॥ସଙ୍କଟନାଶନଗଣେଶସ୍ତୋତ୍ରମ୍॥
ନାରଦ ଉବାଚ — ପ୍ରଣମ୍ଯ ଶିରସା ଦେବଂ ଗୌରୀପୁତ୍ରଂ ବିନାଯକମ୍। ଭକ୍ତାବାସଂ ସ୍ମରେନ୍ନିତ୍ଯମାଯୁଃକାମାର୍ଥସିଦ୍ଧଯେ॥ ୧ ॥
ପ୍ରଥମଂ ବକ୍ରତୁଣ୍ଡଂ ଚ ଏକଦନ୍ତଂ ଦ୍ବିତୀଯକମ୍। ତୃତୀଯଂ କୃଷ୍ଣପିଙ୍ଗାକ୍ଷଂ ଗଜବକ୍ତ୍ରଂ ଚତୁର୍ଥକମ୍॥ ୨ ॥
ଲମ୍ବୋଦରଂ ପଞ୍ଚମଂ ଚ ଷଷ୍ଠଂ ବିକଟମେବ ଚ। ସପ୍ତମଂ ବିଘ୍ନରାଜଂ ଚ ଧୂମ୍ରବର୍ଣଂ ତଥାଷ୍ଟମମ୍॥ ୩ ॥
ନବମଂ ଭାଲଚନ୍ଦ୍ରଂ ଚ ଦଶମଂ ତୁ ବିନାଯକମ୍। ଏକାଦଶଂ ଗଣପତିଂ ଦ୍ବାଦଶଂ ତୁ ଗଜାନନମ୍॥ ୪ ॥
ଦ୍ବାଦଶୈତାନି ନାମାନି ତ୍ରିସନ୍ଧ୍ଯଂ ଯଃ ପଠେନ୍ନରଃ। ନ ଚ ବିଘ୍ନଭଯଂ ତସ୍ଯ ସର୍ବସିଦ୍ଧିକରଂ ପ୍ରଭୋ॥ ୫ ॥
ବିଦ୍ଯାର୍ଥୀ ଲଭତେ ବିଦ୍ଯାଂ ଧନାର୍ଥୀ ଲଭତେ ଧନମ୍। ପୁତ୍ରାର୍ଥୀ ଲଭତେ ପୁତ୍ରାନ୍ମୋକ୍ଷାର୍ଥୀ ଲଭତେ ଗତିମ୍॥ ୬ ॥
ଜପେଦ୍ଗଣପତିସ୍ତୋତ୍ରଂ ଷଡ୍ଭିର୍ମାସୈଃ ଫଲଂ ଲଭେତ୍। ସଂବତ୍ସରେଣ ସିଦ୍ଧିଂ ଚ ଲଭତେ ନାତ୍ର ସଂଶଯଃ॥ ୭ ॥
ଅଷ୍ଟଭ୍ଯୋ ବ୍ରାହ୍ମଣେଭ୍ଯଶ୍ଚ ଲିଖିତ୍ବା ଯଃ ସମର୍ପଯେତ୍। ତସ୍ଯ ବିଦ୍ଯା ଭବେତ୍ସର୍ବା ଗଣେଶସ୍ଯ ପ୍ରସାଦତଃ॥ ୮ ॥
॥ ଇତି ଶ୍ରୀନାରଦପୁରାଣେ ସଙ୍କଟନାଶନଂ ନାମ ଗଣେଶସ୍ତୋତ୍ରଂ ସମ୍ପୂର୍ଣମ୍ ॥
ଉତ୍ସ: Wikisource · CC BY-SA 4.0