॥అథ సుసంశుద్ధం రావణకృతశివతాండవస్తోత్రమ్॥
॥శ్రీగణేశాయ నమః॥
జటాఽటవీగలజ్జలప్రవాహపావితస్థలే గలేఽవలంబ్య లంబితాం భుజంగతుంగమాలికామ్। డమడ్డమడ్డమడ్డమన్నినాదవడ్డమర్వయం చకార చండతాండవం తనోతు నః శివః శివమ్ ॥ ౧ ॥
జటాకటాహసంభ్రమభ్రమన్నిలింపనిర్ఝరీవిలోలవీచివల్లరీవిరాజమానమూర్ద్ధని। ధగద్ధగద్ధగజ్జ్వలల్లలాటపట్టపావకే కిశోరచంద్రశేఖరే రతిః ప్రతిక్షణం మమ ॥ ౨ ॥
ధరాధరేంద్రనందినీవిలాసబంధుబంధురస్ఫురద్దిగంతసంతతిప్రమోదమానమానసే। కృపాకటాక్షధోరణీనిరుద్ధదుర్ధరాపది క్వచిద్దిగంబరే మనో వినోదమేతు వస్తుని ॥ ౩ ॥
జటాభుజంగపింగలస్ఫురత్ఫణామణిప్రభాకదంబకుంకుమద్రవప్రలిప్తదిగ్వధూముఖే। మదాంధసింధురాసురత్వగుత్తరీయమేదురే మనో వినోదమద్భుతం బిభర్తు భూతభర్తరి ॥ ౪ ॥
సహస్రలోచనప్రభృత్యశేషలేఖశేఖరప్రసూనధూలిధోరణీవిధూసరాంఘ్రిపీఠభూః। భుజంగరాజమాలయా నిబద్ధజాటజూటకః శ్రియే చిరాయ జాయతాం చకోరబంధుశేఖరః ॥ ౫ ॥
లలాటచత్వరజ్వలద్ధనంజయస్ఫులింగభానిపీతపంచసాయకం నమన్నిలింపనాయకమ్। సుధామయూఖలేఖయా విరాజమానశేఖరం మహః కపాలి సంపదే సరిజ్జటాలమస్తు నః ॥ ౬ ॥
కరాలభాలపట్టికాధగద్ధగద్ధగజ్జ్వలద్ధనంజయాహుతీకృతప్రచండపంచసాయకే। ధరాధరేంద్రనందినీకుచాగ్రచిత్రపత్రకప్రకల్పనైకశిల్పిని త్రిలోచనే రతిర్మమ ॥ ౭ ॥
నవీనమేఘమండలీనిరుద్ధదుర్ధరస్ఫురత్కుహూనిశీథినీతమఃప్రబంధబద్ధకంధరః। నిలింపనిర్ఝరీధరస్తనోతు కృత్తిసింధురః కలానిధానబంధురః శ్రియం జగద్ధురంధరః ॥ ౮ ॥
ప్రఫుల్లనీలపంకజప్రపంచకాలిమప్రభాఽవలంబికంఠకందలీరుచిప్రబద్ధకంధరమ్। స్మరచ్ఛిదం పురచ్ఛిదం భవచ్ఛిదం మఖచ్ఛిదం గజచ్ఛిదాంధకచ్ఛిదం తమంతకచ్ఛిదం భజే ॥ ౯ ॥
అఖర్వసర్వమంగళాకలాకదంబమంజరీరసప్రవాహమాధురీవిజృంభణామధువ్రతమ్। స్మరాంతకం పురాంతకం భవాంతకం మఖాంతకం గజాంతకాంధకాంతకం తమంతకాంతకం భజే ॥ ౧౦ ॥
జయత్వదభ్రవిభ్రమభ్రమద్భుజంగమశ్వసద్వినిర్గమత్క్రమస్ఫురత్కరాలభాలహవ్యవాట్। ధిమిద్ధిమిద్ధిమిద్ధ్వనన్మృదంగతుంగమంగళధ్వనిక్రమప్రవర్తితప్రచండతాండవః శివః ॥ ౧౧ ॥
దృషద్విచిత్రతల్పయోర్భుజంగమౌక్తికస్రజోర్గరిష్ఠరత్నలోష్ఠయోః సుహృద్విపక్షపక్షయోః। తృణారవిందచక్షుషోః ప్రజామహీమహేంద్రయోః సమప్రవృత్తికః కదా సదాశివం భజామ్యహమ్ ॥ ౧౨ ॥
కదా నిలింపనిర్ఝరీనికుంజకోటరే వసన్ విముక్తదుర్మతిః సదా శిరఃస్థమంజలిం వహన్। విముక్తలోలలోచనాలలామభాలలగ్నకం శివేతి మంత్రముచ్చరన్ కదా సుఖీ భవామ్యహమ్ ॥ ౧౩ ॥
నిలింపనాథనాగరీకదంబమౌలమల్లికానిగుంఫనిర్భరక్షరన్మధూష్ణికామనోహరః। తనోతు నో మనోముదం వినోదినీమహర్నిశం పరశ్రియః పరం పదం తదంగజత్విషాం చయః ॥ ౧౪ ॥
ప్రచండవాడవానలప్రభాశుభప్రచారణీ మహాష్టసిద్ధికామినీజనాఽవహూతజల్పనా। విముక్తవామలోచనావివాహకాలికధ్వనిః శివేతి మంత్రభూషణా జగజ్జయాయ జాయతామ్ ॥ ౧౫ ॥
ఇమం హి నిత్యమేవముక్తముత్తమోత్తమం స్తవం పఠన్స్మరన్బ్రువన్నరో విశుద్ధిమేతిసంతతమ్। హరే గురౌ సుభక్తిమాశు యాతి నాఽన్యథా గతిం విమోహనం హి దేహినాం సుశంకరస్య చింతనమ్ ॥ ౧౬ ॥
పూజావసానసమయే దశవక్త్రగీతం యః శంభుపూజనపరం పఠతి ప్రదోషే। తస్య స్థిరాం రథగజేంద్రతురంగయుక్తాం లక్ష్మీం ప్రసాదసమయే ప్రదదాతి శంభుః ॥
॥ ఇతి రావణకృతం శివతాండవస్తోత్రం సంపూర్ణమ్ ॥
మూలం: Wikisource · CC BY-SA 4.0