଟୁମପି ଶକ୍ତାସ୍ତେ ରକ୍ଷିତଂ ରାମନାମଭିଃ ॥ ୧୧ ॥
ରାମେତି ରାମଭଦ୍ରେତି ରାମଚନ୍ଦ୍ରେତି ବା ସ୍ମରନ୍ । ନରୋ ନ ଲିପ୍ଯତେ ପାପୈର୍ଭୁକ୍ତିଂ ମୁକ୍ତିଂ ଚ ବିନ୍ଦତି ॥ ୧୨ ॥
ଜଗଜ୍ଜୈତ୍ରେକମନ୍ତ୍ରେଣ ରାମନାମ୍ନାଭିରକ୍ଷିତମ୍ । ଯଃ କନ୍ଠେ ଧାରଯେତ୍ତସ୍ଯ କରସ୍ଥାଃ ସର୍ବସିଧ୍ଦଯଃ ॥ ୧୩ ॥
ବଜ୍ରପଞ୍ଜରନାମେଦମଂ ଯୋ ରାମକବଚଂ ସ୍ମରେତ୍ । ଅବ୍ଯାହତାଜ୍ଞଃ ସର୍ବତ୍ର ଲଭତେ ଜଯମଙ୍ଗଲମ୍ ॥ ୧୪ ॥
ଆଦିଷ୍ଟବାନ୍ ଯଥା ସ୍ବପ୍ନେ ରାମରକ୍ଷାମିମାଂ ହରଃ । ତଥା ଲିଖିତବାନ୍ ପ୍ରାତଃ ପ୍ରବୁଦ୍ଧୋ ବୁଧକୌଶିକଃ ॥ ୧୫ ॥
ଆରାମଃ କଲ୍ପବୃକ୍ଷାଣାଂ ବିରାମଃ ସକଲାପଦାମ୍ । ଅଭିରାମସ୍ତ୍ରିଲୋକାନାଂ ରାମଃ ଶ୍ରୀମାନ୍ ସ ନଃ ପ୍ରଭୁଃ ॥ ୧୬ ॥
ତରୁଣୌ ରୂପସଂପନ୍ନୌ ସୁକୁମାରୌ ମହାବଲୌ । ପୁଣ୍ଡରୀକ ବିଶାଲାକ୍ଷୌ ଚୀରକୃଷ୍ଣାଜିନାମ୍ବରୌ ॥ ୧୭ ॥
ଫଲମୂଲାଶିନୌ ଦାନ୍ତୌ ତାପସୌ ବ୍ରହ୍ମଚାରିଣୌ । ପୁତ୍ରୌ ଦଶରଥସ୍ଯୈତୌ ଭ୍ରାତରୌ ରାମଲକ୍ଷ୍ମଣୌ ॥ ୧୮ ॥
ଶରଣ୍ଯୌ ସର୍ବସତ୍ବାନାଂ ଶ୍ରେଷ୍ଠୌ ସର୍ବଧନୁଷ୍ମତାମ୍ । ରକ୍ଷଃ କୁଲନିହନ୍ତାରୌ ତ୍ରାଯେତାଂ ନୋ ରଘୂତ୍ତମୌ ॥ ୧୯ ॥
ଆତ୍ତସଜ୍ଜଧନୁଷାବିଷୁସ୍ପୃଶାବକ୍ଷଯାଶୁଗନିଷଙ୍ଗସଙ୍ଗିନୌ । ରକ୍ଷଣାଯ ମମ୍ ରାମଲକ୍ଷ୍ମଣାବଗ୍ରତଃ ପଥି ସଦୈବ ଗଚ୍ଛତାମ୍ ॥ ୨୦ ॥
ସଂନଦ୍ଧଃ କବଚୀ ଖଡ୍ଗୀ ଚାପବାଣଧରୋ ଯୁବା । ଗଚ୍ଛନ୍ ମନୋରଥୋଽସ୍ମାକଂ ରାମଃ ପାତୁ ସଲକ୍ଷ୍ମଣଃ ॥ ୨୧ ॥
