హోమ్ › వేద మంత్రాలు › కనకధారాస్తోత్రమ్

కనకధారాస్తోత్రమ్

స్తోత్రాలు · 24 శ్లోకాలు

॥ శ్రీకనకధారాస్తోత్రమ్ ॥

అంగం హరేః పులకభూషణమాశ్రయంతీ భృంగాంగనేవ ముకులాభరణం తమాలమ్ । అంగీకృతాఖిలవిభూతిరపాంగలీలా మాంగల్యదాఽస్తు మమ మంగళదేవతాయాః ॥ ౧ ॥

ముగ్ధా ముహుర్విదధతీ వదనే మురారేః ప్రేమత్రపాప్రణిహితాని గతాగతాని । మాలా దృశోర్మధుకరీవ మహోత్పలే యా సా మే శ్రియం దిశతు సాగరసంభవాయాః ॥ ౨ ॥

ఆమీలితాక్షమధిగమ్య ముదా ముకుందమ్– ఆనందకందమనిమేషమనంగతంత్రమ్। ఆకేకరస్థితకనీనికపక్ష్మనేత్రం భూత్యై భవేన్మమ భుజంగశయాంగనాయాః ॥ ౩ ॥

బాహ్వంతరే మధుజితః శ్రితకౌస్తుభే యా హారావలీవ హరినీలమయీ విభాతి । కామప్రదా భగవతోఽపి కటాక్షమాలా కల్యాణమావహతు మే కమలాలయాయాః ॥ ౪ ॥

కాలాంబుదాలిలలితోరసి కైటభారేర్– ధారాధరే స్ఫురతి యా తడిదంగనేవ । మాతుః సమస్తజగతాం మహనీయమూర్తిర్– భద్రాణి మే దిశతు భార్గవనందనాయాః ॥ ౫ ॥

ప్రాప్తం పదం ప్రథమతః ఖలు యత్ప్రభావాన్– మాంగల్యభాజి మధుమాథిని మన్మథేన । మయ్యాపతేత్తదిహ మంథరమీక్షణార్ధం మందాలసం చ మకరాలయకన్యకాయాః ॥ ౬ ॥

విశ్వామరేంద్రపదవిభ్రమదానదక్షమ్– ఆనందహేతురధికం మురవిద్విషోఽపి । ఈషన్నిషీదతు మయి క్షణమీక్షణార్ధమ్– ఇందీవరోదరసహోదరమిందిరాయాః ॥ ౭ ॥

ఇష్టావిశిష్టమతయోఽపి యయా దయార్ద్ర– దృష్ట్యా త్రివిష్టపపదం సులభం లభంతే । దృష్టిః ప్రహృష్టకమలోదరదీప్తిరిష్టాం పుష్టిం కృషీష్ట మమ పుష్కరవిష్టరాయాః ॥ ౮ ॥

దద్యాద్దయానుపవనో ద్రవిణాంబుధారామ్– అస్మిన్నకించనవిహంగశిశౌ విషణ్ణే । దుష్కర్మధర్మమపనీయ చిరాయ దూరం నారాయణప్రణయినీనయనాంబువాహః ॥ ౯ ॥

గీర్దేవతేతి గరుడ఼ధ్వజసుందరీతి శాకంభరీతి శశిశేఖరవల్లభేతి । సృష్టిస్థితిప్రలయకేలిషు సంస్థితాయై తస్యై నమస్త్రిభువనైకగురోస్తరుణ్యై ॥ ౧౦ ॥

శ్రుత్యై నమోఽస్తు శుభకర్మఫలప్రసూత్యై రత్యై నమోఽస్తు రమణీయగుణార్ణవాయై । శక్త్యై నమోఽస్తు శతపత్రనికేతనాయై పుష్ట్యై నమోఽస్తు పురుషోత్తమవల్లభాయై ॥ ౧౧ ॥

నమోఽస్తు నాలీకనిభాననాయై నమోఽస్తు దుగ్ధోదధిజన్మభూత్యై । నమోఽస్తు సోమామృతసోదరాయై నమోఽస్తు నారాయణవల్లభాయై ॥ ౧౨ ॥

నమోఽస్తు హేమాంబుజపీఠికాయై నమోఽస్తు భూమండలనాయికాయై । నమోఽస్తు దేవాదిదయాపరాయై నమోఽస్తు శార్ంగాయుధవల్లభాయై ॥ ౧౩ ॥

నమోఽస్తు దేవ్యై భృగునందనాయై నమోఽస్తు విష్ణోరురసి స్థితాయై । నమోఽస్తు లక్ష్మ్యై కమలాలయాయై నమోఽస్తు దామోదరవల్లభాయై ॥ ౧౪ ॥

నమోఽస్తు కాంత్యై కమలేక్షణాయై నమోఽస్తు భూత్యై భువనప్రసూత్యై । నమోఽస్తు దేవాదిభిరర్చితాయై నమోఽస్తు నందాత్మజవల్లభాయై ॥ ౧౫ ॥

సంపత్కరాణి సకలేంద్రియనందనాని సామ్రాజ్యదానవిభవాని సరోరుహాక్షి । త్వద్వందనాని దురితోద్ధరణోద్యతాని మామేవ మాతరనిశం కలయంతు మాన్యే ॥ ౧౬ ॥

యత్కటాక్షసముపాసనావిధిః సేవకస్య సకలార్థసంపదః । సంతనోతి వచనాంగమానసైస్– త్వాం మురారిహృదయేశ్వరీం భజే ॥ ౧౭ ॥

సరసిజనిలయే సరోజహస్తే ధవలతమాంశుకగంధమాల్యశోభే । భగవతి హరివల్లభే మనోజ్ఞే త్రిభువనభూతికరి ప్రసీద మహ్యమ్ ॥ ౧౮ ॥

దిగ్ఘస్తిభిః కనకకుంభముఖావసృష్ట– స్వర్వాహినీవిమలచారుజలప్లుతాంగీమ్ । ప్రాతర్నమామి జగతాం జననీమశేష– లోకాధినాథగృహిణీమమృతాబ్ధిపుత్రీమ్ ॥ ౧౯ ॥

కమలే కమలాక్షవల్లభే త్వం కరుణాపూరతరంగితైరపాంగైః । అవలోకయ మామకించనానాం ప్రథమం పాత్రమకృత్రిమం దయాయాః ॥ ౨౦ ॥

దేవి ప్రసీద జగదీశ్వరి లోకమాతః కల్యాణగాత్రి కమలేక్షణజీవనాథే । దారిద్ర్యభీతిహృదయం శరణాగతం మామ్– ఆలోకయ ప్రతిదినం సదయైరపాంగైః ॥ ౨౧ ॥

స్తువంతి యే స్తుతిభిరమూభిరన్వహం త్రయీమయీం త్రిభువనమాతరం రమామ్ । గుణాధికా గురుతరభాగ్యభాగినో భవంతి తే భువి బుధభావితాశయాః ॥ ౨౨ ॥

॥ ఇతి శ్రీమచ్ఛంకరాచార్యకృతం శ్రీకనకధారాస్తోత్రం సంపూర్ణమ్ ॥

మూలం: Wikisource · CC BY-SA 4.0

మీ అభిప్రాయం పంపండి

ఏమి మెరుగుపరచాలో, ఏది తప్పుగా ఉందో, లేదా మీకు ఏది నచ్చిందో చెప్పండి. ప్రతి సందేశాన్నీ మేము చదువుతాం.

దేని గురించి
శంఖ్ మీకు ఎంత ఉపయోగపడుతోంది? (ఐచ్ఛికం)