॥ అథ నవగ్రహస్తోత్రమ్ ॥
॥ రవిః ॥
జపాకుసుమసంకాశం కాశ్యపేయం మహాద్యుతిమ్। తమోఽరిం సర్వపాపఘ్నం ప్రణతోఽస్మి దివాకరమ్॥ ౧ ॥
॥ సోమః ॥
దధిశంఖతుషారాభం క్షీరోదార్ణవసంభవమ్। నమామి శశినం సోమం శంభోర్ముకుటభూషణమ్॥ ౨ ॥
॥ మంగళః ॥
ధరణీగర్భసంభూతం విద్యుత్కాంతిసమప్రభమ్। కుమారం శక్తిహస్తం తం మంగళం ప్రణమామ్యహమ్॥ ౩ ॥
॥ బుధః ॥
ప్రియంగుకలికాశ్యామం రూపేణాప్రతిమం బుధమ్। సౌమ్యం సౌమ్యగుణోపేతం తం బుధం ప్రణమామ్యహమ్॥ ౪ ॥
॥ గురుః ॥
దేవానాం చ ఋషీణాం చ గురుం కాంచనసన్నిభమ్। బుద్ధిభూతం త్రిలోకేశం తం నమామి బృహస్పతిమ్॥ ౫ ॥
॥ శుక్రః ॥
హిమకుందమృణాలాభం దైత్యానాం పరమం గురుమ్। సర్వశాస్త్రప్రవక్తారం భార్గవం ప్రణమామ్యహమ్॥ ౬ ॥
॥ శనిః ॥
నీలాంజనసమాభాసం రవిపుత్రం యమాగ్రజమ్। ఛాయామార్తండసంభూతం తం నమామి శనైశ్చరమ్॥ ౭ ॥
॥ రాహుః ॥
అర్ధకాయం మహావీర్యం చంద్రాదిత్యవిమర్దనమ్। సింహికాగర్భసంభూతం తం రాహుం ప్రణమామ్యహమ్॥ ౮ ॥
॥ కేతుః ॥
పలాశపుష్పసంకాశం తారకాగ్రహమస్తకమ్। రౌద్రం రౌద్రాత్మకం ఘోరం తం కేతుం ప్రణమామ్యహమ్॥ ౯ ॥
॥ ఫలశ్రుతిః ॥
ఇతి వ్యాసముఖోద్గీతం యః పఠేత్సుసమాహితః। దివా వా యది వా రాత్రౌ విఘ్నశాంతిర్భవిష్యతి॥
నరనారీనృపాణాం చ భవేద్దుఃస్వప్ననాశనమ్। ఐశ్వర్యమతులం తేషామారోగ్యం పుష్టివర్ధనమ్॥
గ్రహనక్షత్రజాః పీడాస్తస్కరాగ్నిసముద్భవాః। తాః సర్వాః ప్రశమం యాంతి వ్యాసో బ్రూతే న సంశయః॥
॥ ఇతి శ్రీవ్యాసవిరచితమ్ ఆదిత్యాదినవగ్రహస్తోత్రం సంపూర్ణమ్ ॥
మూలం: Wikisource · CC BY-SA 4.0