ରାମୋ ଦାଶରଥିଃ ଶୂରୋ ଲକ୍ଷ୍ମଣାନୁଚରୋ ବଲୀ । କାକୁତ୍ସ୍ଥଃ ପୁରୁଷଃ ପୂର୍ଣଃ କୌସଲ୍ଯେଯୋ ରଘୂତ୍ତମଃ ॥ ୨୨ ॥
ବେଦାନ୍ତବେଦ୍ଯୋ ଯଜ୍ଞେଶଃ ପୁରାଣପୁରୁଷୋତ୍ତମଃ । ଜାନକୀବଲ୍ଲଭଃ ଶ୍ରୀମାନପ୍ରମେଯପରାକ୍ରମଃ ॥ ୨୩ ॥
ଇତ୍ଯେତାନି ଜପେନ୍ନିତ୍ଯଂ ମଦ୍ଭକ୍ତଃ ଶ୍ରଦ୍ଧଯାନ୍ବିତଃ । ଅଶ୍ବମେଧାଧିକଂ ପୁଣ୍ଯଂ ସମ୍ପ୍ରାପ୍ନୋତି ନ ସଂଶଯଃ ॥ ୨୪ ॥
ରାମଂଦୂର୍ବାଦଲଶ୍ଯାମଂ ପଦ୍ମାକ୍ଷଂ ପୀତବାସସମ୍ । ସ୍ତୁବନ୍ତି ନାମଭିର୍ଦିବ୍ଯୈର୍ନ ତେ ସଂସାରିଣୋ ନରଃ ॥ ୨୫ ॥
ରାମଂ ଲକ୍ଷ୍ମଣପୂର୍ବଜମ୍ ରଘୁବରଂ ସୀତାପତିଂ ସୁନ୍ଦରମ୍ । କାକୁତ୍ସ୍ଥଂ କରୁଣାର୍ଣବଂ ଗୁଣନିଧିଂ ବିପ୍ରପ୍ରିଯଂ ଧାର୍ମିକମ୍ ॥
ରାଜେନ୍ଦ୍ରଂ ସତ୍ଯସନ୍ଧଂ ଦଶରଥତନଯଂ ଶ୍ଯାମଲଂ ଶାନ୍ତମୂର୍ତିମ୍ । ବନ୍ଦେ ଲୋକାଭିରାମଂ ରଘୁକୁଲତିଲକମ୍ ରାଘବଂ ରାବଣାରିମ୍ ॥ ୨୬ ॥
ରାମାଯ ରାମଭଦ୍ରାଯ ରାମଚନ୍ଦ୍ରାଯ ବେଧସେ । ରଘୁନାଥାଯ ନାଥାଯ ସୀତାଯାଃ ପତଯେ ନମଃ ॥ ୨୭ ॥
ଶ୍ରୀରାମ ରାମ ରଘୁନନ୍ଦନ ରାମ ରାମ । ଶ୍ରୀରାମ ରାମ ଭରତାଗ୍ରଜ ରାମ ରାମ ॥
ଶ୍ରୀରାମ ରାମ ରଣକର୍କଶ ରାମ ରାମ । ଶ୍ରୀରାମ ରାମ ଶରଣଂ ଭବ ରାମ ରାମ ॥ ୨୮ ॥
ଶ୍ରୀରାମଚନ୍ଦ୍ରଚରଣୌ ମନସା ସ୍ମରାମି । ଶ୍ରୀରାମଚନ୍ଦ୍ରଚରଣୌ ବଚସା ଗୃଣାମି ॥
ଶ୍ରୀରାମଚନ୍ଦ୍ରଚରଣୌ ଶିରସା ନମାମି । ଶ୍ରୀରାମଚନ୍ଦ୍ରଚରଣୌ ଶରଣଂ ପ୍ରପଦ୍ଯେ ॥ ୨୯ ॥
ମାତା ରାମୋ ମତ୍ପିତା ରାମଚନ୍ଦ୍ରଃ । ସ୍ବାମୀ ରାମୋ ମତ୍ସଖା ରାମଚନ୍ଦ୍ରଃ ॥
