॥ଅଥ ସୁସଂଶୁଦ୍ଧଂ ରାବଣକୃତଶିବତାଣ୍ଡବସ୍ତୋତ୍ରମ୍॥
॥ଶ୍ରୀଗଣେଶାଯ ନମଃ॥
ଜଟାଽଟବୀଗଲଜ୍ଜଲପ୍ରବାହପାବିତସ୍ଥଲେ ଗଲେଽବଲମ୍ବ୍ଯ ଲମ୍ବିତାଂ ଭୁଜଙ୍ଗତୁଙ୍ଗମାଲିକାମ୍। ଡମଡ୍ଡମଡ୍ଡମଡ୍ଡମନ୍ନିନାଦବଡ୍ଡମର୍ବଯଂ ଚକାର ଚଣ୍ଡତାଣ୍ଡବଂ ତନୋତୁ ନଃ ଶିବଃ ଶିବମ୍ ॥ ୧ ॥
ଜଟାକଟାହସମ୍ଭ୍ରମଭ୍ରମନ୍ନିଲିମ୍ପନିର୍ଝରୀବିଲୋଲବୀଚିବଲ୍ଲରୀବିରାଜମାନମୂର୍ଦ୍ଧନି। ଧଗଦ୍ଧଗଦ୍ଧଗଜ୍ଜ୍ବଲଲ୍ଲଲାଟପଟ୍ଟପାବକେ କିଶୋରଚନ୍ଦ୍ରଶେଖରେ ରତିଃ ପ୍ରତିକ୍ଷଣଂ ମମ ॥ ୨ ॥
ଧରାଧରେନ୍ଦ୍ରନନ୍ଦିନୀବିଲାସବନ୍ଧୁବନ୍ଧୁରସ୍ଫୁରଦ୍ଦିଗନ୍ତସନ୍ତତିପ୍ରମୋଦମାନମାନସେ। କୃପାକଟାକ୍ଷଧୋରଣୀନିରୁଦ୍ଧଦୁର୍ଧରାପଦି କ୍ବଚିଦ୍ଦିଗମ୍ବରେ ମନୋ ବିନୋଦମେତୁ ବସ୍ତୁନି ॥ ୩ ॥
ଜଟାଭୁଜଙ୍ଗପିଙ୍ଗଲସ୍ଫୁରତ୍ଫଣାମଣିପ୍ରଭାକଦମ୍ବକୁଙ୍କୁମଦ୍ରବପ୍ରଲିପ୍ତଦିଗ୍ବଧୂମୁଖେ। ମଦାନ୍ଧସିନ୍ଧୁରାସୁରତ୍ବଗୁତ୍ତରୀଯମେଦୁରେ ମନୋ ବିନୋଦମଦ୍ଭୁତଂ ବିଭର୍ତୁ ଭୂତଭର୍ତରି ॥ ୪ ॥
ସହସ୍ରଲୋଚନପ୍ରଭୃତ୍ଯଶେଷଲେଖଶେଖରପ୍ରସୂନଧୂଲିଧୋରଣୀବିଧୂସରାଙ୍ଘ୍ରିପୀଠଭୂଃ। ଭୁଜଙ୍ଗରାଜମାଲଯା ନିବଦ୍ଧଜାଟଜୂଟକଃ ଶ୍ରିଯେ ଚିରାଯ ଜାଯତାଂ ଚକୋରବନ୍ଧୁଶେଖରଃ ॥ ୫ ॥
ଲଲାଟଚତ୍ବରଜ୍ବଲଦ୍ଧନଞ୍ଜଯସ୍ଫୁଲିଙ୍ଗଭାନିପୀତପଞ୍ଚସାଯକଂ ନମନ୍ନିଲିମ୍ପନାଯକମ୍। ସୁଧାମଯୂଖଲେଖଯା ବିରାଜମାନଶେଖରଂ ମହଃ କପାଲି ସମ୍ପଦେ ସରିଜ୍ଜଟାଲମସ୍ତୁ ନଃ ॥ ୬ ॥
କରାଲଭାଲପଟ୍ଟିକାଧଗଦ୍ଧଗଦ୍ଧଗଜ୍ଜ୍ବଲଦ୍ଧନଞ୍ଜଯାହୁତୀକୃତପ୍ରଚଣ୍ଡପଞ୍ଚସାଯକେ। ଧରାଧରେନ୍ଦ୍ରନନ୍ଦିନୀକୁଚାଗ୍ରଚିତ୍ରପତ୍ରକପ୍ରକଲ୍ପନୈକଶିଲ୍ପିନି ତ୍ରିଲୋଚନେ ରତିର୍ମମ ॥ ୭ ॥
ନବୀନମେଘମଣ୍ଡଲୀନିରୁଦ୍ଧଦୁର୍ଧରସ୍ଫୁରତ୍କୁହୂନିଶୀଥିନୀତମଃପ୍ରବନ୍ଧବଦ୍ଧକନ୍ଧରଃ। ନିଲିମ୍ପନିର୍ଝରୀଧରସ୍ତନୋତୁ କୃତ୍ତିସିନ୍ଧୁରଃ କଲାନିଧାନବନ୍ଧୁରଃ ଶ୍ରିଯଂ ଜଗଦ୍ଧୁରନ୍ଧରଃ ॥ ୮ ॥
ପ୍ରଫୁଲ୍ଲନୀଲପଙ୍କଜପ୍ରପଞ୍ଚକାଲିମପ୍ରଭାଽବଲମ୍ବିକଣ୍ଠକନ୍ଦଲୀରୁଚିପ୍ରବଦ୍ଧକନ୍ଧରମ୍। ସ୍ମରଚ୍ଛିଦଂ ପୁରଚ୍ଛିଦଂ ଭବଚ୍ଛିଦଂ ମଖଚ୍ଛିଦଂ ଗଜଚ୍ଛିଦାନ୍ଧକଚ୍ଛିଦଂ ତମନ୍ତକଚ୍ଛିଦଂ ଭଜେ ॥ ୯ ॥
