ହିରଣ୍ଯବର୍ଣାଂ ହରିଣୀଂ ସୁବର୍ଣରଜତସ୍ରଜାମ୍ । ଚନ୍ଦ୍ରାଂ ହିରଣ୍ମଯୀଂ ଲକ୍ଷ୍ମୀଂ ଜାତବେଦୋ ମ ଆବହ ॥ ୧ ॥
ତାଂ ମ ଆବହ ଜାତବେଦୋ ଲକ୍ଷ୍ମୀମନପଗାମିନୀମ୍ । ଯସ୍ଯାଂ ହିରଣ୍ଯଂ ବିନ୍ଦେଯଂ ଗାମଶ୍ବଂ ପୁରୁଷାନହମ୍ ॥ ୨ ॥
ଅଶ୍ବପୂର୍ବାଂ ରଥମଧ୍ଯାଂ ହସ୍ତିନାଦପ୍ରବୋଧିନୀମ୍ । ଶ୍ରିଯଂ ଦେବୀମୁପହ୍ବଯେ ଶ୍ରୀର୍ମା ଦେବୀ ଜୁଷତାମ୍ ॥ ୩ ॥
କାଂସୋସ୍ମିତାଂ ହିରଣ୍ଯପ୍ରାକାରାମାର୍ଦ୍ରାଂ ଜ୍ବଲନ୍ତୀଂ ତୃପ୍ତାଂ ତର୍ପଯନ୍ତୀମ୍ । ପଦ୍ମେ ସ୍ଥିତାଂ ପଦ୍ମବର୍ଣାଂ ତାମିହୋପହ୍ବଯେ ଶ୍ରିଯମ୍ ॥ ୪ ॥
ଚନ୍ଦ୍ରାଂ ପ୍ରଭାସାଂ ଯଶସା ଜ୍ବଲନ୍ତୀଂ ଶ୍ରିଯଂ ଲୋକେ ଦେବଜୁଷ୍ଟାମୁଦାରାମ୍ । ତାଂ ପଦ୍ମିନୀମୀଂ ଶରଣମହଂ ପ୍ରପଦ୍ଯେଽଲକ୍ଷ୍ମୀର୍ମେ ନଶ୍ଯତାଂ ତ୍ବାଂ ବୃଣେ ॥ ୫ ॥
ଆଦିତ୍ଯବର୍ଣେ ତପସୋଽଧିଜାତୋ ବନସ୍ପତିସ୍ତବ ବୃକ୍ଷୋଽଥ ବିଲ୍ବଃ । ତସ୍ଯ ଫଲାନି ତପସା ନୁଦନ୍ତୁ ମାଯାନ୍ତରାଯାଶ୍ଚ ବାହ୍ଯା ଅଲକ୍ଷ୍ମୀଃ ॥ ୬ ॥
ଉପୈତୁ ମାଂ ଦେବସଖଃ କୀର୍ତିଶ୍ଚ ମଣିନା ସହ । ପ୍ରାଦୁର୍ଭୂତୋଽସ୍ମି ରାଷ୍ଟ୍ରେଽସ୍ମିନ୍ କୀର୍ତିମୃଦ୍ଧିଂ ଦଦାତୁ ମେ ॥ ୭ ॥
କ୍ଷୁତ୍ପିପାସାମଲାଂ ଜ୍ଯେଷ୍ଠାମଲକ୍ଷ୍ମୀଂ ନାଶଯାମ୍ଯହମ୍ । ଅଭୂତିମସମୃଦ୍ଧିଂ ଚ ସର୍ବାନ୍ ନିର୍ଣୁଦ ମେ ଗୃହାତ୍ ॥ ୮ ॥
ଗନ୍ଧଦ୍ବାରାଂ ଦୁରାଧର୍ଷାଂ ନିତ୍ଯପୁଷ୍ଟାଂ କରୀଷିଣୀମ୍ । ଈଶ୍ବରୀଂ ସର୍ବଭୂତାନାଂ ତାମିହୋପହ୍ବଯେ ଶ୍ରିଯମ୍ ॥ ୯ ॥
ମନସଃ କାମମାକୂତିଂ ବାଚଃ ସତ୍ଯମଶୀମହି । ପଶୂନାଂ ରୂପମନ୍ନସ୍ଯ ମଯି ଶ୍ରୀଃ ଶ୍ରଯତାଂ ଯଶଃ ॥ ୧୦ ॥
କର୍ଦମେନ ପ୍ରଜା ଭୂତା ମଯି ସମ୍ଭବ କର୍ଦମ । ଶ୍ରିଯଂ ବାସଯ ମେ କୁଲେ ମାତରଂ ପଦ୍ମମାଲିନୀମ୍ ॥ ୧୧ ॥
ଆପଃ ସୃଜନ୍ତୁ ସ୍ନିଗ୍ଧାନି ଚିକ୍ଲୀତ ବସ ମେ ଗୃହେ । ନି ଚ ଦେବୀଂ ମାତରଂ ଶ୍ରିଯଂ ବାସଯ ମେ କୁଲେ ॥ ୧୨ ॥
ଆର୍ଦ୍ରାଂ ପୁଷ୍କରିଣୀଂ ପୁଷ୍ଟିଂ ପିଙ୍ଗଲାଂ ପଦ୍ମମାଲିନୀମ୍ । ଚନ୍ଦ୍ରାଂ ହିରଣ୍ମଯୀଂ ଲକ୍ଷ୍ମୀଂ ଜାତବେଦୋ ମ ଆବହ ॥ ୧୩ ॥
ଆର୍ଦ୍ରାଂ ଯଃ କରିଣୀଂ ଯଷ୍ଟିଂ ସୁବର୍ଣାଂ ହେମମାଲିନୀମ୍ । ସୂର୍ଯାଂ ହିରଣ୍ମଯୀଂ ଲକ୍ଷ୍ମୀଂ ଜାତବେଦୋ ମ ଆବହ ॥ ୧୪ ॥
ତାଂ ମ ଆବହ ଜାତବେଦୋ ଲକ୍ଷ୍ମୀମନପଗାମିନୀମ୍ । ଯସ୍ଯାଂ ହିରଣ୍ଯଂ ପ୍ରଭୂତଂ ଗାବୋ ଦାସ୍ଯୋଽଶ୍ବାନ୍ ବିନ୍ଦେଯଂ ପୁରୁଷାନହମ୍ ॥ ୧୫ ॥
ଉତ୍ସ: Wikisource · CC BY-SA 4.0