ସର୍ବସ୍ବଂ ମେ ରାମଚନ୍ଦ୍ରୋ ଦଯାଲୁଃ । ନାନ୍ଯଂ ଜାନେ ନୈବ ଜାନେ ନ ଜାନେ ॥ ୩୦ ॥
ଦକ୍ଷିଣେ ଲକ୍ଷ୍ମଣୋ ଯସ୍ଯ ବାମେ ତୁ ଜନକାତ୍ମଜା । ପୁରତୋ ମାରୁତିର୍ଯସ୍ଯ ତଂ ବନ୍ଦେ ରଘୁନନ୍ଦନମ୍ ॥ ୩୧ ॥
ଲୋକାଭିରାମଂ ରଣରଙ୍ଗଧୀରଂ ରାଜୀବନେତ୍ରଂ ରଘୁବଂଶନାଥମ୍ । କାରୁଣ୍ଯରୂପଂ କରୁଣାକରଂ ତଂ ଶ୍ରୀରାମଚନ୍ଦ୍ରଂ ଶରଣଂ ପ୍ରପଦ୍ଯେ ॥ ୩୨ ॥
ମନୋଜବଂ ମାରୁତତୁଲ୍ଯବେଗଂ ଜିତେନ୍ଦ୍ରିଯଂ ବୁଦ୍ଧିମତାଂ ବରିଷ୍ଠମ୍ । ବାତାତ୍ମଜଂ ବାନରଯୂଥମୁଖ୍ଯଂ ଶ୍ରୀରାମଦୂତଂ ଶରଣଂ ପ୍ରପଦ୍ଯେ ॥ ୩୩ ॥
କୂଜନ୍ତଂ ରାମରାମେତି ମଧୁରଂ ମଧୁରାକ୍ଷରମ୍ । ଆରୁହ୍ଯ କବିତାଶାଖାଂ ବନ୍ଦେ ବାଲ୍ମୀକିକୋକିଲମ୍ ॥ ୩୪ ॥
ଆପଦାମପହର୍ତାରଂ ଦାତାରଂ ସର୍ବସଂପଦାମ୍ । ଲୋକାଭିରାମଂ ଶ୍ରୀରାମଂ ଭୂଯୋ ଭୂଯୋ ନମାମ୍ଯହମ୍ ॥ ୩୫ ॥
ଭର୍ଜନଂ ଭବବୀଜାନାମର୍ଜନଂ ସୁଖସଂପଦାମ୍ । ତର୍ଜନଂ ଯମଦୂତାନାଂ ରାମରାମେତି ଗର୍ଜନମ୍ ॥ ୩୬ ॥
ରାମୋ ରାଜମଣିଃ ସଦା ବିଜଯତେ ରାମଂ ରମେଶଂ ଭଜେ । ରାମେଣାଭିହତା ନିଶାଚରଚମୂ ରାମାଯ ତସ୍ମୈ ନମଃ ॥
ରାମାନ୍ନାସ୍ତି ପରାଯଣଂ ପରତରଂ ରାମସ୍ଯ ଦାସୋଽସ୍ମ୍ଯହମ୍ । ରାମେ ଚିତ୍ତଲଯଃ ସଦା ଭବତୁ ମେ ଭୋ ରାମ ମାମୁଦ୍ଧର ॥ ୩୭ ॥
ରାମରାମେତି ରାମେତି ରମେ ରାମେ ମନୋରମେ । ସହସ୍ତ୍ରନାମତତ୍ତୁଲ୍ଯଂ ରାମନାମ ବରାନନେ ॥ ୩୮ ॥
ଇତି ଶ୍ରୀବୁଧକୌଶିକବିରଚିତଂ ଶ୍ରୀରାମରକ୍ଷାସ୍ତ୍ରୋତ୍ରଂ ସମ୍ପୂର୍ଣମ୍ ।
ଉତ୍ସ: Wikisource · CC BY-SA 4.0