ଅଖର୍ବସର୍ବମଙ୍ଗଲାକଲାକଦମ୍ବମଞ୍ଜରୀରସପ୍ରବାହମାଧୁରୀବିଜୃମ୍ଭଣାମଧୁବ୍ରତମ୍। ସ୍ମରାନ୍ତକଂ ପୁରାନ୍ତକଂ ଭବାନ୍ତକଂ ମଖାନ୍ତକଂ ଗଜାନ୍ତକାନ୍ଧକାନ୍ତକଂ ତମନ୍ତକାନ୍ତକଂ ଭଜେ ॥ ୧୦ ॥
ଜଯତ୍ବଦଭ୍ରବିଭ୍ରମଭ୍ରମଦ୍ଭୁଜଙ୍ଗମଶ୍ବସଦ୍ବିନିର୍ଗମତ୍କ୍ରମସ୍ଫୁରତ୍କରାଲଭାଲହବ୍ଯବାଟ୍। ଧିମିଦ୍ଧିମିଦ୍ଧିମିଦ୍ଧ୍ବନନ୍ମୃଦଙ୍ଗତୁଙ୍ଗମଙ୍ଗଲଧ୍ବନିକ୍ରମପ୍ରବର୍ତିତପ୍ରଚଣ୍ଡତାଣ୍ଡବଃ ଶିବଃ ॥ ୧୧ ॥
ଦୃଷଦ୍ବିଚିତ୍ରତଲ୍ପଯୋର୍ଭୁଜଙ୍ଗମୌକ୍ତିକସ୍ରଜୋର୍ଗରିଷ୍ଠରତ୍ନଲୋଷ୍ଠଯୋଃ ସୁହୃଦ୍ବିପକ୍ଷପକ୍ଷଯୋଃ। ତୃଣାରବିନ୍ଦଚକ୍ଷୁଷୋଃ ପ୍ରଜାମହୀମହେନ୍ଦ୍ରଯୋଃ ସମପ୍ରବୃତ୍ତିକଃ କଦା ସଦାଶିବଂ ଭଜାମ୍ଯହମ୍ ॥ ୧୨ ॥
କଦା ନିଲିମ୍ପନିର୍ଝରୀନିକୁଞ୍ଜକୋଟରେ ବସନ୍ ବିମୁକ୍ତଦୁର୍ମତିଃ ସଦା ଶିରଃସ୍ଥମଞ୍ଜଲିଂ ବହନ୍। ବିମୁକ୍ତଲୋଲଲୋଚନାଲଲାମଭାଲଲଗ୍ନକଂ ଶିବେତି ମନ୍ତ୍ରମୁଚ୍ଚରନ୍ କଦା ସୁଖୀ ଭବାମ୍ଯହମ୍ ॥ ୧୩ ॥
ନିଲିମ୍ପନାଥନାଗରୀକଦମ୍ବମୌଲମଲ୍ଲିକାନିଗୁମ୍ଫନିର୍ଭରକ୍ଷରନ୍ମଧୂଷ୍ଣିକାମନୋହରଃ। ତନୋତୁ ନୋ ମନୋମୁଦଂ ବିନୋଦିନୀମହର୍ନିଶଂ ପରଶ୍ରିଯଃ ପରଂ ପଦଂ ତଦଙ୍ଗଜତ୍ବିଷାଂ ଚଯଃ ॥ ୧୪ ॥
ପ୍ରଚଣ୍ଡବାଡବାନଲପ୍ରଭାଶୁଭପ୍ରଚାରଣୀ ମହାଷ୍ଟସିଦ୍ଧିକାମିନୀଜନାଽବହୂତଜଲ୍ପନା। ବିମୁକ୍ତବାମଲୋଚନାବିବାହକାଲିକଧ୍ବନିଃ ଶିବେତି ମନ୍ତ୍ରଭୂଷଣା ଜଗଜ୍ଜଯାଯ ଜାଯତାମ୍ ॥ ୧୫ ॥
ଇମଂ ହି ନିତ୍ଯମେବମୁକ୍ତମୁତ୍ତମୋତ୍ତମଂ ସ୍ତବଂ ପଠନ୍ସ୍ମରନ୍ବ୍ରୁବନ୍ନରୋ ବିଶୁଦ୍ଧିମେତିସନ୍ତତମ୍। ହରେ ଗୁରୌ ସୁଭକ୍ତିମାଶୁ ଯାତି ନାଽନ୍ଯଥା ଗତିଂ ବିମୋହନଂ ହି ଦେହିନାଂ ସୁଶଙ୍କରସ୍ଯ ଚିନ୍ତନମ୍ ॥ ୧୬ ॥
ପୂଜାବସାନସମଯେ ଦଶବକ୍ତ୍ରଗୀତଂ ଯଃ ଶମ୍ଭୁପୂଜନପରଂ ପଠତି ପ୍ରଦୋଷେ। ତସ୍ଯ ସ୍ଥିରାଂ ରଥଗଜେନ୍ଦ୍ରତୁରଙ୍ଗଯୁକ୍ତାଂ ଲକ୍ଷ୍ମୀଂ ପ୍ରସାଦସମଯେ ପ୍ରଦଦାତି ଶମ୍ଭୁଃ ॥
॥ ଇତି ରାବଣକୃତଂ ଶିବତାଣ୍ଡବସ୍ତୋତ୍ରଂ ସମ୍ପୂର୍ଣମ୍ ॥
ଉତ୍ସ: Wikisource · CC BY-SA 4.0